Adat ngak Dayep bhian hu peih ngak dalam akaok thun tui saka Cam piah likau ka hajan siam angin lagaih, ngak hagait hu nan. Adat Rija Dayep bhian dui atah meng sa tal dua harei, rah tabiak di sang bhap bini atau dom labik dalam palei. Ong Lưu Văn Thính brei thau:

“Urang Cam ye palei halei jeng yau nan, tuk palei peih ngak adat akaok thun blaoh ye dom but pajaih halei jeng peih ngak Rija Dayep”.

Adat ngak Dayep hu dua banah lac banah adat saong banah raya. Banah adat kayua dom Po Acar atau ong gru dang ngak. Dom urang nan pok pandap adat tagok yau ye hala paneing, baoh ahar, alak, talo menuk tuk…tagok dom po yang mebang. Tapa dom adat saong pamuac kamaon likau, rahra likau dom bruk siam mekre daklam thun bahrau. Hadei banah adat lac banah raya, rahra ba gauk tame dom danak dak adaoh tamia bhap bini yau ye tamia Rija, tamia ndua akaok, dom kadha me-in bhap bini saong pandap mbang. Ragu ragam Cam hu Gineng, kadait Saranai danei tagok ngak biak sameng bui sambai chreih chrai saong pambuak pagam bol bhap rahra. Ong Châu Minh Mẫn daok di palei Baoh Bini, xa Phước Thái, huyen Ninh Phước brei thau:

“Dalam adat Rija Dayep hu dom ragam ragu bangsa piah duh ka tamia adat”.

Gam haong sap yava di ragu ragam, dom ragam tamia tuk halei jeng hu urang iek dalam dom harei adat oh lac sa bruk gheih ghang, nan jeng lac adat piah labik ngak adat hu bui sambai chreih chrai jang…Dalam bruk di urak ini, bruk khik ramik saong patagok adat ngak Dayep di urang Cam biak hu yaom glaong, daong ngak hu rilo ilamo Viet Nam. Thac si Bá Minh Truyền, Pasak Roh duah Ilamo Bangsa saong Gilang khik drap ar Ninh Thuan brei thau:

“Tapa tukvak nao roh duah di dom palei Cam, khol dahlak hulin mboh Rija Dayep hu brei mboh bruk pambuak, gul pataom bhap bini piah ba gauk khik ramik ilamo di bangsa drei”.

Ngak Dayep oh lac sa adat bo daok lac sa bingun piah urang Cam khik ramik saong pato veik dom yaom kaom ilamo meng kal. Adat brei mboh hatai gul pataom bhap bini, thau dhar phol muk-kei saong khik ramik ilamo bangsa./.