Amuk Kiều Thị Khuê ieu lac sa urang gru pato hu labaih 35 thun di ini, hadei di tuk padeih pato meng kreih thun 2022 amuk hu brei pok ngak Bi thu Chi bo palei Katuh (ieu lac Tuấn Tú). Gam tui di nan, amuk Khuê daok hu pakat uy, kanja saong labik rahra jia tame pok ngak Urang hu angan je di bhum palei.

Ngak bruk bahrau, amuk Khuê kham marat pambuak haong dom pakat uy, kanja, Mat tran negar saong dom kapul nyaom chinh tri - xa hoi pathau khan dom jalan ngak, sarak di Ndang, sarak di Kanja ka bruk cak rok patagok kinh te, xa hoi bhum mikva bangsa takik. Amuk ba akaok nao dahlau dalam bruk ngak kinh te naih joi saong kuhria caga ka mikva salih dom janih phun pala, athur raong, pandar dom siam gheih di ilamo - ky thuat tame bruk ngak piah paglaong kein lagaih dalam bruk ngak mbang, duah jien, daong ka rilo baoh sang mikva bangsa Cam tabiak truh kan kathaot, yam tagok ngak kaya mada.

Piah paglaong raidiuk di mikva, amuk Kiều Thị Khuê hu gam haong HTX dịch vụ tong hop Palei Katuh oh padeih jak ba yaok urang peih praong mblang taneh pala janih njam “njam putao - ribung tay hijao” tui jalan ngak mblang hamu praong, ngak patagok mblang taneh pala janih phun ini urak ini tagok labaih 35ha. Lac sa bhum taneh do cuah min kayua bruk khang hatai salih janih phun pala saong pandar ilamo barau brei pruh ia patak pataom, phun ribung parang hijao jeng lac janih phun pala rilo, ma-aom hijao dom bhum taneh bhian lac tok hu phun darui dalah lasa tamuh meng dahlau deih.

Langiu di nan, amuk Kiều Thị Khuê daok kham marat jak ba dom sang urang nong pala veik rilo janih njam patam, padai, cak rok bruk raong pabe, pabo, limo. Urak ini, palei Katuh mboh trun biak rilo dom baoh sang kathaot saong jaik kathaot, tok daok 10 baoh sang jaik kathaot saong 6 baoh sang kathaot, jeng lac bhum palei hu dom baoh sang kathaot bier abih di xa An Hải, huyen Ninh Phước.

Lac urang hu angan je di bhum palei, amuk Kiều Thị Khuê kham marat jak ba rahra alin hadiah taneh, buh prein tame padang ngak palei pala bahrau. Pagap yau jalan tame bhum taneh ngak mbang Bầu Sình pambuak meng palei Katuh (ieu lac Tuấn Tú), xa An Hải tal palei Cuah Patih (ieu lacThành Tín), xa Phước Hải rilo thun ka oh hu ngak pasiam, dalam thun 2023, amuk Kiều Thị Khuê hu dang tabiak jak ba 7 baoh sang daok di dua gah jalan alin yaok ratuh mét vuông taneh saong jak ba phun jien pah jammariak patapak, lam taneh piah peih praong jalan mbak. Piah ka bhum palei ngak salah dom asal kadha dalam bruk padang ngak palei pala bahrau paglaong, amuk Khuê gam haong pakat uy Chi bo, Mban khik ramik puk palei saong dom kapul nyaom jak ba rahra rik tame 455 trieu dong ngak paga pacang di mblang caoh mbar; jak ba rahra saong doanh nghiep rik tame, ramik ngak 108 baoh gom truac hadah jalan tuk melam.

Ngan haong asal kadha jalan ngak lac “nao tal yaok jalan praong, jalan sit, paoh yaok baoh sang”, amuk Kiều Thị Khuê oh huac kan kandah, glaih glar, nao tal yaok baoh sang piah pathau khan, jak ba. Kayua bruk abih hatai di amuk, abih tih dom baoh sang dalam puk palei hu kham marat hu mbaok tame padang ngak baoh sang ilamo. Oh padeih di nan, amuk daok lac urang jao apui, daong ka rai ranaih thau cambaih jang ka dom adat cambat tanarakun ilamo di bangsa.

Ngan haong amuk, hatai anit ranam puk palei lac prein khang praong dui pachreih piah ka amuk oh padeih kham marat, amuk brei thau lac: “Di bruk gam ngak mbang, gam sangka ka anek taco hu meblah abih tukvak min tuk mboh mikva thei jeng jia tame saong caong maong tame drei rilo yau nan, dahlak sahaneng lac njauk ngak biak siam. Dahlak caong maong rik tame hasit prein yava di drei piah ka puk palei dak harei dak cak rok patagok”.

Ngan haong dom kham marat, dom bruk rik prein tame ka rahra di ini, amuk Kiều Thị Khuê hu pakat uy, kanja bhum palei alin harak pok mayaom. Bahrau ini, amuk Khuê hu hadah mbaok mata hu angan tame Danak dak “labik pambak di puk palei” mbang ka II thun 2024 saong hu jao Harak pok brei angan pok mayaom Urang hu angan je bhum tapen negar, bhum tasik kaoh pulao kayua Tap chi Cong san, Mbang Thuong truc Uy ban Trung uong Mat tran Negar Viet Nam saong Bo Tu lenh Bol lin Bien phong pambuak gauk peih ngak di Ban ine Ha Noi.