Mai ravang sang ong Thanh, maong tame baoh sang praong, siam, oh thei sahneng po sang lac diuk pasang thương binh umo labaih 70 thun. Taphia cavan tea pandiak, ong Thanh khan ka tukvak ong tame bruk mesruh metak saong dom harei camereip ngak kinh tế bak kan kandah, glaih glar…

Menek tabiak saong praong tagok di tỉnh Quảng Ngãi dalam sa baoh sang hu ilamu cách mạng. Thun 1973, ong tame ngak lin saong hu pato pasram di Sư đoàn 372, huyện Sơn Tịnh, tỉnh Quảng Ngãi. Thun 1974, ong njauk rambus saong hu ba tame iek glang di sang iek ruak huyện Sơn Tịnh. Hadei di sa tukvak taong ruak, ong mai veik haong ayut sahabat, hu mbaok tame veik bruk mesruh. Hadei di tuk gah Meraong negar hu peih paha, ong jeng daok ngak lin. Tal thun 1978, ong padeih ngak lin, mai vei palei ngak kinh tế saong tok diuk.

Mai veik tuk angaok rup hu rilo labik njauk rambus, lac thương binh 4/4 saong njaom jru mek hóa học, ong Thanh dang anak rilo kan kandah, min ong oh taduan lah. Thun 1985, sang ong tame Bình Phước padang mbang ngui. Meng hatai sahneng lac “jayah hu kol khamang blaoh, urak ini brei jayah eik lipa kathaot rambah”, ong haong diuk tuk halei jeng sahneng duah jalan cakrok bruk ngak mbang kinh tế. Meng tari taring saong tuk halei jeng duah thau ilamu kỹ thuật bahrau, khang hatai salih phun pala, athur raong piah ba mai kein laba glaong, nan ye kinh tế sang ong dak harei dak tagok. Urak ini sang ong hu 3 ha cao su, pa-ok blait saong 2 ha durian, ba jien tame yaok thun hu jaik 1 tỷ đồng. 

Ong Thanh brei thau: “Kham merat yam tapa kan kandah, yam tagok tabiak trun kan kathaot, ngak kaya mada, daong ka dom menuac kan kandah jang drei, lac bruk di urang lin Wa Hồ dalam saman sron mbon. Nan ye dahlak hulin tuk halei jeng kham merat cakrok kinh tế, paglaong jien mek tame piah pasiam raidiuk baoh sang”.

Langiu di ba akaok nao dahlau dalam cakrok kinh tế, diuk pasang ong daok abih drei dalam dom bruk ngak di palei yau ye hu mbaok tame kapul urang dahlau daih ngak bol in xã, “urang dahlau daih ngak bol lin ngak mbang pablei salih naih joi”, “urang dahlau daih ngak bol lin daong gauk patrun kathaot, ngak kinh tế naih joi”… piah daong ka dom urang dahlau daih ngak bol lin, abih di nyu lac dom menuac kan kandah, kurang phun jien ngak mbang. Taphia nan, ong daok hu mbaok tame dom bruk ngak pahla saong bruk padang palei pala bahrau, yau ye daong kadung jien pacang caga jit Covid-19 xã 30 triệu đồng; daong padang ngak sang “bia” hadar dom AHLS xã 22 triệu đồng...

Ong Nguyễn Văn Thành, akaok kapul urang dahlau daih ngak bol lin xã Đồng Tâm brei thau: Yaom lac thương binh min ong Thanh haong sang ong tuk halei jeng ba akaok nao dahlau dalam dom bruk ngak di kapul urang dahlau daih ngak bol lin xã, abih di nyu lac dalam cakrok bruk ngak mbang kinh tế, hu bhap bini saong ayut sahabat anit ranam, ngak tui. Ong Phạm Ngọc Thanh lac kreih camin ngak tui panuac Wa pato “Thương binh jaoh jo min oh klaak saoh”, oh huac kan kandah, glaih glar, kham merat yam tagok, jayah di taong abih gah.

Di dalam huyện Đồng Phú daok hu biak rilo kreih camin hadah di rilo gah, rilo bruk. Dom urang nan, lac lambaok ka sa rairah anh hùng, dom menuac haok ralow darah, var klaak rup drei brei ka bruk peih paha bangsa. Tuk pan phao mesruh, urang oh huac matai lahik, abih hatai ka taneh ia. Tuk mai veik haong raidiuk yaok harei, urang jeng kham merat yam tapa taong abih kan kandah tavak tavaiy piah hu prein dak padang puk paga, palei negar dak harei dak kaya meda, khang kadang./.