Bleng padeng, pandik hatai, plai damen jien ndo having akok di amuk Lê Thị Linh, daok di phường Tân Lợi, ban Buôn Ma Thuột, tỉnh Đắk Lắk dalam dom harei tapa. Amuk bahrau njauk kaol kanjah jhak cagat jien 80 triệu đồng tapa zalo. Amuk khan lac, labaih sa bilan dahlau hu nao tal bộ phận sa pabah mbang Ban  Buôn Ma Thuột piah ngak harak ba-ar panduan salih bruk pandar taneh. Page harei 2/10, harak ba-ar hu panduan tal jabat thuế, piah kuhria yaom jien njauk kak je.

Piah mbuan laghaih, amuk hu eiw urang jakar thuế angan T. mong iek, daong ngak. Urang jakar ini taduan mek saong lac meda javap jalei dalam dom harei hadei. Dua harei hadei, hu sa số zalo karei iew mai saong lac angan T.,  urang jakar thuế pandar amuk payua 80 triệu đồng meneing dahlau. Pang tui, amuk payua jien tame tui panuac urang iew phone bo oh iek gilac. Tal page harei 6/10, taka laik phone zalo ini iew mai veik pandar amuk payua veik 100 triệu đồng tra. Mboh karei kayua harei adit jabat Thuế oh ngak bruk, amuk iew phon ka urang jakar angan T., ye urang jakar ini brei thau lac oh hu bruk iew zalo pandar amuk payua jien kak je. Thau drei njauk pagat, amuk nao tal kong an khan veik ka bruk nan. Amuk Linh lac:

“Oh thau yau habar bo nyu thau drei nao kak jien je taneh saong thau urang jakar thuế hu angan yau nan piah ja angan iew phone, blaoh nyu payuqa taka số tài khoản pandar drei payua jien . Mboh taka  tài khoản angan  T. drei oh daok kanda atau mong iek gilac bo payua chip. Pasang drei mboh jamen jien nan ye tabiak gilang pariak pasang iek ye angan T. nyu dreih yau angan urang jakar, min angan oh laik haong gauk, saong urang jakar di gilang pariak ndom lac yaom jien 80 triệu nan hu payua tame  tài khoản di Campuchia.”

Meng akaok thun 2024 tal ini, Kong an tỉnh Dak Lak  ba tabiak kaok  25 bruk  pandar kong nghe glaong  piah pachot pagat meblah mek drap ar ngan haong 75 urang. Taong abih yaom jien meblah mek tagok tal yaok pluh tỷ đồng.  

Trung tá Nguyễn Huy Nam – Akaok Duk An ninh mạng saong pacang cakak tội phạm pandar kong nghệ glaong kong an tỉnh brei thau, thủ đoạn di dom urang lac ja angan je urang jakar dom jabat peih ngak adat hukum iew phon, zalo, facebook brei payua jien tame  nao suan hukum jalan mbak, kak jien ngak ba-ar căn cước bhap bani, jien iek ruak, bảo hiểm atau dom janih jien karei; jak ba buh jien tame pablei salih angaok mạng, jien ảo. Gam gam haong nan lac dom urang nan bhian pandar jalan ngak nan lac klaik mek tài khoản facebook, zalo nhắn tin gauk gar pagat mesre jien; peih dom trang web pablei salih pandap panda online pambuak pagam haong pagat; ngak randap tapa tin nhắn anit ranam blaoh pandar payua jien ngak harak ba-ar nao daok di negar langiu; brei mesre trak laba tapa app mạng; alin brei pandap pandar payua jien dahlau piah ba-yar jien phí pajeng ba meng negar langiu mai… Trung tá Nguyễn Huy Nam, kakei yau ini:

“Caong khin bhap bani drei njauk paglaong akaok saneng, pacang khik dom thong tin di rup drei. Tuk hu mbaok tame mạng xã hội oh klah rabha thong tin. Tuk ngak bruk hagait pambuak pagam tal bruk payua jien ye njauk pasang iek ka nyu cambaih laih. Bhian tui iek tình hình saong jalan ngak di kaol kanjah jhak pandar kong nghệ glaong angaok dom harak mbao, rayo di karja.”

Anak bruk srau kadau di kaol kanjah jhak kong nghệ glaong angaok mạng, langiu di bruk jhul pakhang dom jalan ngak pacang caga di dom jabat chức năng, bhap bani njauk paglaong akaok saneng, ngak tui panuac tacei pato di gah kong an, oh klah rabha dữ liệu rup eng ka urang karei. Tapa nan, daong ka taong abih gauk patakik jang saong pacang caga hu dom kol kanjak jhak klaik mek thong tin, pambak tame nan piah pagat meblah mek jien, oh laik tame bruk “Jien lahik, pandik hatai”./.