Kham merat luac 12 thun, ong Nguyễn Thái Hiệp hu bac tamat THCS, THPT blaoh tamat đại học. Urak ini ong Hiệp daok ngak Phaok akaok Kapul Pachreih bac xã Phú Lâm.

Ngan haong dom urang ngak bruk pachreih bac di huyện Tân Phú, ong Hiệp biak lac sa kreih camin hadah ka bruk bac megru luac raidiuk. Thun 2001, anek likei kacua bac tal 6, ong hu pilih ruah ngak Akaok mban lambaok amaik ame anek saih di sang bac. Sahneng mboh ilamo di drei daok biar, thun 2003, ong Hiệp hu tut angan nao bac pambak danak dak THCS saong bac camerep meng tal 6.

Thun 2011, ong pakacah THPT saong padeih bruk bac 1 thun, blaoh hadei nan nao bac đại học. Tal thun 2017, ong hu dalam tangin bằng đại học anak bruk katuak drei di rilo menuac. Oh thei sahneng lac ong meda kham merat tui bruk bac hu tal yau nan. 

Ong Hiệp hadar gilac veik tukvak rilo kan kandah nan: “Tuk harei jalval haong bruk ngak mbang, duah jien ka sang, gilac caik tukvak piah ngak bruk pachreih bac di puk palei, yaom lac yau nan, dahlak jeng oh var bruk bac megru. Dahlak kham merat caik tukvak ka bruk bac di tuk melam. Ngak miet blaoh jeng bruk pachreih takre. Bruk bac megru jeng ngak ka anek menuac drei dak harei dak pachreih bac megru jang”.

Tukvak nao bac đại học, yaok adit ong bac dalam 3 harei: harei jip, harei sanacar saong harei dit. Nan lac tukvak biak kan kandah haong sang ong, kayua tuk nan anek likei praong di ong jeng bac đại học, 2 urang anek patui di nan daok bac phổ thông. Kayua pasang nao bac, amuk Lại Thị Thắm, diuk ong Hiệp, ngak bruk sang rilo jang.

Thun 2002, Kapul Pachreih bac xã Phú Lâm hu padang tabiak, ong Hiệp lac sa dalam dom urang camerep hu mbaok tame bruk kapul di xã, daok dalam mban chấp hành lâm thời. Thun 2006, ong hu pilih ruah pok ngak Phaok akaok Kapul Pachreih bac xã saong ngak bruk ini tal tuk ini. Tal thun 2017, tuk hu bằng tốt nghiệp đại học, ong Hiệp gam ngak Phaok akaok Kapul Pachreih bac gam hu pilih ruah ngak Phaok akaok Ủy mban MT Negar VN xã.

Labaih 20 thun ngak bruk pachreih bac di palei, ong Hiệp hu rik prein sangka ka bruk pachreih bac, pachreih megru, padang xã hội bac megru di puk palei. Haong dom anek saih sang kan kandah, ong kham merat duah jalan daong ka dom adei hu nao bac, tuk ye pandar jien di ong, tuk ye jak ba dom urang menuac daong jien. Tuk nao jak ba urang menuac daong jieng, ong Hiệp hu baoh siphau hu mbaoh tangin di UB bhap bini xã, hu sarak brei adat hatai di xã nao jak ba saong tuk halei jeng nao sa kapul menuac piah brei mboh, tantu, cambaih laih ka dom pok jien hu rik tame.

Daok bruk ngak mbang di sang, ong Hiệp hu dak tame angan urang ngak nong naih joi. Tukvak sang gaok kan kandah di abih, ong Hiệp nao pablei ka-rem, pablei ka-phe. Lavik lavik harei, sang ong peih hu kuan praong, sang hu labaih jien padai, drap-ar piah raong anek mbang bac.

Nai gru Nguyễn Tùy Ý Anh, Phaok akaok Sang bac mầm non Thanh Sơn (huyện Tân Phú) brei thau: “Ong Hiệp lac urang jakar yau camin, ndom nao gam haong ngak, abih di nyu nan lac dalam bruk eng bac saong bac megru luac rai. Hatai bac megru ini hu pambak tabiak tal dom urang jaik taphia. Dahlak jeng hu hatai caong bac hadei di bac đại học piah duh ka bruk ngak di drei min klaih klaoh, meng kreih camin di ong ngak ka dahlak kham merat ngak ka pahu bruk ngak ini”.

Ndom ka rup di drei, ong Hiệp khan lac, ong oh sahneng lac bruk bac atau bruk ngak pachreih bac di drei lac kadha jak jieng bo tok caong hu rik prein ka puk palei. Bruk pok meyaom haong ong lac bruk pachreih tui di mikva, puk paga./.