Pơlei Huổi Lẹ, xăh Nậm Giôn, apŭng Mường La, dêh char Sơn La jing pơlei đei 100% kon pơlei La Ha erih jang xa.  ‘Lơ̆ng tơnăp mă blŭng ƀơ̆t truh tơ̆ âu noh jăl trong kơsu xă rơgoh guăng, dôm bơbŭng hnam kơjung hrơ hrau hăm pơnĭk jơk kơ pơgar ‘long xa plei, hnam trưng, hnam hơkŭm joh ayŏ đei man kơjăp ‘lơ̆ng.

Chŏng mă ưh gan đei bơngai băt truh, lơ̆m minh jĭt xơnăm adrol ki Huổi Lẹ oei jing minh lơ̆m dôm pơlei oei lơ̆m 5 ưh “ưh đei unh hơyuh, ưh đei trong, ưh đei hnam trưng hŏk, ưh đei đak xŏ nhă rơgoh păng ưh đei sŏng điê̆n thoăi”  tơdrong erih kon pơlei La Ha tơ̆ âu prăt xơnăm tơguăt hăm mir ƀa, trong pơm jang kơtul răh rai, kơyươ noh mă đei khei năr lơ̆m pơlei ưh kơ đei vă minh unh hnam klaih đơ̆ng hin dơnuh. Vă kĕ đei um ai nhen hrei âu noh jing minh tơdrong kơ ‘nôh hrat hrĭn găh tơdrong tơlĕch jang đơ̆ng dôm jăl pơgơ̆r tơring, tơdrong tơgŭm đơ̆ng Đảng păng Khul Kơpal teh đak kiơ̆ dôm trong jang kăp gĭt ăn kon pơlei kon kông păng kăp gĭt hloh noh jing tơdrong atŭm jơhngơ̆m đơ̆ng tôm kon pơlei. Ƀok Lò Văn Pau, kơdră pơlei Huổi Lẹ, xăh Nậm Giôn, apŭng Mường La, dêh char Sơn La tơroi: “Truh khei năr âu noh xơđơ̆ng jơhngơ̆m bơih, đei trong vih vơ̆t lơ̆m 4 pơyan, đei trong kơsu năm truh tơ̆ pơlei, năm tơ̆ xăh hiôk hian, trong vih vơ̆t jang xa kơ kon pơlei noh ‘lơ̆ng tơnăp. Đing pơro đak adol ki adoi đei mă lei ‘mi tih teh hơlih răm pơđĭ, mă lei Đảng, Khul Kơpal teh đak tơgŭm axong ming hơmet pơlăp đing pơro noh dang ei xơđơ̆ng jơhngơ̆m bơih”

Đảng viên Lò Văn Phương xơnăm âu tŏk 60 xơnăm, ƀok đei băt truh ưh adrô̆ bơngai đei kon pơlei lui yom lơ̆m pơlei pơla mă oei jing um ai yuk hơlâu lơ̆m tơdrong hơtŏk mŭk drăm, hơtŏk xut lê̆ pơngot tơjur hin dơnuh. Xơnăm 2016, unh hnam ƀok Phương atŭm hăm 60 unh hnam kơ pơlei Huổi Lẹ đei tơgŭm ăn rơmo, bơbe yŏng păng hơdrĕch ‘long xa plei kiơ̆ pơkăp tơgŭm hơtŏk mŭk drăm tơpôl hơdrung bơngai kon kông đei tŏ xĕt măt bơngai, jăl xơnăm 2016- 2025 đơ̆ng Khul Kơpal teh đak, ƀok hlôi chih măt năm hŏk dôm lăm pơhrăm găh khoa hŏk kih thuơ̆t, vei lăng ‘long pơtăm, kon tơrong păng đei axong năm tơmang hŏk hơlen tơdrong hlôh vao vă iŏk yua lơ̆m tơdrong pơm jang noh hlôi hơ ‘nhăk lơ găh mŭk drăm. Dang ei unh hnam ƀok Phương đei hloh 1ha teh pơtăm pơ ŏ, kon tơrong noh đei jê̆ 20 tŏ kơpô, rơmo păng 30 tŏ bơbe pơyua hloh 150 rơtuh hlj rim xơnăm, ƀok duh jing minh bơngai hơdrung La Ha gơh rơgei kơ dêh char Sơn La chơt hơ iă đei iŏk ƀăng pôk bơnê đơ̆ng Thủ tươ̆ng Teh đak găh tơdrong jang rơgei lơ̆m pơjing tơdrong tơguăt tơguăl kon pơlei păng hơtŏk mŭk drăm tơpôl tơring kon pơlei kon kông. Ƀok Phương ăn tơbăt: “Adrol ki tơdrong erih kon pơlei La Ha nhôn tơnap tap, mŭk drăm mă tơm noh kơdih chă jang răh rai, nhen lĕ unh hnam yơ adoi unh hnam hin dơnuh. Gơnơm Đảng, Khul Kơpal teh đak chă tơgŭm hơdrĕch ‘long pơtăm, kon tơrong, pơtho ăn kon pơlei băt trong pơm jang, hơtŏk mŭk drăm, noh dang ei tơdrong erih unh hnam inh păng kon pơlei tơ̆ pơlei Huổi Lẹ hlôi tơplih lơ tơdrong, hnam mă yơ duh đei gre honđa, đei ti vi, kon hơ ioh đei hŏk pơhrăm tôm, kon pơlei La Ha nhôn gô hơdrin tơguăt tơguăl pơm kiơ̆ ƀlep trong pơkăp jang đơ̆ng Đảng, adrin jang xa, pơjing tơdrong erih, pơlei pơla Nậm Giôn roi năr roi phĭ tơtŏ hơtŏk tơ-iung”

Apŭng Mường La đei 822 unh hnam bơngai hơdrung La Ha erih jang xa tơ̆ 18 pơlei kơ 10 xăh, mă lơ noh dôm tơring oei xa ataih đơ̆ng anih tơm, kơsô̆ unh hnam hin dơnuh oei lơ, tơdrong ‘lơ̆ng hăm kơsô̆ măt bơngai, tơdrong ‘lơ̆ng erih xa oei kơđeh. Đơ̆ng xơnăm 2019 truh dang ei, apŭng hlôi axong jên mong hloh 18 rơtăl hlj vă tơgŭm kon pơlei dôm pơlei pơla răt kơmăi kơmŏk, tơgŭm 122 tŏ bơbe, 654 tŏ rơmo ăn 776 unh hnam bơngai La Ha, pơjing trong pơm jang tơgŭm kon pơlei hơtŏk mŭk drăm xơđơ̆ng tơdrong erih. Atŭm hăm noh pơih 3 lăm hŏk pơhlôh ăn  209 kang ƀô̆ kon kông, tơgop pơm jang đei jơnei tơdrong hơvơn pơtho kon pơlei tơ̆ tơring. Ƀok Nguyễn Trọng Hiệp, Kơdră Anih jang kon kông apŭng Mường La ăn tơbăt: “Hăm kon pơlei dôm hơdrung bơngai kon kông lơ̆m apŭng Mường La noh Anih vei lăng kon pơlei dêh char Sơn La hlôi tơlĕch tơchơ̆t 2407 pơkăp Tơdrong tơgŭm păng hơtŏk mŭk drăm tơpôl ăn kon pơlei La Ha. ‘Nâu jing trong jang kăp gĭt păng tơgŭm ăn kon pơlei La Ha vă hơtŏk tôm tơdrong păng hơtŏk anih dơ̆ng ăn hơdrung kon kông, xut lê̆ pơngot tơjur hin dơnuh, hơtŏk tơdrong erih mŭk drăm, xut pơngot tơjur hin dơnuh kơjăp xơđơ̆ng hloh”

Kiơ̆ đơ̆ng dôm tơdrong pơkăp tơgŭm tôm tong, axong jang drơ̆ng minh đơ̆ng Đảng păng Khul Kơpal teh đak, tơdrong erih kon pơlei La Ha tơ̆ apŭng Mường La tŏk bŏk đei tơplih ƀôh hơdăh, um rŭp tơring pơxĕl ‘nao tŏk bŏk oei ang bang tơ̆ dôm pơlei pơla groi kông, kon pơlei hlôi dar deh tơplih đon kơchĕng trong pơm jang, hơtŏk mŭk drăm, tơpôl kon pơlei tơguăt tơguăl păng vei răk tơƀăk mong kơjă joh ayŏ juăt jue, kơjăp minh đon lui kiơ̆ Đảng, atŭm jơhngơ̆m hăm jơnŭm pơgơ̆r tơring pơm pơdrŏng ăn pơlei pơla.