Di Can Tho, rilo bruk chot pagat meng harak bayar jien ngak ja lau rah tabiak, ngak khat lahik ka rilo tadai kuan saong labik pablei salih. Bruk njauk ndom lac dom urang ngak di anak meta urang njauk pagat, pandar harak gal ngak ja lau hu srap gap biak tani tanat, ngak bruk jak samar ngak ka rilo urang oh dil samu piah caga. Mboh bruk oh yau bhian, Kong an Can Tho hu samar chip tame bruk. Tapa pasang duah, kapul karja hu mek kareik sa diuk pasang chot pagat biak sanak jak dang di lakuk dom bruk ini, daong cakak dang bruk chot pagat ini.

Khan jabat kong an, sa-ai Trương Tuấn Anh, phuong Ninh Kiều brei thau, harei 20/9 bahrau blaoh, sa-ai hu ba tagok khan pablei jamraik me-in game hu yaom jaik 5 trieu dong di sa blah Web pablei online hu sa harei ye harei hadei hu urang dam taong phone mai tangi blei saong khin gaok tapak piah iek kaya. Sa-ai Tuấn brei thau: Urang blei ndap nda pandar dahlak payua harak tapa zalo ka diuk di nyu, payua lek taka tai khoan piah payua jien. Hadei 3 minit diuk nyu payua bill mai ka dahlak lac payua jien blaoh paje. Hadei nạn dahlak pasang iek veik ye mboh oh ka taduan hu jien. 15 minit hadei urang nan pandar dahlak nao tal sang nyu mek jien mbaok, tuk daok nao ye urang nan yuk ga radaih klak nduac.

Jabat Canh sat pasang duah Kong an Ban Can Tho brei mboh hu urang chot pagat blah mek drap ar jien padai angan Trần Mỹ Kỳ Duyên (Ndih tapui thun 2007) saong pasang nyu angan Nguyễn Tài Khương (ndih tapui thun 2002) daok di ban Can Tho. 2 urang khan brei lac, meng bruk ngak ja lau harak gal bayar jien, meng bilan 6 tal bilan 9 meng blaoh hu ngak 9 mbang chot pagat blah mek drap ar jien padai, hu taong abih jaik 80 trieu dong.

Thuong ta Lê Quốc Hội, Phaok Akaok Jabat Canh sat pasang duah, Kong an ban Can Tho kakei caga: Bruk di dua urang ini lac pandar ilamo kong nghe saong pambak tame bruk rahra oh caik hatai caga piah ngak bruk chot pagat. Urang ini meda ngak thaik thaot harak bayar jien ja jien lau brei mboh lac payua jien blaoh paje yau biak di dom gilang pariak, urang oh caga ye njauk chot pagat. Tapa bruk ini khol dahlak kakei caga rahra, dalam bruk blei pablei bo bayar meng bruk payua tapa tai khoan ye brei pasang iek tani tanat, biar halei tai khoan di drei taduan hu jien ka meng brei ndap nda kaya ka urang blei. Ngan haong tuai damuai oh krein ye brei takik abih bruk payua ndap nda sa drei blaoh mek jien hadei kayua meda mbuan njauk chot pagat saong gaok kan kandah ka drei.

Ngan haong rilo bruk kein lagaih, dom bruk pachot pagat meng bruk bayar jien tapa tai khoan gilang pariak dak harei dak tamuh rilo urang je tame pandar  min dom janih urang pachot pagat jeng pandar bruk bayar jien ini piah ngak pachot pagat blah mek drap ar jien padai urang, kayua kayua yau nan ye rahra brei caik hatai caga piah oh laik tame bruk chot pagat di kol bleik./.