Tui jabat kong an, dalam tukvak puac thun, pambak tame hatai caong duah bruk ngak tui tukvak, bruk ngak karei di bingun Tet tagok glaong, dom kol bleik patagok glaong bruk pandar dom tai khoan mang xa hoi ba tagok dom kadha pathau khan, dui katung rahra “nao ngak tapak, oh khin hu harak gal likau bruk” piah chot pagat blah mek drap ar jien padai rahra, gaok mai lac chot pagat nao tapa negar langiu njauk kateik geik ngak bruk atau njauk bruk pablei menuac di kol bleik…

Bruk ngak, jalan ngak di dom kol bleik lac: ngak tabiak dom blah web, tai khoan mang xa hoi “ja” yau biak, gaok mai dom kol bleik daok ngak ja harak bi-ar, anek inem piah mek hatai je ka urang ngak bruk; ba tagok dom kadha di angaok mang xa hoi Facebook, Zalo, Tiktok… duah urang ngak bruk pagam tame dom video, thaik thaot bruk ngak biak haong dom asal kadha dui pachreih rahra yau ye “bruk ngak njuel, jien bilan meng 18-20 trieu dong sa bilan”, “oh khin ilamo”, “raong mbang daok, nao ngak tapak”…piah dui pachreih rahra.

Meyah rahra jie tui pambuak tal ye kol nyu pathau khan, pagun sanya brei bruk ngak lagaih saong pandar bayar dom yaom jien takai atau pandar bayar jien jitvu dahlau tuk yaih khan bruk ngak min biak nao lac piah blah mek jien padai rahra.

Langiu di nan, dom kol bleik daok ngak dom bruk dui katung, plue juo urang ngak bruk ngak ngak mbang di atah jien mek tame glaong, min biak nao pachot pagat ba rahra nao tapa langiu negar piah kateik geik ngak bruk atau jeng urang njauk bruk pablei menuac…

Urang njauk kol bleik pamaong tal lac dom urang njuel laman hatai, oh thau ka hukum, caong khin hu bruk ngak drah di bingun puac thun; meyah rahra oh caga biak mbuan je tame dom panuac pathau khan, yaih khan nan bo jeng urang njauk chot pagat di kol bleik.

Dom bruk piah thau bruk chot pagat di dom kol bleik dalam nan hu:

- Yang ka sa, dom tai khoan mang xa hoi bahrau hu tut angan, dom ayut cuai, urang tui iek takik, kadha vak hu takik comment…;

- Yang ka dua lac, pandar urang ngak bruk bayar jien manuac ba brei samar drah atau dahlau tuk yaih khan cambaih laih bruk ngak bo oh hu harak gal bruk ngak tantu, oh hu harak bayar jien, atau khau tin ka bruk ngak, po di urang ngak bruk…;

- Yang ka klau, bruk ndom meyai oh tani tanat, oh pabak ginup khau tin ka bruk ngak, po di urang ngak bruk, yaom jien bilan, jien alin…;

- Yang ka pak lac, dom kol bleik yaih khan brei ba bruk ngak dauk, oh hu harak pablei salih atau harak gal langyah ka jitvu bruk ngak kayua jabat pan bruk pabak; oh brei labik cambaih laih…

Piah caga plaih klah hu dom bruk nyu pachot pagat di dom kol bleik, jabat kong an pachreih rahra brei caik hatai caga tuk maong mboh khau tin ndom meyai ka bruk ngak di angaok mang; pasang iek khau tin meng dom gah di jabat karja, rilo meng lac oh njuel hatai, je tame, ngak tui dom kadha vak hu asal kadha ndom meyai ka bruk ngak, bruk ngak tui tukvak di angaok mang xa hoi…Tuk medil ka bruk chot pagat, brei samar drah pathau khan, khan ka jabat karja piah caga, pacang cakak saong taong bhat tui adat hukum nagar./.