Đợ c’moo đăn đâu, bh’rợ tơợp bhrợ têng cha liêm choom cóh thành phố Đà Nẵng pa dưr pa xớc k’rơ, t’pấh ting bấc đha đhâm c’moor pấh bhrợ. Ooy đâu, dưr n’léh bấc apêê đha đhâm c’moor bhrợ têng cha choom, chrooi pa xoọng pa dưr pa xớc pr’ắt tr’mung, bhrợ đoọng bhiệc bhrợ ha pêê pr’zợc p’niên lưm tr’mung zr’nắh k’đhạp têêm ngăn pr’ắt tr’mung. Ooy t’ruíh Đha đhâm c’moor tơợp bhrợ têng cha tuần nâu, đhanuôr lâng pr’zợc tr’lưm lâng 2, 3 apêê chr’nắp liêm đắh bh’rợ bhrợ têng cha liêm choom cóh thành phố biển nâu ớ.

Bơơn râu k’rang lêy âng Đảng lâng Nhà nước đh’rưah lâng bh’rợ liêm choom âng vel đong, tươc nâu cơy pr’ăt tr’mông chr’hoong da ding k’coong Nam Đông ơy vêy bâc râu liêm pr’hay. Đh’rưah lâng pazêng acoon c’lâng chô ooy pazêng bhươl cr’noon căh cậ coh pazêng da ding k’coong bâc ơl tơơm cao su, cam, prí, năc đợ đhr’nong đong vêy ta bhrợ nhâm mâng ting t’ngay bâc lâh mơ xăl ha pazêng đhr’nong đong am cr’đe, zir xrăh. Choom t’bil lơi đong căh lâh liêm mâng, đhanuôr coh đâu năc mâng loom bhrợ pa dưr pr’ăt tr’mông t’mêê.