Ong Y Sanh Niê, bangsa Ê Đê daok di buôn Pan, xã Ea Yong, huyện Krong Pắc, tỉnh Đắk Lắk pala kopi, amraik kalu meng lavik, min tapi baoh karaoh mek hu oh glaong. Thun 2011, ong Y Sanh Niê khang hatai buh prein tame brei pablak pala phun durian dalam bein kopi. Durian mbuan sia pala, tapi min oh thau ieik glang nyu mbuan sia matai kayua bimau ruak, atau tukik baoh, kurang yaom kaom. Gam haong taneh bein praong 1,7 ha, hu blaoh 1.400 phun kopi dan haong labaih 400 gang amraik kalu, ong Y Sanh Niê pala pablah 130 phun durian pajaih Dona. Tuk durian praong tagok pacang halui brei laar ka phun kopi. Dom thun blaoh yaok thun mek hu mangaok 10 tấn durian, 2 tấn kopi, 1,5 tấn amraik kalu. Ong Y Sanh Niê brei thau lac, hadei di bayar dom jien blei khak, jruk caga phun pala, yaok thun duah hu jaik 1 tỷ đồng.“Drei oh pala barat janih durian taeng, pala pablak haja. Drei khik janih ralo phun ralo anek. Thun ini hu labaih 10 tấn durian, mek tui yaom masa ini duah hu meng 600 – 700 triệu đồng, kopi hu 2 tấn pablei hu jaik 200 triệu, daok amraik kalu ka oh pablei.”

Ong Y Mi Êban daok di buôn Ea K’mat, xã Hoà Đong, huyện Krong Pắc jeng pala amraik kalu dalan bein kopi. Hadei di jak gauk pala durian ralo khang, ong Y Mi Êban blei 40 phun durian pajaih Dona mai pala pabak dalam bein. Jeng pala pablak haong phun kopi haong amraik kalu. Urak ini ong paralo tagok 120 phun durian, khik 900 phun kopi dan haong 200 gang jamang amraik kalu di dalam 1,4 ha bein. Ong Y Mi Êban brei thau lac, bein pala pablak ini brei mek hu jaik 1,5 tỷ đồng yaok thun.“Yaom lac sa urang đảng drei njauk dang akaok nao dalau piah mikwa ngak tui, kham marat bac magru patagok ekonomi kinh tế kagar sang danaok drei. Tuk pala durian, jeng oh bih ralo phun nyim masraiy gilang jien dan haong bac magru ilamu piah pala. Thun ini mek hu labaih 15 tấn, gam haong yaom pablei hu labaih 80 nghìn đồng/kg di bein, duah hu labaih 1,2 tỷ đồng, oh ka kuria jien mek tame meng kopi haong amraik kalu jeng mboh karo”

Langiu di ngak kaya mada ka sang danaok di drei, dom ong Y Sanh Niê dan haong Y Mi Êban tuk halei jeng brei hatai di drei daong mikwa rahra puk paga palei pala thau gah ilamu ieik glang phun pala, daong phun jien, phun pajaih, anek raong … piah patagok kinh tế - patruh eik patrun kathaot. Ong Y Niêm Niê – Akaok Jabat ngak nong saong patagok palei pala huyện Krong Pắc brei thau lac, ong Y Sanh Niê haong Y Mi Êban jeng ieu lac urang nđảng urang nao dahlau di dalam patagok ekonomi ngak mbang patruh eik patrun kathaot. “Di huyện Krong Pắc hu ralo urang đảng ngak mbang naik joi, dalam nan hu ong Y Sanh daok di xã Ea Yong dan haong ong Y Mi daok di xã Hoà Đong. Di dalam mbang nyaom biai bac magru ilamu kỹ thuật ngak nong brei ka mik wa urang bangsa takik, kon hulin dahalak tuk halei jeng yaih khan tal bruk ngak mbang di gait brei ka mikwa bhap bini bac magru ngak tui, gam patagok kinh tế patruh eik patrun kathaot.” 

Bruk khang hatai pala pablak durian dalam bein kopi yau ye sang ong Y Sanh Niê dan haong Y Mi Êban di Krong Pắc ba patagok ekonomi ngak mbang jak jeng, mek hu jien ndo ralo tame sang. Gait oh sa janih patruh eik patrun kathaot karo blaoh daok hu jeng sa binguk hadah, jaik taphia brei ka mikwa bhap bini palei pala bac magru ngak tui./.