Mentri Noi vu pok tagok Akok negar ka bruk alin pandap ka urang hu ngak bruk cach mang, thuong binh, urang hu mbang tui jien bilan, bingun Tet Nguyen dan Binh Ngo 2026, hu dua janih jien  600.000 dong saong 300.000 dong. Tui kuhria abih tih urang hu taduan jien alin mbang thun ini lac labaih 1 trieu 650 urang. Yaok thun, Po ine negar hu alin kaya ka urang ngak bruk cach mang daong ka taneh ia di bingun Tet bangsa drei. Bruk ini brei mboh ilamo jalan diuk rai siam gheih “ Menyum ia hadar tal halau ia”, “Thau dhar phol”, brei khik ramik saong ngak tui yaok ribau thun sajarah dakrai  di bangsa Viet Nam.

Danak dak “Ba Tet mai sang” thun 2026 kayua Trung uong Ndoan Dam dara Cong san HCM  alin brei 4.230 harak ve radaih ka aneik saih sinh vien, dam dara  urang ngak kong saong urang ngak apah  sang kan kandah daok ngak bruk, bac megru di TPHCM, tinh Dong Nai nao palei di dom tinh Bhum kreh negar saong bhum Brak. Tukvak ndik radaih nao palei meng harei 5 bilan 2 tal harei 11-2-2026 ( lac harei 18 tal harei 24 bilan mat tui kawi ia bulan). Dom radaih pajeng meng Ban raya HCM saong Dong Nai. Labik radaih nao tal dom tinh: Đắk Lắk, Gia Lai, Quảng Ngãi, Đà Nẵng, Huế, Quảng Trị, Hà Tĩnh, Nghệ An.

Dom harei puac adit, di bhum gah Pei Meraong negar, bilan pataih mboh cambaic laic dalam bruk ngak sami samar di urang pala bingu, pala phun ngak mekre sang danaok. Di Chợ Lách, labik pala rilo bingu di tinh Vĩnh Long, yaok ribau phun bingu mai brei cakak dhar, laik hala, kak kajap piah pablei ka urang. Ong  Trần Hữu Nghị, Pho akaok UBND xã Chợ Lách khan lac, Tet nethak Athaik Waw, dalam xã pablei tabiak darakpasar labaih 2,5 trieu phun bingu yaok janih. Njauk caik hatai nan lac, bingu “Cúc mâm xôi Long Thới” taduan hu angan OCOP 3 patuk, rik tame paglong yaom kaom saong danei angan bingu kieng.  

Mban Khik iek Jalan pasei do thi TPHCM padang ngak danak dak saong pagam 8 takai nyan mac di 7 sang ga angaok jalan Metro ka 1 (Bến Thành – Suối Tiên), kuhria abih tih jien labaih 53 ti dong meng phun jien karja. Bruk pagam takai nyan mac piah daong ka urang taha umo, uranaih , urang jaoh jo saong urang kumei metian hu tame labik ndik radaih ndien lagaih, mbuan sanang jang. Takai nyan mac ngak blaoh saong dom danak sit di dom tatua nao tabak tapa brei mboh bruk patagok jalan  mbak duh ka bhap bini.

Tui kuhria mboh dahlau meng harei 6 tal harei 7 bilan 1, ia tagok glong abih di tapen tathik gah Pur  meraong negar trun suai, ia ndik glong di tathik Vung Tau hu meng 4 -4,1m. Labik tapen tathik gah Pur meraong negar brei caik hatai pacang caga ia dauk, sre tapa ar di dom labik dalam, tapen tathik, tapen kraong, ar pacang ba tal bruk nao mai bruk ngak nong, raong pala kaya dalam ia, ia njom nerak saong raidiuk bhap bini gaok kan kandah. Dom tinh, ban daok peih ngak dom jalan tathuak ia, khik ka phun pala; ngak kajap ar pacang, danao hlung raong kaya ia; paik mek njam patam, baoh kayau.

Hadei mbang ba lin taong tame chap mek Tong thong Venezuela, Tong thong Mỹ Donald Trump  khin ba lin taong tame veik Venezuela mbang ka 2 meyah dom urang ngak praong negar ini oh pambuak bruk. Dalam tuk nan, yaok ribau urang trun jalan di  Caracas iew payar veik Tong thong Nicolas Maduro, bruk taong bleih salih Tong thong Nicolas Maduro lac bruk ngak suan an ninh saong bruk ngak po negar Venezuela. Rilo taneh ia Tay iew Mỹ iek praong hukum dunya saong langyah bruk sraw kadau tapa jalan ndem meyai ba siam.

Dalam thun tapa, Canh sat Taneh ia Philippines brei padeih bruk labaih 3.000 urang jakar, langiu di nan daok hu labaih 3.000 urang jakar langyah tui dom jalan karei yau: trun chuc, khien trach, kaok jien bilan, cakak bruk saong mek veik adat dalam bruk ngak. Tui Quyen Cảnh sát akaok taneh ia Philippines, ini lac sa binah danak dak Pasang iek Njauk tapak, piah langyah dom bruk suan di urang jakar hu sumu, njauk bruk tui hukum saong bruk dak khan.

Rija roya Dunya bang tuyet Cáp Nhĩ Tân, tỉnh Hắc Long Giang, Trung Quốc hu peih ngak di melam ini tui mon pak ini. Ngan haong kadha “ Dunya dalikan”, roya thun ini hu peih ngak di taneh praong labaih 1,2 trieu met vuong, kuhria ia khar saong tuyet hu pandar tagok tal 400.000 met khoi nan lac glong abih kuhria meng tuk peih ngak roya. Dom danak dak ia khar praong abih  yau medli patao, radaih pui thak ia, tatua dro janal saong yaok rituh  kadha sarak tagok ia khar ngak jeng sa “ ban raya meng ia khar” hadah tanyiak di gom melam. Ini lac roya praong abih dalam sajarah bilan la-ar di labik danei angan mekre./.