Anak bruk jit ruak Covid-19 rah tabiak srau kadau, hu labik daok brei pa-atah di gauk tui Sarak 16 di Thủ tướng Rajaei nan ye tỉnh Bình Thuận oh ngak adat peih thun bac birau. Anek saih dom pakat di tỉnh ini nao bac meng harei 20/9. Daok tal bac 9 saong tal bac 12, dom anek saih – menuac bac jeng daok brei bac tapa rayo papar binguk saong dom jalan bac karei meng harei 6 bilan 9. Gru Lâm Phúc Thịnh, Akok Sang bac Tiểu học Phan Hòa 2, huyện Bắc Bình, tỉnh Bình Thuận brei thau, thun bac 2021-2022, sang bac hu jaik 600 anek saih, ralo meng lac anek kamuan urang bangsa Cam. Piah khik ka thun bac hu siam, sang bac hu padang jalan pato, gam pambuak bruk haong dom kapol nyaom daong ka dom adei, abih di nyu lac dom anek saih sang kan kandah kayua jit Covid-19.

Oh ta-eng hagait tỉnh Bình Thuận, tỉnh Ninh Thuận jeng gaok oh lac takik kan kandah dalam thun bac birau ini. Ninh Thuận hu padang jalan ngak piah pacang caga jit ruak di yaok bhum palei samu haong 4 pakat pacang jit nan lac "siam mekre bahrau", "mbuan njom", "mbuan njom glong" saong " mbuan njom biak glong ".

Ninh Phước nan lac huyen hu rilo urang Cam daok di tỉnh Ninh Thuận. Bahrau ini, huyen ini gaok kan kandah rilo kayua jit Covid-19 nan ye bruk kuhria caga ka thun bac birau njauk suai damuai. Ong Phạm An, Akok Jabat Pato megru huyện Ninh Phước, tỉnh Ninh Thuận brei thau: Thun bac 2021-2022, huyện Ninh Phước hu 51 sang bac, hu abih tih anek saih dom pakat bac lac labaih 23.800. Urak ini, Sang bac Phổ thông bangsa gam bac gam daok -THCS Ninh Phước daok hu mek ngak labik brei daok karei, nan  ye, anak meta anek saih oh tame sang bac.

  “Ngan haong sang bac gam bac gam daok, Jabat pato megru pambuak saong sang bac  hu ba 214 adei nao labik daok di 5 xã, ban sit piah ka dom adei bac di dom labik daok dalam tuk sang bac ini ngak labik daok pa-atah gauk tal pauac bilan 9. Bruk ngak nan jeng piah khik hu siam bruk bac da-a di dom adei”.

Thun bac birau 2021-2022 rah tabiak dalam tuk jit ruak Covid-19 daok rah tabiak khang. Rilo bhap bini gaok kan kandah dalam raidiuk nan ye kurang jien ndo piah kuhria caga blei pandap ka anek nao bac.  Hu sang oh hu jien mek tame kayua bruk pa-atah di gauk piah pacang caga jit. Sang sa-ai Đàng Năng Đấu lac sang kan kandah di palei Cam Hamu Craok, ban sit Phước Dân, huyện Ninh Phước, tỉnh Ninh Thuận. Kayua jit ruak nan ye diuk pasang sa-ai  Đàng Năng Đấu oh nao ngak hu, oh hu jien piah raong baoh sang.

Di dom palei oh hu urang njom COVID-19 bahrau atau oh hu urang halei njom  mbak dalam bhap bini 14 harei tapa jeng hu peih bruk tame thun bac birau lagaih tui yaok sang bac. Sang bac Tiểu học Vĩnh Thuận, ban sit Phước Dân, huyện Ninh Phước, tỉnh Ninh Thuận hu peih thun bac birau di sang bac min brei ngak catang tui  5 paka di Mentri Y te, ngak drah samar dalam 40 minit saong oh hu daoh tamia uan raok thun bac birau yau dom thun dahlau. Gru Phú Thuận, pato di Sang bac Tiểu học Vĩnh Thuận, ban sit Phước Dân, huyện Ninh Phước, tỉnh Ninh Thuận brei thau, Sang bac brei kakei anek saih nao bac brei cuk pataik pacang papah idung…

Huyen bhum ceik Bác Aí, tỉnh Ninh Thuận hadei di sa tukvak padeih hè suai lavik, harei ini 5/9, labaih 6.900 anek saih meng Mầm non tal THCS, dalam nan, hu 96% anek saih bangsa Raglai tame sang bac peih thun bac birau 2021-2022. Anek saih tame bac meng harei 6/9.  Ong Đặng Ngọc Hải, Akok Jabat pato megru huyện Bác Ái brei thau, yaom lac anek saih dom pakat bac dalam huyen hu tame sang bac bac,  min anak bruk jit ruak COVID-19 sraw kadau yau urak ini, huyen jeng hu caga dom jalan ngak lagaih ka thun bac birau tui jalan gam pacang caga jit ruak hu salamat gam khik bruk pato bac hu siam.

“Langiu di bruk pathau khan ka jit ruak piah amaik ame anek saih thau blaoh sahanang hatai ba anek mai sang bac tui rilo jalan ngak. Jabat pato megru jeng hu tacei pato  ka dom sang bac kham merat taom gaok hu meng zao di dom maik ame piak khol drei payua pathau khan tapa zalo ka amaik ame thau cambaic  jang”.

Meng bruk kham merat yam tapa dom kan kandah di dom sang bac, di anai gru cei gru saong amaik ame, bruk pato saong bac dalam thun bac 2021-2022 di bhum urang bangsa takik di tỉnh Ninh Thuận saong Bình Thuận meda rah tabiak dalam salamat saong hu jak jeng siam mekre./.

Urang lang: A.Nghiem - 5/9/2021