Tal min 17 tuk harei 28.10, hajan ia sua di gah Kreh negar hu ngak ka 8 urang metai saong lahik, labaih 100.000 baoh sang njauk ia dauk dalam ia sua. Hajan ia sua ngak khat lahik 702 ha padai, njam patam saong labaih 129 ha phun mbang baoh. Urak ini, dom tinh, ban Quang Tri, Hue, Da Nang saong Quang Ngai hu ba nao daok labik karei labaih 4.700 baoh sang ngan haong labaih 13.000 urang di dom labik mbuan glut jaleih, ia dauk tal labik karo salamat. Pasak Kuhria hajan ribuk pakat negar kakei dahlau ka langik tal abih harei 30.10, labik Hue saong Da Nang patui veik hu hajan praong.

UB MTTQ Viet Nam ban raya HCM peih bruk pajeng ba ndap nda kaya daong mbang ka 4 daong ka bhap bini rahra bhum ribuk ia sua. Labaih 70 tấn dalam nan hu kaya mbang, ia menyum, ia tasau, jru rao hacih, mi paok saong jru cavao hu payua tal dom tinh: Nghệ An, Tuyên Quang saong Thái Nguyên, piah samar hu daong ka bhap bini, doanh nghiep di TP.HCM pambak praong jalan sahaneng “ Jum pataom taong abih bangsa”, rik tame daong ka bhap bini samar tani tanat raidiuk.

Danak dak “pacang caga langik oh lagaih saong salih taong abih bhum Taneran kraong Cuu Long” bahrau hu Gilang pariak dunya daong Ban Can Tho saong dom tinh Bhum taneran kraong Cuu Long pacang caga ia dauk, pasang iek ia sua saong ia ndik. Danak dak kuhria hu ngak tal thun 2031 ngan haong tanut buh jien tame 222 trieu USD, samu haong 5.328 ti dong piah patagok bruk pacang caga langik oh lagaih di gah ngak nong saong bhap bini rahra palei pala di dom tinh, ban hu pilih ruah bhum Taneran kraong Cuu Long. Urang dang akaok ban Can Tho sanya brei jhul samar tukvak, dalam bilan 4-2026 brei mbaoh tangin ka danak dak ini.

Akaok UBND tinh Tay Ninh ba tabiak harak brei ba urang jakar, vien chuc meng dom jabat  pakat tinh ka bruk ngak di xa, phuong. Tui nan, 20 kong chuc, vien chuc di dom so, dom gah brei ba manuac mai 15 xã, phuong dalam tinh. Bruk ba urang jakar, vien chuc mbang ini lac jalan peih ngak sumu, rik tame lang talaih  dom kan kandah  ka bhum palei, tui nan ba mbuan lagaih ka dom urang jakar pakat tinh pasram, bac megru tapa bruk ngak, paglong bruk ngak ka urang jakar suai lavik ka tỉnh.

Ban raya Ho Chi Minh daok jaik 900 gilai ikan oh ka hu ginup kein lagaih tabiak tasik. Piah taoh talaih kan kandah ka dom gilai ikan, lambaok UB Bhap bini dom xa, phuong tapen tasik di Ban raya Ho Chi Minh brei panuac ndom, dom gilai ikan oh hu ginup kein lagaih brei ka hu tut angan, pasak tut angan brei javap calei ka po gilai saong jabat karja thau khau tin. Dom bhum palei jeng brei panuac ndom, ngan haong dom po gilai hu tukvak atah oh ngak bruk, oh gilac mai bhum palei, jabat karja oh pambuak ndom meyai hu, Chi cuc Kaya tasik saong Pasang iek ikan brei hu jalan langyah piah oh ngak kan kandah tal bruk pasang iek di bhum palei.

Mentri gah Urang ngak bruk negar Indonesia patrauk 84 urang ngak negar langiu tabiak truh  labik kinh te dac biet kayua kong ty hu pandar urang ngak negar langiu. Dahlau di nan lac bilan 7 thun 2025, UB Pacang caga tham nhung Indonesia chap mek hu 4 urang lac jakar pakat glong di Metri gah Urang ngak bruk, lac mbang jien saong ndok jien urang ngak harak gal nao ngak bruk di negar langiu. Urak ini, dom  jabat karja di Indonesia kham merat atah klak dom bruk mbang jien, ndok jien di urang.

Amazon brei padeih bruk 14.000 urang ngak bruk dalam tukvak anak tal. Gah ini brei thau bruk brei padeih urang ngak bruk lac kayua pandar tri tue nhan tao saong kuhria hu rilo mbang brei padeih dalam thun anak tal. Dalam dua thun tapa, kongti hu brei padeih urang ngak bruk yaoh banah di taong abih dom gah ngak bruk. Kongti jeng brei jaik abih urang ngak bruk njauk brei padeih bruk hu 90 harei piah duah sa bruk ngak bahrau dalam gah ini saong brei thau dom kapul pilih ruah urang ngak bruk di kongti brei caik dahlau ka dom urang ngak bruk ini.

8Bruk meriak gauk piah hu palih ruah tame karja Myanmar hu peih ngak, dalam tuk bruk palih ruak anak tal hu iek lac kham merat ngak hu siam bruk karja gah bol lin. Tui bruk ba tabiak, bruk palih ruah hu peih ngak tui rilo jalan meng harei 28/12, hu 57 urang đảng tame. Yau nan min, ndang Lien ndoan pakat negar daong Bhap bini kayua amuk Aung San Suu Kyi dang akaok nan bhian meblah hu 82% urang hu palih ruah tame di thun 2020 meda oh hu angan  kayua yak klak hadei muk njuak chap mek kayua ngak bleik dalam bruk palih ruah./.