Ba khaol dahlak tame dom baoh sang  lưới rivang iek hamu dưa lưới prong labaih 8.000 mét vuông hu pala dalam ralo mbang, ong Võ Văn Trưng khan veik bruk ngak meda di drei. Ong Trưng brei thau, bhum taneh Bình Thành ini meng kan dahlau njaom lakhul trak, urang nong pak ini diuk rai pagam pambak tame bruk ngak padai, pala njam patam min jien mek tame tok ginup cai pandar tapa sang.

          Dom thun jaik di ini langik tasik oh siam laghaih, tua riya pandiak bhang, njaom mbak dui atah ngak kan kandah tal bruk pala drak di urang nong. Mboh ngak padai oh hu hadom jien, bo bhian gaok kan kandah ka halaw aia nan ye 3 thun dahlau, ong Trưng nao tal ralo tỉnh yau Bình Dương, Đồng Nai saong bal raya Hồ Chí Minh piah roh duah, bac megru bruk ngak nong bahrau saong pandar ilamu tame bruk pala drak di drei; duah thau darak pasar, duah labik pablei kaya nong. Blaoh ong Trưng palih ruah bruk ngak nong tui jalan pandar công nghệ glaong piah pala phun dưa lưới. “Ngak padai ye ia dak harei dak njaom mbak, taneh riya dak harei dak thu lagu. Tuk drei  salih tapa pala janih phun pala karei ye drei njauk saneng kuhria tal bruk pandar takik ia. Nyu gam patak pataom jien padai, pren ngak gam mek hu ralo jak jeng angaok mblang taneh drei hu. Kayua yau nan ye drei pala dưa lưới bo pala tui jalan angaok mejam piah oh  ảnh hướng tal mbaok taneh, kadua tra dalam tukvak drei pala drei pruh aia tui jalan kanjaohsit sit”.

         Dom harei ini, tuk urang nong ralo labik dalam bhum daok nduac cagar nduac jalun duah aia bơm tagok hamu pruh ka vụ padai hè thu daok metai thu ye angaok mblang taneh di ong Trưng dom phun dưa lưới daok that hijao, bak baoh meda. Ong Trưng brei thau: Mai meng bruk pala dalam sang lưới saong pandar hệ thống pruh aia kanjaoh sit sit tui công nghệ di Israel nan ye ong patak pataom hu biak ralo jien padai. Meng công nghệ ini, hadei di tuk pabam asal dưa lưới jeng phun anek, ong pala yaok phun tame sa bầu caik hu 4 lít giá thể, ralo meng lac xơ la-u nan ye gha phun oh gaok taneh padai dahlau diah.

Yaok sa bầu jeng hu sa vòi pruh aia nhỏ giọt pambuak haong dom dhar talei  hu pambuak tame jalan talei praong meng nhựa dẻo hu caik grauk sang kareih. Ia hu pruh 10 mbang sa harei saong yaok mbang dalam 2 minit. Tui jalan pruh ini, ong Trưng patak pataom hu labaih 80% aia dut haong jalan pruh aia meng kan dahlau. Kadha mbuan laghaih tra nan lac aia pruh caik dalam dom  thùng nhựa composite hu thể tích tagok tal labaih 2.000 lít hu srau haong ralo hợp chất hữu cơ pabak dinh dưỡng ka yaok tukvak cakrok patagok di phun.

Bruk pruh aia nhỏ giọt ini hu điều khiển meng công tắt thông minh. Yau nan ye, bruk bơm aia tapak meng mô tơ điện meng dom thùng padang aia tame hệ thống talei ba dahlau di tuk pruh ka yaok gha dưa lưới hu tự động abih tui lập trình. Taphia dom siam laghaih nan, bruk pala dưa lưới dalam sang gam daong plaih hu dom kadha oh siam di langik tasik, gam pacang caga côn trùng, halak halin, jit ruak nan ye patrun biak ralo phun jien saong pren yava pruh jru khik caga phun pala. Kadha prong jang nan lac dom baoh dưa lưới di ong oh kandaong labaih jru độc hại. Meng labaih 8 công đất pala 4 vụ, yaok thun ong Trưng laba hu jaik 2 tỷ đồng.

         Tui ong Nguyễn Thế Tự- Phaok jabat ngak nong saong patagok palei pala huyện Phụng Hiệp:  Ini lac mô hình tiêu biểu di tỉnh Hậu Giang, ba mai kein laba glaong nan ye puk palei daok roh duah, ba tabiak jalan daong, pachreih dom baoh sang hu điều kiện peih prong jang di ralo labik karei, abih di nyu nan lac di dom labik kurang aia taba piah pala drak anak bruk biến đổi khí hậu, ba tal tua riya pandiak bhang, njaom mbak dui atah. Yau nan min di tuk akaok mereip, gah ngak nong hu kakei dom baoh sang urang nong tok ngak sit piah takik abih jien ndo ngak sang lưới, ngak jalan pruh aia. “Mô hình di ong Trưng urak ini  mboh biak hu laba dut haong dom mô hình pala njam patam karei, nan ye daok hu preih pron, saong daok hu jak ba mikva karei ngak tui mô hình ini, oh njauk lac ka dưa lưới saoh bo daok hu dom janih  njam patam karei bo pala dalam sang lưới lac hu kein laba”./.