Tukvak jaik ini, sa bruk pachot pagat bahrau saong ngak ja urang shipper rah tabiak biak kan thau.

Dahlau daih, nyu bhian taong ndien saong ba tabiak dom khau tin yau drei hu blei khan ao, takhaok kalik juak, pandap ngak mekre ...saong pambak tame dom urang blei rilo pandap panda, mbuan var dom mbang blei pandap piah pandar bayar jien samar chip.

Min, jaik ini urang pachot pagat nyu ngak tui jalan thau jang, tapa nan klaik mek atau pablei salih du lieu tuai urang blei. Tuk taong eiw phone ka urang, nyu ndom njauk angan pandap urang blei, yaom jien saong labik jao pandap panda…Kadha ini ngak ka urang oh daok caga hagait saong njauk urang pagat biak mbuan.

Jaik ini, sa-ai Trà daok di Ha Noi hu kakei blei pandap panda. Urang pachot pagat ngak ja urang shipper taong phone mai ndom njauk panda panda, njauk yaom jien, nan sa-ai oh caga hagait blaoh bayar jien ka nyu tui jalan banking. Min hadei di nan, nyu taong phone, ndom lac nyu payua suan so ka sa-ai tai khoan di Kapul Giao hang Tiet kiem. Payua jien tame di nan, yau lac bruk sa-ai jeng sa urang dalam kapul saong njauk bayar jien tự động yaok bilan.

Urang pachot pagat tacei ba sa-ai tame 1 jalan link, pandar sa-ai brei thau khau tin di drei piah kaoh klaak bruk tut angan, min tuk brei thau khau tin blaoh, tai khoan di sa-ai lahik 3,5 trieu dong. Sa-ai Bùi Thu Trà (quan Nam Từ Liêm, Ha Noi) brei thau: Dahlak lahik jien blaoh nyu cakak dahlak, oh taong phone nyu hu veik tra. Tapa bruk ini, dahlak thau lac meyah shipper taong phnoe ndom payua pandap panda ka labik sang ye brei thaot binguk pandap panda saong urang khik pandap panda nan.

Sa-ai Hương daok di ha Noi jeng gaok pachot pagat tui jalan yau nan, kayua nyu ndom njauk harak blei tapuk, hu yaom 270.000 dong. Bruk shipper ja meda ndom njauk harak pandap panda lac sa bruk kan thau jang dut haong dahlau daih.

Trung tá Vũ Trọng Nghĩa (Phaok jabat 5, Kuk An ninh mạng saong Pacang, cakak urang duas pandar cong nghe glaong, Mentri Kong an) brei thau” “Bruk ini meda kayua gah pablei pandap panda online atau dom gah pajeng ba dalam bruk pasang iek he thong, pasang iek urang ngak oh khik tani tanat khau tin tuai blei pandap panda ngak ka urang jhak di langiu pachot pagat”.  

Tui Mentri Kong an, rilo meng lac dom bruk pachot pagat hu meng negar langiu. Dom urang nan pandar SIM hareik saong so tai khoan nan biak kan mek hu. Urang pandar brei biak caga tani tanat dom mbang taong phone di shipper. Bruk pandar dom ung dung piah cakak dom mbang taong phone pachot pagat jeng biak lagaih.

Thun 2023, jaik 16.000 panuec ndom di urang pandar ka bruk pachot pagat online, khat lahik kuhria mboh dahlau lac 390.000 ty dong, samu 3,6% GDP, tagok labaih 64% dut saong thun dahlau. Jabat pasang iek brei thau lac samar drah brei thau bruk pasang iek bruk klaih mek khau tin pablei salih saong ngak ja shipper./.