Bơ̆ jang sơng pơma dơnuh hăm kon pơlei, xek tơlang tơdrong tơkêng sơnăm 2023 hơnơ̆ng đei tơplih ‘nao, iŏk đei jơnei hơ iă, xek tơlang tơtom kiơ̆ tơdrong tơchơ̆t kơ khôi luơ̆t hăm 81,7% tơdrong tơkêng hơlơ̆k, 86,3% tơdrong tơkêng găh hơnih au gơ̆h tơlang. Mă lei, tơdrong kon pơlei năm hơyoh hloi tơ̆ rim Hơnih tơm, hơnih bơ̆ jang vă tơkêng, tơbăt tŏk kơtang, mă kăl tơdrong rim Hơnih tơm chă sơng pơma dơnuh kơtă hăm kon pơlei lăp jơnei 60% kiơ̆ tơdrong tơchơ̆t.

Kiơ̆ drơ̆ng mĭnh nơ̆r tơ̆ hnam hop akŏm tơm, rim kơdră tang măt Kuô̆k hô̆i ƀôh hơdăh, bơ̆ jang sơng pơma dơnuh hăm kon pơlei, mă đơ̆ng hlôi tơlĕch jang ‘lơ̆ng hơ iă hloh pơtêng hăm chăl hơdrol mă lei tơdrong jang kiơ̆ sơng pơma dơnuh hăm kon pơlei kiơ̆ pơkăp khei ‘năr kơ bơngai chĕp kơl mĭnh ƀar hơnih bơ̆ jang tim mă sơđơ̆ng pơtêng hăm tơdrong tơchơ̆t đơ̆ng khôi luơ̆t. Bơngai tang măt Điểu Huỳnh Sang, khul dêh char Bình Phước akhan, sơnăm 2023 măt bơngai konb pơlei năm truh tơ̆ hơnih bơ̆ jang teh đak năm tơkêng, athei tŏk 37,7% ..., kơ yuơ lơ loh, Khul kơdră teh đak kăl hơlen, pơm hơdăh dôm tơdrong sơng pơma dơnuh hăm kon pơlei, xek tơlang tơdrong tơkêng sơnăm 2023:“Kăl tơbăt hơdăh tơdrong tơm pơm ăn kơ tơdrong hơtŏk ‘măng năm, măt bơngai, tơdrong tơkêng păng khul tơpôl kon pơlei năm truh tơ̆ hơnih bơ̆ jang Teh đak vă tơkêng, athei. Adoi hơlen hơdăh dôm tơdrong pơm ăn, tơdrong tơkêng tŏk lơ, kăl hơlen hơdăh dôm tơdrong chă tơkêng ‘nao dơ̆ng păng dôm tơdrong tơkêng tim mă xek tơlang keh đang đơ̆ng dôm sơnăm hơdrol, dôm tơdrong tơkêng sek tơlang ưh kơ keh đang đunh sơnăm ..., vă đei trong jang xek tơlang hơdăh hloh”.

Bơngai tang măt Đàng Thị Mỹ Hương, khul Bình Thuận akhan, xek tơlang dôm tơdrong jang tim mă ‘lơ̆ng, tơdrong tơnap tap lơ̆m bơ̆ jang sơng pơma dơnuh hăm kon pơlei, xek tơlang tơkêng Hla bơar chih tơbăt bơ̆ jang ‘nao lăp jang đang lơ̆m athei păng tơlĕch trong vă jang:“Lơ̆m hla bơar tơbăt bơ̆ jang dăr lăng găh tơdrong au tơƀôh hơdăh mĭnh ƀar tơdrong jang tim mă ‘lơ̆ng păng tơdrong tơm pơm ăn ‘nohdôm tơdrong jang tim mă keh đang đơ̆ng lơ sơnăm hlôi đei tơƀôh hơdăh lơ̆m hla bơar chih tơbăt tơdrong jang đơ̆ng Khul kơdră teh đak tơ lơ sơnăm hơdrol, mă lei truh dang ei oei tim mă hơmet pơ ‘lơ̆ng keh đang ‘mơ̆i. Ĭnh hơpơi Kuô̆k hô̆i pơjing tơdrong tơchơ̆t sơkơ̆t hơdăh pơjao tơdrong jang hơdăh vă hrôih xek tơlang keh đang dôm tơdrong oei gei, tơdrong jang tim mă ‘lơ̆ng hơ iă”

Tơdrong tơbăt hơdăh lơ̆m jang sơng iŏk, iŏk jang păng xek tơlang rim tơdrong tơkêng ăn hơnih bơ̆ jang kơ Kuôk hô̆i, kơdră tang măt Kuôk hô̆i pơtruh ăn tim mă tơtom; mĭnh ƀar tơdrong tim mă hơlen lăng, pơm hơdăh găh tơdrong pơm ăn kon pơlei hơnơ̆ng ưh kơ lăp đon; mĭnh ƀar tơdrong hlôi đei athei iung jang mă lei tơlĕch jang hiơ hiơ̆, tơdrong xek tơlang oei pơdui đunh khei ‘năr, ưh kơ tơƀôh hơdăh trong xek tơlang ... Bơngai tang măt Phạm Thị Kiều, khul Dak Nông pơma hơdăh tơgop nơ̆r: “Tim mă đei tơchơ̆t kơhret găh tơdrong tơbăt hơdăh rim hơnih bơ̆ jang, khul jang ưh tơbăt tơblang hơdăh dôm nơ̆r athei ăn Khul kơdră tang măt Kuô̆k hô̆i chiu pŭ hơmet pơ ‘lơ̆ng ayơ kơna rim hơnih jang, khul jang đunh khei ‘năr tơlang hơdăh, ăp mă chă athei ngiơ ngiĕk ‘noh mă tơlang ăn. Đơ̆ng noh mă pơm ăn truh tơdrong lăng hơlen, pơrô̆, sơkơ̆t hơdăh găh tơdrong xek tơlang nơ̆r tơlang hơdăh đơ̆ng hơnih bơ̆ jang tim mă iung jang hơnơ̆ng kơna pơm ăn truh tơdrong pơchoh trong, tơlĕch trong jang, dăr lăng tơdrong xcek tơlang hăm rim tơdrong hlôi pơtruh hla bơar athei tim mă tơlĕch jang keh đang nhen hla bơar chih tơbăt tơdrong jang hlôi pơma truh”.

Tơblang hơdăh dôm nơ̆r tơtăm đơ̆ng bơngai tăh hla pơma tơbăt, Kơdră chĕp pơgơ̆r Hơnih tơm jang Dăr lăng Khul kơdră Teh đak Đoàn Hồng Phong tơbăt: hla bơar kơthơ tơkêng sơnăm 2023 tŏk kơtang; hla bơar tơkêng đei tôm rơvơn gơ̆h xek tơlang roi lơ ‘nŏh tă roi tơjur; tơdrong pơtruh ăn hla bơar tơkêng păng xek tơlang hla bơar tơkêng oei đei lơ tơdrong tim mă lăp. Păng pơtôch dăr lăng, lăng hơlen rim tơdrong tơkêng, tơdrong tơkêng đunh sơnăm xek tơlang tim mă keh đang, jang kiơ̆ Tơdrong tơchơ̆t 623, Khul kơdră Teh đak, Thủ tướng Teh đak hlôi pơrô̆ athei rim hơnih tơm, hơnih jang, tơring tĕnh koăng dăr lăng, lăng hơlen xek tơlang keh đang rim tơdrong tơkêng đunh đai tai sơnăm. Hơnih bơ̆ jang dăr lăng Teh đak hlôi iung jang hơdoi kơtang hăm Hơnih tơm Kŏng ang, rim hơnih tơm, hơnih bơ̆ jang, tơring iung jang dăr lăng, hơlen hơdăh, xek tơlang hơdăh 1.003 tơdrong glăi. Rim tơring dăr lăng, lăng hơlen, xek tơlang 856 tơdrong glăi jơnei 85,3%:“Lơ̆m khei năr kơnh, Hơnih jang dăr lăng Teh đak hơnơ̆ng pơchoh trong ăn Khul kơdră Teh đak, Thủ tướng Teh đak pơrô̆ athei rim tơring xek tơlang tơkêng iung jang hơdoi kơjăp hăm rim hơnih tơm, hơnih jang Trung ương akŏm xek tơlang keh đang rim tơdrong tơkêng đunh đai tai sơnăm tim mă xek tơlang keh đang hlôi đei hla bơar tơchơ̆t hơdăh xek tơlang trŏ ƀlep hăm tơdrong tơchơ̆t Khôi luơ̆t. Khul kơdră teh đak, Thủ tướng Teh đak athei Hơnih vei lăng kon pơlei dêh char pơm tơlĕch hla bơar tơbăt hơdăh pơtôch, lăng hơlen, xek tơlang kiơ̆ tơdrong gơ̆h jang đơ̆ng kơ dih vă rim hơnih bơ̆ jang Trung ương mưh đĭ sơng iŏk rim hla bơar athei pă đei pơtruh ăn tơ̆ tơring dơ̆ng bơih”.