Mentri Noi vu payua harak ka dom karja palei peih ngak siam Sarak di Po Negar ka bruk alin pandap ka urang ngak bruk daong cach mang mbang Tet thun birau Bính Ngọ 2026, dalam nan caong khin brei alin jien dahlau harei 31/1/2026, khik njauk tukvak, njauk urang. Thun ini, pandap alin di Negar hu peih ngak tui dua yaom jien 600.000 dong saong 300.000 dong, parabha tui dom urang dalam sarak di karja. Kuhria abih tih jien labaih 502 ti dong.

Pho Thu tuong Rajaei Mai Văn Chính mbaoh harak padang Quy hoach khik ramik, pasiam veik Inem krung kien truc - nghe thuat pakat negar dac biet bimong Thap Nhạn, di dom phuong Phu Yen, Tuy Hoa saong Bình Kiến, tinh Dak Lak. Khik ramik ilamo drap ar mboh di meta saong oh mboh di meta gam haong bimong Tháp Nhạn hu jeng labik sirah rivang Champa, brei mboh bruk suai lavik thun bilan padang ngak saong tal harei ini di bhum taneh Tuy Hòa, bruk hlai tame gauk ilamo adat cambat Viet – Cam. Tui nan pambuak inem krung Thap Nhan gam dom bimon Cam di bhum kreh negar pambuak dom labik  sirah rivang ma-in  ilamo Cam.

Tinh Gia Lai birau hu payua harak dui atah tukvak peih ngak sarak daong ka dom baoh sang, urang hu glai ikan oh ginup nao ngak bruk tal abih quy I thun 2026. Dahlau di nan, tinh Gia Lai peih ngak daong ka po gilai saong urang peih gilai di 424 gilai ikan khut tayak. Tui nan, yaok po gilai saong dom urang di baoh sang hu daong 30 kilo brah ka yaok urang dalam sa bilan. Tui nan, yaok po gilai hu daong veik 3 trieu dong sa sruh gilai sa bilan meng jien mbaok. Bruk dui atah tukvak pandar sarak daong ka bhap bini ngak njauk tui  hukum taong chap kaya ikan tathik, pacang bruk oh khan brei thau saong oh ngak njauk  hukum IUU.

Hu jaik 1.500 urang lin di 6 kapol nyaom, chien dich Xuan halan hatian mbang ka 9 di uranaih Hoc vien Urang jakar Ban raya HCM peih ngak rilo danak dak, bruk ngak hu makna dalam bilan pataih. Harei tabiak ngak bruk, dom urang lin peih ngak hu labaih 14bruk pakacah ngak sam piah uan raok Nyaom roya Dang pakat negar mbang XIV di dom bhum palei. Cambaic laic: danak dak tamia tui kapol praong ngan haong kadha “ Umo thun dama dara ranam Dang”; rivang, alin pandap ka baoh sang dalam sarak karja, urang ngak bruk cach mang di dom phuong Binh Thanh; Bình Lợi Trung; Gia Định; Thạnh Mỹ Tây; Bình Quới.

So Ilamo, The thao saong Yulit ban Can Tho khan brei thau tuk yam tame thun Birau Tet Nguyen dan Bình Ngọ thun ini,  ban ini kuhria brei cuh phao bingu di klau labik. Nan lac, cuh tagok langik glong di bein bingu Song Hau (phường Cái Khế), cuh phao pakat biar di phường Vị Tân (tỉnh Hậu Giang klak) saong phường Phú Lợi (tỉnh Sóc Trăng klak) duh ka bhap bini uan raok Tet. Can Tho jeng hu peih ngak jalan bingu nghe thuat di jalan Võ Văn Tần - Nguyễn Thái Học (phường Ninh Kiều) ngan haong dom kadha: “ Palei negar tame bilan pataih”, “Can Tho meng kan saong urak ini” saong “ Can Tho uak drei patagok”.

Thaik thaot ahaok kayua robot peih đa nang birau di Trung Quoc hu ngan “Thiên Mã-1000” birau peih ngak hu siam kapal ahaok par akaok meti, pagol sanya hu jeng jalan ngak siam di dom labik kan kadah. Hu pagap yau sa sruh radaih  pajeng ba di angaok langik, “Thiên Mã-1000” hu ngak tabiak piah lagaih ngak hu rilo bruk yau pajeng ba kaya kan, daong tuk gaok bala saong daong palao pandap ka urang labik hu bala. Ahaok par glong tagok tal 8.000 met, par atah 1.800km  saong njauk ndem tal bruk pajeng pandap  tagok tal 1 tấn kaya, “Thiên Mã-1000” piah pajeng ba hu rilo.

Gah ngak nong Campuchia birau kuhria abih thun 2025 hu patagok khang labaih 940.000 tấn brah pablei tabiak darak pasar dunya, tagok labaih 45% dut saong thun 2024. Bruk ngak hu jak jeng nan ba jien mek tame labaih 600 trieu dola My, brei mboh bruk yam tagok khang kajap  dut saong kuhria rah tapa labaih 600.000 tấn di dom thun dahlau. Bruk ngak hu yau nan mai meng bruk sangka di Rajaei dalam bruk daong dom urang hu mac chrai brah paglong prein ngak mbang di pluh thun tapa.

Mentri Ngak nong Han Quoc harei kabroi 12/1 khan lac, pablei dom kaya mbang saong kaya ngak nong di taneh ia thun 2025 hu labaih 13 ti USD mai meng bruk palei hu di grauk dunya dom kaya yau mi mbang samar, kim chi saong ia tut. Iek tui labik, My lac darak pablei kaya mbang praong abih di Han Quoc ngan haong jien mek tame tagok labaih 13% dut saong thun dahlau, sumu 1,8 ti dola My di thun 2025./.