1. Mŭk drăm Việt Nam ming pơ-‘lơ̆ng tenh, oei lơ̆m grŭp teh đak jang đei hơtŏk GDP kơjung hloh (3 ảnh)

Găn ga lơ tơnap tap kơyuơ đơ̆ng pơrang jĭ Covid 19 păng dôm tơdrong tơxŭl tơxăl lơ̆m kơpal teh, Việt Nam hlôi jang đei jơnei tôm tơdrong tơchơ̆t, xơnong jang vă akŏm tang găn păng hơlen tơjră pơrang jĭ răh, hơtŏk ming pơ-‘lơ̆ng răh mŭk drăm – tơpôl, pơjing tơdrong jang mŭk drăm hiôk hian, pơgơ̆r kơdih, tơguăt hăm kơchăng pơm jang hadoi lang xă lơ̆m kơpal teh păng đei jơnei.

Mŭk drăm tơm đei xơđơ̆ng, huach kư̆ kă đei hơlen tang găn, dôm tơdrong pơhơtŏ kơ tơdrong jang mŭk drăm đei vei xơđơ̆ng lơ̆m tơdrong jang ƀơm lơ tơnap tap. Hơtŏk GDP xơnăm 2022 kơchĕng gô đei 8,02%, tŏk kơjung hloh lơ̆m jăl xơnăm 2011-2022. GDP kơ rim ‘nu bơngai jang ăh xơnăm 2022 kiơ̆ pơkăp oei yua dang ei noh đei jơnei 95,6 trĭu hlj, hơtŏ hăm 4.110 đôlar, tŏk 393 đôlar pơtêng hăm xơnăm 2011. Kơjă tơdrong pơyua (CPI) tŏk 3,15% pơtêng hăm xơnăm 2021, đei jơnei tơchơ̆t mă Kuôk hô̆i tơlĕch. Huach kư̆ kă ăh xơnăm 2022 tŏk 2,59% pơtêng hăm xơnăm 2021, kơđeh hloh pơkăp CPI pơkăp atŭm (tŏk 3,15%).

2. Lơ tơdrong kăl đei tơchơ̆t jĭ tôch gĭt kăl hăm tơdrong atŏk tơ iung kơ teh đak

Hop akŏm Trung ương 5 păng Trung ương 6, jăl XIII hlôi tơchơ̆t lơ tơdrong kăl nhen: Pơchŏh trong Pơprŏ tơm teh đak jăl jang 2021 - 2030 păng lăng trŭh sơnăm 2050; Hơnơ̆ng atŏk kơtang jang kmăi kmŏk hơgei; Tơplĭh ‘nao trong chĕp pơgơ̆r đơ̆ng Đảng; Tơ iung pơjing păng pơm pơkeh Teh đak pháp quyền xã hội chủ nghĩa Việt Nam; Trong bơ̆ jang, khôi luơ̆t găh groi teh; Tơdrong chŏh jang sa, kon pơlei choh jang sa, tơring chŏh jang sa, mŭk drăm tơpôl; Atŏk bơ̆ jang ‘lơ̆ng khul đảng viên lơ̆m chăl hle ...

Dơnŏ anĭh tơm Chĭnh trĭ pơjing 6 Tơdrong tơchơ̆t Tơring găh atŏk tơ iung mŭk drăm-tơpôl, vei lăng sơđơ̆ng sơlam teh đak-sơđơ̆ng tơring trŭh sơnăm 2030, lăng trŭh sơnăm 2045, pơjing đei drơ̆ng mĭnh nơ̆r găh jơhngơ̆m đon păng iung jang lơ̆m pơđĭ Đảng, pơđĭ kon pơlei, pơđĭ khŭl ƀô̆ đô̆i. ‘Moi kiơ̆ trong au, Kuô̆k hô̆i, Khŭl kơdră teh đak hlôi pơjing ‘nao đei jing tơdrong jang, tơdrong vă jang, tơchơ̆t hơdăh păng pơgơ̆r tơlĕch jang kiơ̆ hloi yan au, pơ̆ih trong rơvơn ăn atŏk tơ iung pơjăp ‘lơ̆ng, tôm tong kơ pơđĭ lơ̆m tĕh đak ƀơ̆t măt păng đunh đai.

3. Tơdrong jang hơmet pơ-‘lơ̆ng Đảng, tang găn păng tơjră xa pơjĭp, kơnê̆ roi năr roi jang khŏm mă jơnei

Xơnăm 2022, tơdrong jang tang găn păng tơjră xa pơjĭp, kơnê̆ hlôi jang kơhret, tơguăt kơjăp hăm hơmet pơ-‘lơ̆ng Đảng, tơjră hăm blơ̆ blĕch kơnê̆ găh đon jang chĭn trĭ, kơnê̆ găh đon bơnôh, trong erih xa.

Tơdrong pơjing Jơnŭm Pơgơ̆r tang găn păng tơjră xa pơjĭp kơnê̆ tơ̆ 63 dêh char, pơlei tơm pơtơm pơm jang đei jơnei. Tơdrong xek hơlen kih lươ̆t đe kang ƀô̆, đảng viên pơm yoch đei tơlĕch jang kơchăng, trŏ ƀlep, hơtŏ hơnơ̆ng, trŏ tơchơ̆t đơ̆ng Đảng păng khôi lươ̆t teh đak. Rim anih jang tơkêng tơhlâu hlôi tơkêng, hơlen jê̆ 2.500 ‘măng pơm glăi xa pơjĭp, muk drăm, glăi găh kơchư̆k jang kơpal, lơ̆m noh đei lơ tơdrong xa pơjĭp, kơnê̆ hli hlơt, tơnap tap nhen: ‘Măng pơm glăi tơ̆ Anih jang tang măt (Anih tơm Tơbôl); dôm tơdrong glăi đei ƀôh tơ̆ Anih jang Việt Á, Anih jang FLC, Tân Hoàng Minh, Anih jang AIC; Anih jang Vạn Thịnh Phát.... Tơdrong jang tang găn păng tơjră xa pơjĭp, huach kư̆ kă, kơnê̆ pơtoi tơgop hơmet pơ-‘lơ̆ng đon lui đơ̆ng kon pơlei, đe kang ƀô̆, đảng viên hăm tơdrong pơgơ̆r jang đơ̆ng Đảng păng chăl pơgơ̆r.

4. Tơlĕch lơ tơdrong jang tơbôl, atŏk kơtang hơnĭh dơ̆ng Teh đak

‘Măng iung năm tơmang tơ̆ teh đak CHND Trung Hoa đơ̆ng năr 30/10 trŭh năr 1/11 kơ Tổng Bí thư Nguyễn Phú Trọng ‘nŏh jing tơdrong pơgơ̆r gĭt kăl hlŏh, iŏk đei jơnei tôm tong, tơgop hơmet pơ ‘lơ̆ng, atŏk tơ iung tơgoăt tơgoăl Việt Nam-Trung Quốc. Atŭm hăm ‘nŏh rim ‘măng năm tơmang teh đak Hàn Quốc, Indonesia đơ̆ng Kơdră chĕp pơgơ̆r Teh đak Nguyễn Xuân Phúc, ‘măng năm tơmang Hoa Kỳ, Hà Lan, Bỉ, Luxembourg đơ̆ng Thủ tướng Phạm Minh Chính, ‘măng năm tơmang Hungary, Anh, Australia, New Zealand, Philippines đơ̆ng Kơdră chĕp pơgơ̆r Kuô̆k hô̆i Vương Đình Huệ.

Việt Nam jei iung jang kơtang, tơnăp lơ̆m rim ‘măng pơgơ̆r hop akŏm lơ̆m tơring păng lơ̆m apŭng plĕnh teh nhen: ASEAN, AIPA, APEC, Liên Hợp Quốc… Sơnăm 2022 jei tơbăt hơdăh tơdrong pơgơ̆r jơnei Sơnăm tơgoăt tơgoăl Gĭt kăl Việt Nam-Lào, Việt Nam-Campuchia. Việt Nam hơnơ̆ng sơkơ̆t hơdăh trong jang tơbôl jơ̆p jang păng vei kơjăp rơngei hiôk hian, sơđơ̆ng vă atŏk tơ iung teh đak, atŏk hơnĭh dơ̆ng păng tơdrong yom kơ teh đak.

5. Việt Nam đei rơih jang lơ̆m Jơnŭm Pơm tơm kơdih kon bơngai Liên hơp kuôk

Năr 11/10/2022, Việt Nam hlôi ‘măng mă 2 đei rơih jang lơ̆m Jơnŭm Pơm tơm kơdih kon bơngai kơ Liên hơp kuôk jăl jang xơnăm 2023-2025, tơ̆ hop akŏm kơ Jơnŭm jang Liên hơp kuôk jăl 77, pơgơ̆r tơ̆ New York, teh đak Mih hăm kơsô̆ kơphĭu pôk lơ.

Tơdrong đei jơnei pôk rơih jing tơdrong pơkăp đơ̆ng jơnŭm jang apŭng plenh teh hăm dôm tơchơ̆t păng kơ ‘nôh pran kơtang đơ̆ng Việt Nam găh pơtrŭt păng vei lăng xơnong pơm tơm kơ kon bơngai. Hăm xơnong jang trăp tơ̆ Jơnŭm Pơm tơm kơdih kon bơngai kơ Liên hơp kuôk, Việt Nam gô đei trong hiôk tơgop lơ̆m hơtŏk tôm xơnong pơm tơm kơ kon bơngai kiơ̆ pơkăp hơtŏ hơnơ̆ng, jang hadoi păng pơma đam, vei xơđơ̆ng roi năr roi tơnăp xơnong pơm tơm kơ kon pơlei lơ̆m tôm tơdrong pơm jang.

6. Pơgơ̆r jơnei ‘Măng pơlong Đă ƀŏng lŏng tơplŏng kơdau Đông Nam Á ‘măng mă 31 (SEA Games 31)

Hăm nơ̆r pơma “Kơ yuơ mĭnh Đông Nam Á pran kơtang hlŏh”, Việt Nam hlôi pơgơ̆r jơnei Pơgơ̆r pơlong Đă ƀŏng lŏng tơplŏng kơdau Đông Nam Á ‘măng mă 31 (SEA Games 31) đơ̆ng năr 12-23/5/2022.

Hlŏh 14 năr pơlong, khul đă ƀŏng lŏng tơplŏng kơdau tơngla hnam Việt Nam iŏk đei 205 mê đai măih, 125 mê đai hu păng 116 mê đai kong. Việt Nam iŏk đei dơ̆ng hơlau lơ̆m khul hăm lơ tơdrong iŏk đei jơnei hơ iă, hlôi tơƀô̆h hơdăh mĭnh pơyan SEA Games hơtŏ hơnơ̆ng, tơpăt, tơbăt hơdăh jơhngơ̆m đon tơgoăt tơgoăl kơ tơpôl ASEAN. Việt Nam hlôi pơjing đei tơdrong hơ iă găh mĭnh teh đak lơ̆m khul ASEAN ‘lơ̆ng liĕm, phăl hơlăng, năng tông kơjăp, hlôi hơmet pơ’lơ̆ng keh kong păng tŏk bŏk atŏk tơ iung kơtang.

7. Găh jên jang, mŭk drăm gĭt ... đei lơ tơplih ưh ‘lơ̆ng, kăl chă trong pơklaih

Xơnăm 2022, bơ̆ng pang tơdrong tơplih kơtang găh dôm tơdrong jang nhen mŭk drăm gĭt, trăi phĭu anih jang mŭk drăm, chư̆ng khuăn, đak xăng đak dâu... Tơdrong jang chư̆ng khuăn tŏk jur ưh xơđơ̆ng, tŏk kơjung hloh lơ̆m dôm khei blŭng xơnăm păng tơplih tŏk jur hơnơ̆ng lơ̆m dôm khei jê̆ đĭ xơnăm.

Kơyuơ răm đơ̆ng tơdrong jang tĕch răt lơ̆m kơpal teh, kơjă đak xăng đak dâu lơ̆m teh đak tŏk kăp, atŭm hăm noh tơdrong tơhlăk găh axong tơmơ̆t, pơm ăn lơ anih tĕch đak xăng đak dâu athei tang ‘măng dăh mă pơih tĕch kơplăh kơplơt. Tơdrong mă âu minh păh kơyuơ pơkăp khŏm mă xek tơlang dôm tơdrong tam mă ƀlep oei pơdui đunh kơ tơdrong jang tĕch pơdro tơ̆ minh ƀar anih jang mŭk drăm tih, vă pơkăp axong jang adrol hloh athei pơtoi xek tơlang tơnăp mă keh đang lơ̆m xơnăm 2023.

8. Tơdrong ư̆h kơ măh pơgang, tơmam drăm jang pơgang pơm tơnap tap ăn bơ̆ jang ming hơmet jĭ jăn

Pơđĭ rim hnam pơgang lơ̆m teh đak ư̆h kơ măh pơgang, tơmam drăm jang pơgang kơ yuơ đei lơ tơdrong pơm ăn, lơ̆m au đei dôm tơdrong tơhlăk tơhlĭn lơ̆m rim hla bơar đei ƀơm trŭh chă răt, tơchă hơnĭh tĕch ăn pơgang, tơmam drăm jang pơgang pơm ăn trŭh hlôh vao, trong jang phara dih băl.

Tơdrong mă au hlôi pơm kơnê̆ kơtang trŭh tơdrong chă khăm, ming hơmet jĭ jăn, pơm kơnê̆ trŭh tơdrong hơtŏ hơnơ̆ng păng sơđơ̆ng erĭh sa tơpôl. ‘Nau jing mĭnh trong athei xek tơlang blŭng hlŏh đơ̆ng Khŭl kơdră Teh đak, Dơnŏ anĭh tơm jang pơgang, hơnĭh bơ̆ jang ƀơm truh.

9. Pơjing kơjă kăp gĭt kơ teh đak, pơkăp kơjă kăp gĭt joh ayŏ, kơjă kăp gĭt kơ unh hnam păng pơkăp găh kon bơngai Việt Nam lơ̆m chăl ‘nao

Hơlen lăng dơ̆ng tơdrong jang đei jơnei 1 xơnăm pơm kiơ̆ Tơchơ̆t đơ̆ng ƀok Tổng Bí thư Nguyễn Phú Trọng tơ̆ Hop akŏm Joh ayŏ jâ̆p teh đak tơlĕch pơm kiơ̆ Tơchơ̆t Hop akŏm mă 8 kơ Đảng, năr  29/11, tơ̆ Hà Nội hlôi pơgơ̆r Pơma đam khua hŏk kơ teh đak “Pơkăp kơjă kăp gĭt kơ teh đak, kơjă kăp gĭt kơ joh ayŏ, kơjă kăp gĭt kơ unh hnam păng pơkăp găh kon bơngai Việt Nam lơ̆m chăl ‘nao”; năr  17/12 tơ̆ Bắc Ninh pơgơ̆r Pơma đam Joh ayŏ 2022 hăm hơnăn  "Trong tơchơ̆t tơlĕch jang păng jơhngơ̆m pran ăn hơtŏk joh ayŏ".

Dôm tơdrong pơma đam âu pơgơ̆r đơ̆ng rŏng 1 xơnăm Hop akŏm Joh ayŏ jâ̆p teh đak ăn ƀôh tơrĕk jang đơ̆ng Đảng, Khul Kơpal teh đak păng tôm tơpôl lơ̆m tơdrong pơkăp pơjing minh tơdrong joh ayŏ Việt Nam gơh rơgei, ƀenh kơ um ai joh ayŏ hơdrung hơdrĕch, vă joh ayŏ tơpă jing jơhngơ̆m pran lơ̆m tơpôl, jing tơdrong tơm đon bơnôh păng jing jơhngơ̆m pran vă hơtŏk tơ-iung kơ teh đak kiơ̆ Tơchơ̆t tơlĕch đơ̆ng Hop akŏm Đảng jâ̆p teh đak ‘măng mă 8.

10. Atŏk kơtang iung jang kiơ̆ kmăi kmŏk kơsô̆

Năr 22/4/2022, Thủ tướng Teh đak hlôi tơlĕch Tơdrong tơchơ̆t kơsô̆ 505/QĐ-TTg iok năr 10 khei 10 rim sơnăm ‘nŏh jing Năr jang kiơ̆ kmăi kmŏk kơsô̆ teh đak. Sơnăm 2022 jing sơnăm ƀô̆h hơdăh iŏk đei jơnei hơ iă lơ̆m tơ iung pơjing Khŭl kơdră chĕp pơgơ̆r teh đak jang hăm kmăi kmŏk kơsô̆, mŭk drăm kơsô̆, tơpôl kơsô̆ păng bơ̆ jang tĕch mơdro điên tư.

Jang kiơ̆ kmăi kmok kơsô̆ hlôi jing pơđĭ lơ̆m kon pơlei, tôm tong, hăm vang iung jang kơtang đơ̆ng rim Hơnĭh tơm, hơnĭh bơ̆ jang, Tơring tơrang. Tơdrong tơchơ̆t Trung ương 6 hlôi sơkơ̆t hơdăh lăng bơ̆ jang hăm kmăi kmŏk kơsô̆ ‘nŏh jing mĭnh trong jang atŏk tơ iung ‘nao gĭt kăl hloh, pran kơtang hloh tơgŭm ăn iung jang kiơ̆ tĕnh koăng lơ̆m tơdrong jang teh đak jang kmăi kmok hơgei.