Pak di Tay Nguyen, capi patau meng kal dalau hu 11 ragu hu duah mboh akaok mereip dalau abih meng thun 1949 di tinh Dak Lak, hadei di nan hu ba tapa nagar Frang roh duah. Ragu rabap meng patau ini hu umo lama taha lavik atah harei ini labaih 2500 thun, urak ini daok parang iek di Mu-yim Anek manuac pak di Paris. Ragu rabap patau ka dua hu duah mboh di thun 1956, urak ini daok parang iek di New York, Amirik. Kadha ini daok brei mboh ka yaom dak rai sajarah ilamo meng ribau thun, yaom gah ilamo ragu ragam klak lavik di rabap patau Tay Nguyen. Dom Ragu capi patau yao kan klak nan oh lac hu urang Tay Nguyen khik iek, pacang khik blaoh bo dom urang ilamo Amirik, Frang sangka tal saong iek praong; nyu njauk lac inem krung ilamo di manuac sia.

Pak di tinh Dak Nong , thun 1993 bhap bani M’Nông duah mboh Ragu rabap patau di craoh Đăk Kar (daok ieu lac capi patau Đăk Kar), hu dom urang roh duah langyah, brei mboh veik ka jalan dak rai sajarah gilac veik haong bhum taneh Tay Nguyen jaman dahlau atah di harei ini jaik 2500 thun. Rabap patau Đăk Kar hu ngak meng di patau Cordierit, tapa jalan ngak tabiak di urang dahlau diah hu ngak jeng Ragu rabap patau hu 3 ragu ragam: Ragu thanh Tru (ame), thanh T’rơ (amaik) saong thanh Tê (anek). Dom sap yava di baoh rabap patau ini dreh yau ragu ragam kong caing Tay Nguyen.

Rabap patau bhian hu rilo ragu ragam, hu ngak meng patau takaiy, atau patau nham... Jalan ngak biak gheih ghang saong tani tanat; nyu atah, katut, tapal, lapih karei di gauk piah brei ka hu dom sap ragu ragam tuk trun tuk tagok tuk taih. Mbaik patai atah, prong, tapal bhian hu am tram saong jangaih. Cagar veik mbaik patau katut, sit, lapih ye sap ragu ragam... Baoh rabap patau bhian atah yau nan ye takik hu tuan blaoh hu dom nghe nhan urang caik ndih saong gam gam haong gauk angaok sa me-jam caik cagar dalam tukvak ma-in. Tapa yaok ribau thun, yaom lac hu panduan salih tapa pandar alat ragam hu ngak meng bal yau kong saong caing, min urang Tay Nguyen jeng daok khik hu ilamu muk-kei kal dahlau, sap yava yau daok tamo di glai glo di alat ragam jaman meng kal, brei mboh adat cambat tanarakun meng kal me-in capi patau biak rilo di bhap bani M’Nông yao klak, hu khik piah tapa rilo rai rah yau sa bruk pasiam veik saong patui veik ilamo meng kan di bangsa.

Sap tanyi ragu ragam di rabap patau hu dom urang roh duah ragu ragam taong yaom yau brei mboh ka hatai saneng di anek manuac, nan lac kadha pambuak pagam di langik tasik saong po yang. Tuk urang ma-in dien tau, di thang am glaong, sap yava sameng, yava atah; di thang am bier, sap yava yau aia craoh nduac, yau angin Tay Nguyen ceik glai ram. Urang Bana, Jarai, Êđê, M’Nông... saneng lac, sap yava di capi patau nan lac jalan pambuak pagam di yang mebang, di anek manuac saong langik tasik, yang bhang, di anak meta saong dom hagait rah tabiak blaoh jaman dahlau.

Meda khang panuac lac, ong akaok ong kei di janih alat ragam meng kan hu mboh akaok mereip di Tây Nguyên nan lac rabap patau, peih akaok ka dom alat ragam karei, hu khik piah meng rai ini tapa rai diah; hu yaom gah ilamo pabak tame bruk pataom piah alat ragam meng kan di bangsa Việt Nam, rik daong tame halau harak gar ragu ragam bahrau brei ka bruk roh duah ilamo ka dom bein ilamo ragu ragam meng kan mai di Tay Nguyen./.