Thun 1986, ong Lê Hữu Có padeih ngak lin, caong khin mai veik palei bhum tasik Kiên Giang piah padang mbang ngui. Yau nan min, bruk caong khin nan oh jeng, hadei di nan, ong Có likau tame ngak di sa Cty ngak tabung ikan di tại huyện Gò Công, tỉnh Tiền Giang. Tal thun 2012, công ty ini tavak sraiy, oh daok phun jien, brei padeih ngak, meng hatai khang di sa urang lin Wa Ho, gam haong ilamu bac megru hu dalam tukvak ngak di labik ini, ong Có haong dom ayut blei veik cty nan piah ngak veik. Hadei di labaih 1 thun yam tapa rilo kan kandah glaih glar, cty nan ngak mbang hu kein laba.

Oh padeih di nan, akaok thun 2016, ong Có brei buh tame yaok pluh tỷ đồng piah ngak sang mac ngak tabung ikan di bhum taphia negar Tri Tôn, An Giang. Ong Lê Hữu Có khan lac, bruk buh jien tame ngak sang mac di xã Lương An Trà lac caong khin daong ka mikva kathaot rambah din labik ini hu bruk ngak song jien mek tame tani tanat…

“Tuk camereip peih tabiak ngak ye gaok biak rilo kan kandah, min 6 thun ni mai, jien mek tame di urang ngak dalam sang mac lac 7 trieu đồng tagok. Tuk ngak bhian hu labaih 100 urang ngak, daok dalam tuk jit Covid-19 ye labaih 60% urang ngak. Urak ini, urang ngak pambuak saong drei oh hagait karei lac jien bilan tani tanat.”

Bhian hu tukvak daok dalam kan kathaot, nao ngak mbang pah, ong Có thau cambaih dom kan kandah glaih glar di urang bhum taphia negar, rilo dam dara dalam umo ngak bruk njauk nao ngak di dom labik ngak kong di Bình Dương, Ban raya HCM…Lac urang dang akaok Cty, ong brei palih ruah urang tame ngak lac urang di palei. Abih di nyu lac brei palih ruah abih dua diuk pasang tame ngak di sang mac. Ong padang sa labik daok brei ka dom diuk pasang  urang ngak  oh ka hu sang daok. Rilo urang dahlau diah ngak hamu, ngak mbang apah di dom tỉnh karei…jien mek tame oh tani tanat, min meng tuk tame cty ngak bruk mbiah tal ini, hu labaih jien, padang hu sang daok. Sa-ai Nguyễn Thị Kim Biên, xã Lương An Trà, ngak bruk ka  cong ty khan lac:

“ Dahlau diah dahlak nao tam padai apah, meng tuk tame ngak bruk di cty ye jien bilan hu tani tanat jang, harei halei jeng hu nao ngak, duah hu jien. Tuk jit Covid-19 ye cong ty ngak bruk 3 di labik. Meng tuk tame  cong ty ngak mbiah tal ini patak pataom hu hasit. Dahlak caong khin hu ngak bruk suai lavik haong cong ty.

Ong Trần Văn Cường - Bí thư Đảng ủy, Akok UB bhap bini xã Lương An Trà, huyện Tri Tôn, tỉnh An Giang brei thau, dom thun tapa, Cty Hải Thuận An Giang kayua ong Lê Hữu Có ngak yam ndoc hu ba bruk ngak ka rilo mikva kathaot  di puk palei haong jien mek tame tani tanat. Abih di nyu lac, ong Có tuk halei jeng sangka tal bruk an sinh xa hoi, kham merat rik daong haong karja palei piah paglong raidiuk bhap bini.

“ Sa-ai Có biak sangka, daong raidiuk urang ngak, jaik abih urang  ngak di sang mac lac menuac dalam palei; tuk jit ruak Covid-19 tamuh tabiak, min ong jeng khik hu bruk ngak brei ka mikva. Langiu di nan, ong Có jeng hu daong ka palei bruk an sinh xa hoi yau: daong brei radaih pajeng urang ruak ngak pahala oh abih jien; ngak jalan ba gom menyek  saong daong raidiuk urang dalam palei”.

Hatai khang di urang lin, gam saong sami samar, hadah krah, sahneng duah blaoh ba tangin ngak dalam bruk ngak mbang pablei salih, urang ngak bol lin dahlau diah Lê Hữu Có daok mek hu rilo jak jeng siam mekre. Khan brei thau ka dom bruk daok kuhria ngak di anak tal, ong Có  brei  thau lac meda buh jien tame peih praong bruk ngak, oh lac duah laba ka cong ty, bo daok ba bruk ngak, jien mek tame ka rilo bhap bini kathaot rambah di bhum palei taphia negar ini./.

Urang lang: Ai Nghiem-3/1/2021