Rilo thun tapa, sang ong Điểu Cu tuk halei jeng ba akaok nao dahlau dalam patagok bruk ngak mbang. Meng bruk pandar jamraik mac moc tame bruk pala raong bein phun, sang ong tuk halei jeng hu jien tametani tanat.

Meng ilamo bac megru hu dalam pala ngak, ong Điểu Cu pambuak haong mBan Pasang iek palei jak ba rahra sangka patagok bruk ngak mbang, pablei salih hu siam lagaih kinh tế glaong. Ong daok bhian jak ba rahra kham merat salih bruk ngak, patagok bruk ngak mbangpala drak, pandar ilamo bahrau tame raong glang athur saong pala dom pajaih bahrau hu kein laba glaong.

Ong Điểu Thức lac sa dalam dom urang ngak tui panuac kakei di taha palei ong Điểu Cu piah salih bruk ngak hu jak jeng saong hu jien tame tani tanat labaih 5 triệu đồng sa bilan. Ong Điểu Thức brei thau, dahlau daih tuk oh ka salih tapa bruk kuah katak cao su, jien tame di ong biak kan kandah. Pang tui panuac kakei di taha palei nao bac megru bruk kuah katak cao su, ong ngak tui saong hu jien tame tani tanat yaok bilan.

Sang sa-ai Điểu Thâm dahlau daih lac sa dalam dom sang kan kandah di palei. Meng tuk hu taha palei jak ba nao ngak kong nhan ye jien tame di sa-ai hu tani tanat jang dahlau. Sa-ai Điểu Thâm brei thau, dom thun jaik ini, taha palei Điểu Cu tuk halei jeng pato tacei rahra pandar jamraik mac moc saong ilamo bahrau tame bruk pala drak, raong glang piah patagok năng suất, salih bruk ngak ka lagaih. Meng nan, sa-ai salih bruk ngak saong hu raidiuk tani tanat jang dut haong dahlau daih.

Palei Phu Mang 1 rilo meng lac rahra bangsa takik daok, raidiuk daok rilo kan kandah. Nan ye, ong Điểu Cu thau cambaih ka raidiuk, daok dang dalam bol bhap bangsa drei nan ye hu thau jang dalam bruk jak ba mikva patagok bruk ngak mbang, pala drak, khik ramik, patagok adat cambat siam mekre, klak nao dom adat cambat oh siam, tui jalan diuk rai hu siam mekre dalam ndam likhah, ndam metai jeng yau harei pataom…Langiu di nan, ong Điểu Cu daok kham merat roh duah, brei thau cambaih adat, jalan ngak, sarak di Ndang, Karja piah pathau khan, jak ba saong peih bruk ka bol bhap rahra bangsa takik ba gauk ngak. Gam haong  nan, ong jeng pathau khan piah rahra mikva bangsa takik paglaong bruk pasang iek, pacang caga bruk “diễn biến hòa bình”. Abih di nyu nan lac, ong hu kakei mikva caik hatai sangka  haong dom bruk pagam pambak tame bangsa, agama, tự do dân chủ, nhân quyền piah pachuh pajarak ngak neh rabha bruk gul pataom praong abih bangsa, ngak srau kadau chính trị saong siam mekre salamat xã hội…

Ong Hoàng Văn Lư, Akaok Ủy ban Mặt trận Negar Việt Nam xã Long Hà brei thau, hu bruk pilih ruah di rahra pak palei, ong Điểu Cu kham merat paglaong bruk ngak di sa urang taha palei yau kreih camin dalam bhum mikva bangsa takik. Ong hu pathau khan, jak ba mikva, ngak siam, jalan ngak di Ndang, sarak, adat hukum di Karja. Ong nao dahlau dalam bruk patagok bruk ngak mbang jeng yau jak ba mikva kham merat patagok bruk ngak mbang, patruh iek, patrun kathaot, khik kajap siam mekre salamat di bhum palei.

Lac urang taha palei, dom thun tapa, ong Điểu Cu hu dom pakat karja huyện, tỉnh Bình Phước pok meyaom lac kreih camin hadah dalam bhum rahra bangsa takik saong bhum ceik tukvak 2021 - 2023; urang bangsa takik yau kreih camin di tỉnh; urang menuac hu buh rilo prein rik daong dalam dak padang bruk gul pataom praong abih bangsa tukvak 2019 - 2024…