Sa-ai Dũng daok brei baoh manuk karam

Yaom lac prein yawa oh khang kajap min sa-ai Dũng tuk halei jeng sahaneng duah sa bruk hagait nan, lagaih saong prein yawa rup pabhap di drei piah daong patrun meneing naong trak ka baoh sang. Akok thun 2018, iek mbao mboh bruk raong manuk sao mek hu kein laba glaong, sa-ai Dũng ginum saong diuk blei labaih 50 drei mai raong iek. Tuk camereip bahrau raong, sa-ai gaok biak rilo kan kandah, kayua oh thau iek glang, oh ka duah hu jalan raong lagaih. Dom harei langik pandiak hajan oh lagaih, manuk oh sumu randap, tapon menuk metai labaih meteh. Tuk manuk praong pablei hu ye oh hu labik pablei. 

Yaom lac khat lahik, min sa-a Dũng oh taduan lah. Meng hatai tari taring oh huac glaih glar di urang nong, sa-ai bac megru veik, roh duah, gam raong gam bac tapa tapuk, bac tapa dom mbang ba manuk nao pablei ka tuai. Mbiah tal urak ini, labik raong manuk di sa-ai tuk halei jeng hu labih 3.000 drei manuk praong.  

Ndom ka ilamu raong manuk, sa-ai Dũng brei thau, meng tuk raong tal tuk pablei lac meng 4 tal 5 bilan. Pandap mbang ka manuk lac tangei, padai, lisei labaih…Langiu di nan, meda brei mbang njam, hareik, haleik. Hadei di 4 bilan raong, manuk sao trak meng 1 kilo meteh tal 2 kilo sa drei saong yam tame tuk mebaoh.

Jeng tui sa-ai Dũng, manuk sao mbuan raong min oh takre tathah, var ro brei khik hu hacih sa-at, lahei, pacang hu pandiak saong tathah…Var brei parai kam, gam pandar veik aih manuk ngak khak drak, gam khik hu siam alam moi truong.

Sa-ai Dũng khan lac: “Thun blaoh, meng bilan 6 sakavi ia bulan sang dahlak raong labaih 3.000 drei manuk sao pajaih. Tal bilan 12 sakavi ia bulan ye mek hu labaih 5 tấn manuk pablei rilow. Tui yaom pablei meng 100.000 tal 110.000 đồng sa kilo, hadei di tuk kaoh abih phun jien buh tame ngak, daok laba hu labaih 300 triệu”. Piah tagok jien mek tame ka baoh sang, langiu di bruk raong manuk pablei rilow, sa - ai Dũng daok hu blei mac jamriah kram caik baoh manuk pajaih piah pablei ka mikva dalam bhum. Langiu di raong manuk sao, sa-ai Dũng daok hu raong yaok rituh drei cim trĩ bhong, manuk tre, manuk Đại cát... saong buh jien tame ngak pasiam labaih 400 m2 danao raong ba ba./.

Urang lang: Aí Nghiêm - 17/6/2020