Bangsa Stieng hu rilo ilamo, dalam nan “Sap thung chai juak thaok brah di Sroc Bom Bo” gam lac sa bruk nghe thuat, gam brei mboh bruk ngak mbang karei di rahra. Bruk jhil menyim jih dalah meng kal, alak tapai hu ngak tabiak meng kal saong hu pandar rilo dalam raya adat. Langiu di nan, dom raya danao ia palei phá bàu, uan mbang akaok padai ieu lac dom adat ilamo meng kal biak karei daok hu khik tani tanat saong patagok tal harei ini…

Thun 2011, Labik Khik ramik Ilamo bangsa Stieng Sroc Bom Bo di palei 1, xa Bình Mình hu padang – jeng sa labik khik piah dom yaom kaom ilamo sajarah di bangsa Stieng.

Di Labik Khik piah Ilamo bangsa Stieng Sroc Bom Bo, tuai damuai biak mboh takre tuk mai jirah di labik parang daneing menyim khan bai. Kayua yau nan ye, tok meng daneing menyim mbuan hu ngak jeng rilo khan ao adat raya hu rilo sambo bar, bingu hala. Tui dom urang menyim jih dalah, urang kamei Stieng brei lahik sa atau dom bilan menyim meng tangin ka menng ngak jeng sa blah khan bai. Ini lac bruk siam gheih ilamo ngak jeng sa ilamo karei di bangsa.

Amuk Điểu Thị Xia, Akaok Kapul Urang kamei di xa Bình Minh, huyen Bù Đăng brei thau: Dom ndap nda hu khik piah di Labik Khik ramik Ilamo bangsa Stieng Soc Bom Bo hu ba mai meta maong bahrau ka dom rairah hadei tuk mai jirah di labik ini. Amuk mboh hadah mbaok meta tuk hu menek tabiak saong praong tagok di bhum taneh hu ka bruk katmang, patui veik ilamo karei di bangsa. Amuk, daok tui hatai khik ramik ilamo ini saong pato padar ka dom rairah harei hadei.

Tui ong Phạm Anh Tuấn, Akaok gah Pasang iek Labik khik ramik ilamo bangsa Stieng Sroc Bom Bo, huyen Bù Đăng, 70 khan ao jih dalah hu urang di dom palei ngak bruk srap gap tani tanat, tantu piah ka yaok blah khan ao lac mbaok meta ka hatai caong hu pablei tabiak rilo labik di khan bai jih dalah bingu hala di Binh Phuoc, oh lac dalam negar bo daok tabiak dunya, hu kein lagaih piah tagok mblang parang iek khan ao urang bangsa.

Rahra tuai damuai hu mai maong iek bruk gheih ghang di jih dalah saong bruk pambuak pagam haong khan ao tui jaman bahrau. Jih dalah hu ba tame raidiuk bahrau urak ini, brei kein lagaih daong ka bruk jhik menyim jih dalah di urang bangsa Stieng jeng sa bruk ngak kong hadah krah, paglaong yaom kaom ilamo, labik daok ilamo di Binh Phuoc di angaok ban do Viet Nam saong dunya.

Urak ini di huyen Bù Đăng daok patui bruk pato tacei dom jabat thau bruk di karja ngak dom bruk buh jien tame brei pasiam, paglaong dom tanut, danak dak hu pambuak tal bruk bhap bini saong drap ar ilamo di urang Stieng yau sang atah bangsa bhap bini piah raok tuai, sang pataom mbaok bhap bini…; padang palei ngak bruk jaman meng kal piah patui bruk khik ramik saong patagok bruk ngak meng kal di bangsa Stieng Sroc Bom Bo, brei kein lagaih siam abih piah ka gah buh jien tame mai duah thau saong padang jalan buh jien tame. Huyen pataom tame padang labik Khik ramik jeng sa labik jirah rivang karei, dui pachreih pagam haong khik ramik ilamo sajarah, ngak jeng bruk mbuan takre saong hu patagok samar drah ka patagok urang jirah rivang di huyen./.