Labaih 15 thun tapa, mikva urang pablei salih di Pasak pablei salih Cái Khế, ban sit Cần Thơ hu khik ramik sa kapul ngak pahla daong ka bhap bini saong daok pambak praong bruk ngak ini tui jalan “Hala tahak papaok hala tahak jang”. Lệ Hoa – urang vak di rayo sap ndom VN daok di bhum taneran kraong CL hu kadha vak brei thau bruk ngak di kapul ngak pahla kayua dom urang pablei salih di darak Cái Khế padang tabiak,, da-a mikva saong taong abih gauk tui pang:

Yaok bilan tal harei 30 bingun saka ia bulan, labik pablei brah di akaok khu chợ tạp hóa dalam Pasak pablei salih Cái Khế, ban sit Cần Thơ hu jaik 100 menuac mai taduan mek brah, mek pandap bri saoh. Yaok urang jeng hu sa baoh siphau daong sang kan piah taduan mek 10 kg brah haong ia tương, ia mesin atau menyek mbang.. Dom pandap nan yaom lac oh rilo min jeng daong pren hu ka dom sang kan kathaot daok glaih glar nduac mbang yaok harei.

Lac 2 dalam dom sang kan kathaot hu daong brei, amuk Nguyễn Thị Lan daok di khu vực 4 phường Cái Khế saong sa-ai Nguyễn Thị Năm daok di hẻm 68 (jeng lac phường Cái Khế, quận Ninh Kiều) brei thau ka bruk kan kandah di sang drei yau ini:

- Dahlak thun ini umo 71 thun, dahlak raong 3 taco metui, amaik metai, ame klaak nao, lac cháu ngoại raong mbiah tal harei ini. Dahlak daok sang pah, hu brei sổ nghèo. Urang ngak pahla brei di phường, phường ieu drei mai ini mek. Yaok bilan hu pluh kg brah yau nan biak uan tabuan lô.

-Pasang adei klaak nao tuk adei daok metain, adei hu 3 urang anek haong amaik taha. Anek kumei praong umo bahrau 13 thun, bac tal 5, thun ini tagok tal 6, dua anek sit oh ka hu nao bac. Adei nao ngak mbang pah, oh tani tanat. Yaok bilan hu dom sa-ai brei brah, uan tabuan lô. Thau dhar phor lô. 

          Hu thau, meng labaih 15 thun ini mai, kapul ngak pahla di mikva urang pablei salih di darak pasar Cái Khế hu padang tagok saong tuk camereip hu 5 urang. Dom sa-ai, dom amuk halan hatian rik yaok urang meng 10 tal 30 kg brah yaok bilan, bloh ba nao daong ka dom labik ngak pahla dalam ban sit yau Sang raong urang taha saong uraniah metui, labik raong uraniah metui atau bếp ăn từ thiện di sang iek ruak đa khoa. Bruk ngak pahla nan di mikva urang pablei salih hu pambak tal rilo pô sạp, pô quán, pô khách sạn daok jaik darak. Bloh urang likau tame, urang hu takik – rik takik, menuac hu rilo – rik rilo. Tal urak ini, kapul ngak pahla hu labaih 20 urang bhain hu mbaok saong jaik 100 urang karei rik daong tui mbang, tui hatai. Piah khik hu tani tanat bruk daong ka dom sang kan kathaot, dom sa-ai, dom amuk sahneng tabiak bruk brei sổ brah yaok bilan ka dom sang biak kan kandah hu karja palei tacei khan. Bruk ini ngak hu labaih 1 thun ini mai, ba bui sambai ka jaik 100 baoh sang.

Tui jalan ngak lac “Hala tahak pa-paok hala tahak jang”, dom urang pablei salih dalam kapul ngak pahla di Pasak pablei saih Cái Khế jeng sahneng dalam hatai lac: “bruk ngak di drei sit yau asar cuah dalam ribau ribau bruk siam di menuac sia brei ka bhap bini”:

       Ngak pahla, halan hatian ye tame ngak, ngak tal oh daok pren meng padeih. Drei kan, urang jeng kathaot, urak ini drei brei yaok bilan jeng hu daong pren ka urang.

         Dom hatai sahneng daong ka bhap bini di mikva urang pablei salih di Pasak pablei salih Cái Khế biak njauk iek praong. Nyu hu daong pren ka rilo menuac daok rambah rambup, pachreih ba dom urang nan kham merat yam tapa kan kandah, gaih glar dalam rai diuk./.