Di Quang Ninh, urang bangsa Tay lac bangsa hu rahra rilo abih dang di ka klau hadei bangsa Kinh saong bangsa Dao. Daok di huyen Bình Liêu, bhap bini urang bangsa Tày hu jaik 14.000 urang.

Dalam raidiuk ilamo di urang bangsa Tày daok di Bình Liêu, adat palakhah oh lac sa angan makna di dua gah baoh sang, blaoh nyu daok ieu lac sa bruk piah sa bol bhap rahra mai uan bui haong gauk, maong iek saong tadhau ayuh haniem phol ka diuk pasang. Sa adat palakhah bhian hu ngak tapa dom adat karei di gauk hu danak tantu cambaih laih, ndung bak ilamo siam gheih: meng bruk nao sua tangi mek căn duyên patih; caik hala paneing mek talei rohim bhong meraih; duah baoh sang gaok gauk; kuhria harei ngak lakhah tal dom adat karei dalam harei saong puac adat lac bruk rah tabiak hadei di adat.

Abih di nyu nan lac, adat tapai mbaok di urang bangsa Tày daok di Bình Liêu tok hu di baoh sang gah likei. Kamei matau diuk srap gap dahlau meng 300 tal 400 blah tanyak, caik dalam pakuang saong sa baoh kaong pariak. Hadei palakhah blaoh, kamei matau daok taphia amaik ame pasang di pabah pambang praong, jao brei tanyak ka but pajaih di gah pasang tui panuac yaih khan di amaik pasang. But pajaih gah pasang, meng urang praong di abih tal urang sit di abih, danak ngak adat ini, tadhau ayuh ka dua urang saong alin jien pauan truh buh tame pakuang. Kamei diuk brei alin tanyak uak mbaok saong payua panuac thau dhar phol tal dom urang dalam but pajaih, yut cuai sahabat. Yaom lac urang kamei bangsa halei, tuk mai ngak metau, jeng brei ngak tapa adat ini yau lac sa banah oh kurang hu di dalam baoh sang urang bangsa Tày.

Amuk Lương Thị Vằn, umo 62 thun, palei Cốc Lồng, xa Lục Hồn brei thau: “Dahlau daih, tuk raidiuk daok kan kandah, grauk urang ba gaok, glah piah alin anek matau; urak ini rilo urang hu buh jien lin pa-uan tame pakuang piah ka dua urang hu phun jien piah ngak mbang. Tui urang, mada jeng hu urang buh yaok pluh ribau dong, jeng hu urang buh yaok rituh, gaok mai lac ameh, piah alin pa-uan ka duah urang pantan anek matau”.

Tui di nan, urang mai tal hu mek tanyak, ba tapa mbaok pakuang klau mbang, uak njuel tagok mbaok blaoh alin jien uan tui hatai di drei saong payua panuac tadhau ayuh haniem phol tal dua urang. Daok dom urang praong thun jang pasang likei (ong, amuk, anai, cei, va, sa-ai) meng hu tok tanyak. Thei daok ginup diuk pasang ye hu tok dua blah tanyak, urang mejua sa drei atau lahik diuk atau pasang ye tok sa blah. Urang lac adei atau kamuan, sit jang dut haong pasang likei, oh hu ngui adat ini.

Ong Bế Sinh Nghiệp, Urang hu angan je di palei Ngàn Vàng Dưới, xa Đồng Tâm brei thau: “Adat tapai mbaok ini hu meng lavik mai paje, oh thei thau nyu mai meng phun jung halei. Ini oh lac bingun piah kamei diuk ngak randap haong baoh sang gah pasang likei, blaoh daok lac sa bruk piah grauk urang brei mboh hatai anit ranam, bruk pambuak pagam saong klah rabha saong gauk dalam raidiuk. Tapa di ini, urang dalam baoh sang brei daong diuk pasang meng sa paok jien, yau sa pandap alin akaok meti ka raidiuk bahrau”.

Adat tapai mbaok di urang bangsa Tày daok di Bình Liêu lah sa ilamo karei, tok hu di bhum ini. Yaom lac xa hoi hu patagok, adat tapai mbaok jeng daok hu khik ramik yau sa adat ginreih, oh kurang hu dalam raidiuk di urang bangsa Tày ini. Dalam yaok blah tanyak uak mbaok, dalam yaok blah jien alin pa-uan, ieu lac dom panuac tadhau ayuh selamat haniem phol ndung bak anit ranam. Ieu lac bruk caong takre ka sa harei hadei hadah hadai ka dua diuk pasang daok uranaih dam dara ./.