Raong glang kaya dalam sang ieu lac sa janih ngak mbang di urang di bhum palei Cam di palei Banriya Bỉnh Nghĩa, xã Bắc Sơn, huyện Thuận Bắc. Min tapi raong lamo kareik dalam wan ngak mbuan si tamuh tachauk nerat ka alam moi truong dan haong mbuan si tamuh jit. Ieu lac sau rang hu angan, ong Châu Quầy nao tal dom baoh sang di dalam bhap bini, jak ba mik wa panduol wan lamo tabiak langiu palei.
Hadei di dua mbang hu ong Châu Quầy jak ba, saai Thuận Ngọc Nét mboh njauk ba wan lamo tabiak truh palei, sa-ai ba labaih 10 anek lamo di drei tagok apuh raong. Tal ini, langiu di sang saai Nét, di palei banrya Bỉnh Nghĩa daok hu 15 baoh sang karei jeng panduol wan lamo tabiak truh langiu palei.
“ Ong Châu Quầy hu jak ba mikva kol dahlak dalam palei ba var limo kubao tabiak gah langiu…”
Tapa dom thun ngak padai, ong Châu Quầy mboh lac, mayah ngak tui pajaih klak oh mek hu yaom glaong. Kayua yau nan ye, ong jak hu 5 baoh sang karei tut tangin tame ngak padai tui jalan hữu cơ. Tapa 2 mbang musim, padai hu yaom glaong dut tui meng dalau. Gam haong pajaih yaom glaong ye Đài Thơm 8, Q5, yaok hecta padai hữu raba labaih 30 triệu đồng.
Piah khik ramik, daong jaga ialamu di bangsa Cam, ong Châu Quầy hu nao tal dom baoh sang urang main, jak ba gauk duah jalan ngak weik ngak gac dom ginang baraneng urang bangsa Cam. Langiu di nan gait daok dang tabiak jak bag auk rik pataom yaok rituh triệu đồng piah pasiam danaok sang jam ma-ah bhap bini dalam palei ka nyu siam makre jang. Langiu di nan, ong Châu Quầy daok jak ba padang kampulan ginang caing dalam palei brei pandar ngak rija raya di bhum palei. Rup di gait jeng dang pato dom tal bac ragam ginang ka dam dara adei gauk palei:
“ Anek kamuan hu mbaok tame gru tong giang, yuh saranai gap mbiah piah khik veik…Dahlak sahaneng kham merat ngak habar piah khik ramik ilamo bangsa drei. ”
Palei Banriya Bỉnh Nghĩa, xã Bắc Sơn, huyện Thuận Bắc hu 840 baoh sang, gam haong labaih 4.600 pabah mbang. Mayah lac thun 2023, urang kathaot dalam palei ralo tagok 250 baoh sang ye tal ini daok 100 baoh sang. Hu yau nan mai meng yawa prein daong ba di dom urang ye ong Châu Quầy. Ong Lượng Thanh Nhứt, Phó bí thư Đảng ủy xã Bắc Sơn brei thau lac:
“ Ong Châu Quầy jak ba mikva ba var limo tabiak truh labik daok ngak palei pala hu hacih sa-at . Ong lac urang ngak mbang pala drak naih joi…”
Gam haong prein yawa buh ba ka bhap bini palei pala, thun 2022, ong Châu Quầy hu Chủ tịch UBND tỉnh Ninh Thuận pok mayaom kayua hu buh prein tame ka patagok kinh tế - xã hội dan haong daong jaga atnitanat saron mbon di bhum palei./.
Viết bình luận