Sa-ai Đinh Văn Phâng hu jaik 10 thun hu mikva pilih ruah ngak Urang hu angan je di bangsa Ba Na daok di palei Hà Nừng, xã Sơn Lang, huyện Kbang. Yaok panuac ndom saong bruk ngak di sa-ai Phâng tuk halei jeng hu rahra palei Hà Nừng je tame, pang tui. Langiu di bruk pathau khan ka mikva ngak siam jalan ngak, sarak di Đảng,  hukum di Karja, sa-ai Phâng daok hu jak ba mikva palei Hà Nừng ba gauk khik ramik ilamo meng kal siam gheih di bangsa Ba Na yau kong caing, tamia xoang, dom adat, harei pataom meng kal caik rai…

Meng hu yau nan, palei Hà Nừng jieng labik hadah di gah khik ramik ilamo taih kong caing di xã Sơn Lang. Dalam nan, sa-ai Phâng lac sa urang yau kreih camin, hu labik dang praong dalam bruk pato taih kong caing. Sa-ai Phâng jeng jak ba mikva ngak dom bruk ngak meng kal yau pak, ngak alat ragam bangsa…Meng nan, bol bhap rahra palei Hà Nừng biak jie tame, anit ranam saong nao gam haong sa-ai dalam dom bruk ngak ilamo, adaoh tamia, taih kong caing.

Sa-ai Đinh Mỡi, urang jakar di Pasak Ilamo, khau tin saong thể thao huyện Kbang brei thau: Meng hu sa-ai Phâng, kol dahlak pataom hu rahra palei jeng kapul kong caing nao parang me-in dalam dom harei ngak adat, harei pataom di puk palei saong dalam tỉnh Gia Lai. Gam haong nan, sa-ai Phâng hu daong biak rilo piah puk palei meyaih khan, khik ramik ilamo memg kal di bangsa Ba Na di dom palei bhum bangsa takik.

Dalam dom harei ngak adat praong di mbuon palei Ba Na di huyện Đak Đoa, tuk halei jeng oh kurang hu bruk di taha palei, gru ieu yang. Di Adat ieu hajan di palei Hnap, xã K’Dang, huyện Kbang, taha palei A Ngop, lac urang hu angan jie, menek thun 1958 dang ngak adat. Piah khik ramik adat meng kal, taha palei A Ngop pato tacei mikva meng bruk rami ramik pasiam veik, bah ramik tanjaoh ia, kaya pandap ngak yang yau alak tapai, drei lamo, kabao, pabui, menuk…blaoh tal bruk ngak adat. Bol bhap rahra pang tui taha A Ngop piah ngak dom adat hu makna praong dalam raidiuk duh yang mebhang di bangsa drei.

Di huyện Chư Pưh, nghệ nhân, Urang hu angan jie Nay Tek, menek thun 1969 danei angan haong bruk “duah suan caing lahik”. Meng hu ilamo saong tari taring pathram megru, ong Nay Tek jieng sa urang paoh kong acing naih joi di palei Djriêk, ban sit Nhơn Hòa. Labaih 8 thun tapa, ong Tek hu “pabak apui” pachreih tal rilo rai hadei dalam palei, daong khik ramik ilamo meng kal siam gheih. Dalam harei pataom uan bui padai bahrau, uan bui sang rong bahrau, dom harei pataom pakacah, adaoh tamia, taih kong caing, ong Tek tuk halei jeng caik tukvak rami ramik dom bruk, yau ye: sang rong, sang kubo, mặt nạ saong pachreih ba dom urang dalam kapul parang me-in abih drei.

Abih di nyu nan lac, ong Tek jeng lac sa urang pasiam veik caing naih joi di huyện Chư Pưh. Piah khik dom sap yava karei di ceik glai Tây Nguyên, ong Tek hu caik tukvak nao grauk mbuon palei pasiam veik dom kong caing suan sap yava. Tuk pasiam hu baoh caing, khik gilac veik “suan yava” caing, lac sa bruk bui sambai chreih chrai kayua pabak hu hatai takre kong caing di ong Tek.

Urak ini, dalam tỉnh Gia Lai hu 955 Urang hu angan jie, dom thun tapa, dom urang nan tuk halei jeng kham merat rik daong pren meng rilo bruk piah padang mbuon palei trei sir, haniem phol. Meng nan, raidiuk mbang ngui, daok dang di rahra bangsa takik dak harei dak hu paglaong, mbuon palei trei sir, haniem phol.

Ong Trường Trung Tuyến, Phaok Akaok mban Bangsa tỉnh Gia Lai brei thau: Tỉnh tuk halei jeng caik hatai sangka, ngak hu siam dom sarak ka Urang hu angan je; peih pato pathram, paglaong ilamo piah dom urang nan pathau khan, jak ba di puk palei, daong patagok kinh tế - xã hội, khik ramik siam mekre, dak padang puk palei gheih mekre, ginup meda./.