Baoh sang raong limo ia tasau hu jak jeng di xã Thái Hòa

Meng hatai caong khin ngak kaya mada meng bhum taneh kathaot, meng di thun 2001 dom baoh sang bhap bini daok di xã Thái Hòa, huyện Lập Thạch, tỉnh Vĩnh Phúc khang hatai buh jien tame patagok bruk raong limo ia tasau. Xã jeng hu ba tabiak rilo jalan ngak piah daong ka mikva yau ye daong palagaih piah hu mesraiy phun jien raong glang; peih dom tal pato pasram saong tacei pato bhap bini raong njauk ilamo, mek hu kein laba glaong abih dalam bruk raong limo ia tasau.

Thun 2014, saai Đỗ Đình Anh daok di puk Rừng, xã Thái Hòa  blei 2 drei limo ia tasau mai raong piah patagok bruk ngak mbang di sang. Tal urak ni, sang saai hu 20 drei limo ia tasau; dalam nan hu 12 drei daok brei ia tasau. Tui kuhria yaok drei limo mek hu meng 20-25kg ia tasau yaok harei. Saai Đỗ Đình Anh khan lac, hadei di tuk kaoh abih jien buh tame, sa drei limo tukvak mek ia tasau  haong yaom tani tanat ye laba hu labaih 3 triệu đồng sa bilan sa drei.

Maong mboh kein laba meng bruk raong limo ia tasau, thun 2012 amuk Trần Thị Minh hu masaiy jien padang ngak var raong saong blei 5 drei limo pajaih mai raong. Tal urak ni, sang muk hu tapon  limo ia tasau 15 drei, dalam nan tuk halei jeng hu labaih 80% tapon limo di sang mek hu ia tasau gam gam, yaok drei brei meng 18-27 kg ia tasau yaok harei, mek hu labaih 3 triệu đồng. Ong Hà Minh Luân, akaok Hội đồng khik ramik gam lac Yam ndok Hợp tác xã raong glang saong cak rok patagok bruk raong limo ia tasau di xã Thái Hòa, brei thau: HTX urak ni hu 44 sang, jeng lac dom sang raong limo ia tasau dalam xã, ngan haong tapon limo abih tih jaik 400 drei.

Urak ni, limo ia tasau dak harei dak mboh hu rilo di dom puk palei, grauk dom mbon ceik, labik mblang hamu kan pala drak jeng bak sambo hijao di dom janih hariek hu bhap bini pala brei ka limo mbang. HTX daok pambuak bruk haong Cty Sữa Hà Lan piah pablei ia tasau limo saong hu pato tacei ilamu raong limo, bruk mek ia tasau ka dom sang dalam HTX, hu daong meteh yaom jien tuk blei jamriak iak ia tasau, hu daong jien bảo hiểm athur raong, hu pabak jru pametai anek ruak, ngak hacih var raong…...Yaok harei, mikva iak ia tasau 2 mbang, hadei di nan ba nao tal bilik khik piah di HTX, ngak njauk tui dom bruk ba tabiak di Cty ia tasau, abih di nyu nan lac khik kajap hacih sa-at, siam mekre, salamat.

Meng hu yau nan, dom sang dalam HTX jeng lac dom sang raong limo ia tasau dalam xã biak sahnang hatai dalam bruk raong glang kayua yaom ia tasau hu tani tanat. Langiu di nan, dom sang raong jeng lac gauk gar, mikva dalam xã tuk halei jeng abih hatai klah rabha ilamo, daong gauk dalam bruk raong, cak rok patagok tapon limo hu kein laba di abih./.

Urang lang: Thu Thảo – 16/06