Hu akaok Kapul Lien hiep urang kamei xa Phan Hoà, huyen Bắc Bình, tinh Binh Thuan yaih khan, khol hulin hu nao tal sang di saai Lư Nữ Mộng Hồng, sa urang kumei Cam daok di palei Aia Memih (Bình Minh). Dang ieik mboh sang pakat 4 gheih siam, hacih saat, mblang praong hu ralo phun hijau, khol dalak hulin thau lac gait hu ralo kham marat dalam bruk uak rup tagok dalam rai diuk di saai.

Dalau diah raidiuk di diuk pasang saai susah kan daman ralo janih. Sang kathaot blaoh daok ralo anek, jien duah tame mai meng nao apah nao ngak nong oh ganap mbang huak harei harei. Langiu di nan, urang Cam tui adat kumei yau nan ye dalam bruk praong sit, kinh te di dalam sang cuak abih di angaok bara saai. Taneh 2ha yau ye ngak adat sang kamei, diuk pasang saai ngak padai oh brao oh rok.

Tuah ka sang saai mai meng hu Kapul ngak Nông haong Kapul Lien hiep urang kamei xa Phan Hòa daong brei ka saai masraiy jien phun di Gilang Mbang ngak Nong piah ba tame bruk ngak mbang raong glaong. Hadei di hu masraiy jien, diuk pasang di saai salih 3 sào taneh hamu tapa pala baoh naga thanh long, blaoh blei lamo mai raong. Kayua thau bac magru urang pala raong dalau yau nan ye 3 sào taneh naga di saai chị Mộng Hồng hu baoh, hu yaom… Yau nan sang saai Hồng hu jien tame karo jang, rai diuk dalam sang mboh kan mbe. Hadei di nan, bruk ngak padai jeng hu tagok kayua ngak hu 3 mbang dalam thun, padai mek hu jeng glaong jang dalau ralo. Saai Lư Nữ Mộng Hồng, palei Aia Memih (Bình Minh), xa Phan Hoà, huyen Bắc Bình, tinh Binh Thuan lac:

“Dua diuk pasang dahlak hu 4 anek, jeng kan kandah, mesraiy jien piah ngak hamu, ngak thanh long, raong limo, peih kuan salih piah hu patagok.”

Sajanih njauk pok mayao di sang saai Mộng Hồng, nan ieu lac hatai kham marat ngak mbang raong anek nao bac jeng bruk. Saai Hồng tuk halei jeng caik dalam hatai, sa jalan hu ilamu meng hu rai diuk trei sil, yau nan ye saai Hồng oh huac kan daman, rambah rambeip ngak mbang duah jien raong anek nao bac tan labik tal dhua. Tal ini, 2 urang anek di saai hu sa urang jeng bác sỹ, 1 urang jeng sỹ quan dalam bon lin. Daok anek taluac daok bac. Sang bahrau ngak biak gheih siam mai meng jien pataom hu di ngak mbang blei salih. Muk Kim Nữ Trầm Ngâm, Akaok Kapul Lien hiep Urang kamei xa Phan Hoà, huyan Bắc Bình brei thau:

“Tui bruk maong mboh di kapul urang kamei xa haong sa-ai Hong lac sa-ai Hong raong 4 anek, jeng kan kandah yau nan min sa-ai Hong tuk halei jeng hu mbaok tame bruk di kapul urang kamei.”

Saai Hong daok lac sa urang dang akaok kapul tổ tự quản dang ieik eng, saai Hồng daok piah ralo masa tuk wak nao jak ba brei thau dom jalan sarak di Đảng, Karaj tal mikwa bhap bini dalam palei, daong mikwa thau sarak karja, hu kum piah ba tame bruk ngak daok dang brei ka siam makre. Dom thu blaoh, saai Hồng jeng jak ba dak wah brei ka mikwa thau caga langik tasik alam môi trường, jak ba mik wan gak mbang patagok kinh tế dalam sang, raong ba pato takai anek bik ka siam, dakwah anek saih juai klak bac magru... mikwa dalam palei jie tui. Chị Lư Nữ Mộng Hồng ndom lac:

“Tuk nan drei rambah lo, amaik ame kathaot lo oh hu raong nao bac, nan diuk pasang dahlak kham merat raong anek piah hu hadah ka harei hadei.”

Bui sambai suka di saai Mộng Hồng urak ini kayua hu mboh anek bik di drei bac magru njauk hatai thei jeng naih jeng joi jeng urang kein raba ka rai diuk. Rup di saai jeng kham marat piah ngak siam bruk dalam baoh sang, gam buh prein daong tame ka raidiuk. Saai Hồng ieu lac sa urang kumei Cam hu glao akaok dah krah, kham marat truh ieik dan haong raong anek jeng baoh kreih camin hadah bri ka urang Cam dalam palei maong ieik bac magru haong ngak tui.