1# Jala 23/1 tui maong Thụy Sỹ, lac biar harei 23/1 maong Hà Nội, di tuk nao hu mbaok di nyom biai WEF Davos 2019 di Thụy Sỹ, Thủ tướng Nguyễn Xuân Phúc hu brei panuac peih mbang ginum biai ngan saong kadha “Bruk gaok dom urang dang akaok ka danak dak bruk ngak tasik praong”. Lingiu nyom biai WEF Davos 2019, Thủ tướng Nguyễn Xuân Phúc hu taom gaok Thủ tướng Nepal K.P. Sharma Oli. Jeng dalam harei nan, Thủ tướng hu taom gaok Tổng Giám đốc Gah pablei salih dunya (WTO) Roberto Azevedo. Thủ tướng ndom lac, Việt Nam tuk halei jeng iek praong bruk pablei salih tui jalan ngak saong hukum di WTO; brei thau lac hadei di labaih 10 thun tame WTO, Việt Nam patagok hu bruk sami samar, thau ka bruk ngak di drei.

2 # Akaok Quốc hội Nguyễn Thị Kim Ngân song kapul ngak bruk bahrau nao rivang song brei pandap  Tết ka boh sang hu urang buh pren yava ka  cách mạng, urang njauk jru klik kruac,  dom anek saih kan yam tapa kan kandah dok di ban  Cần Thơ. Di dom labik mai brei pandap, akaok  Quốc hội Nguyễn Thị Kim Ngân ndom lac, Đảng song karja tuk halei jeng hadar tal bruk var klaak rup drei di dom thương binh, bệnh binh, boh sang liệt sĩ, urang hu buh pren yava ka cách mạng. akaok  Quốc hội hu payua panuac tadhau yut dom thương binh, bệnh binh, boh sang liệt sĩ, urang buh pren ka cách mạng, bhap bini ban Cần Thơ tuk halei hu khang kajap pren yava, mbang Tết Nguyên đán Kỷ Hợi trei si haniem phol.

3# Dalam tuk tabung glaong Tết Nguyên đán 2019, dom gah chức năng tỉnh Long An daok patagok pasang iek, langyah rilo labik raong, ngak pandap oh siam. Lingiu di bruk tui iek chất lượng dom kaya pandap ngak meng athur, njam patam baoh kraoh, dalam 5 harei tapa, dom gah chức năng di tỉnh Long An hu nao pasang iek taong abih dom kaya pandap di 14 labik pabak ka darak pasar Tết Nguyên đán 2019, yau ye: tung pabui, chả lụa, chao saong mesin ikan “lia thia”..., pandar pô dom labik ngak nan ngak njauk tui hukum hacih sa-at pandap mbang menyum dahlau di tuk ba tabiak pablei.

4 # Melam  23/1, UBND phường Cầu Kho, Quận 1, ban raya .HCM hu ndom nyai song  38 boh sang dok di chung cư 518 jalan Võ Văn Kiệt piah samar tabiak truh chung cư ni kayua mbuan si jaleih. Tui pasang iek di Sở Xây dựng TPHCM, lô E chung cư 518 Võ Văn Kiệt, phường Cầu Kho, Quận 1 mbleing 45 độ dut song mbaok haluk. Chung cư ni hu padang ngak meng thun 1996 song ngak salah thun 1999, urak ni hu  38 boh sang dok duik rai song labaih  120 urang. Anak bruk mbuan hu bala  di pak ni,  UBND Quận 1 pandar karja pak ni samar panduan ba bhap bini suai di abih dalam mesup harei  24/1 piah khik caga siam mekre, salamat ka bhap bini

5# Melam ini (24/1), kapul dit blong Việt Nam yam tame mbang caoh tứ kết Asia Cup 2019 haong kapul caoh mbanh Japon.  Ini lac mbang ka 2  dalam sajarah, kapul Việt Nam hu mbaok di vòng đấu ini. Yaom lac kết quả yau habar, 90 minit melam ini lac sa dalam dom mbang dit praong abih dalam sajarah dit blong Việt Nam.

Patui di ni dom khau tin dunya

6 # Harei 23/1, Ủy ban Bầu cử Thái Lan brei thau negar ni meda peih bruk  tổng tuyển cử di harei  24/3 tal, piah padang veik karja  dân sự. Ni jeng lac bruk tổng tuyển cử camereip abih di negar ni hadei di bruk  đảo chính quân sự thun 2014. 2 đảng chính trị prong abih di  Thái Lan dahlau deih brei thau urang oh phản đối bruk dui atah jang tukvak palih ruah piah caga  ka bruk tagok rai di Patao Thái Lan. Di bilan dahlau, karja  quân sự Thái Lan hu klaak  lệnh cấm ngan song dom bruk  ngak chính trị piah brei adat ka dom  đảng peih  bruk tranh cử.

7# Brei panuac anak Nghị viện Anh, Thủ tướng Thê-rê-sa Mây harei kabroi 23/01 ndom lac, dom urang padang ngak hukum daok lợi dụng dom jalan njauk ngak di Nghị viện piah dui atah bruk Anh tabiak truh Liên minh châu Âu. Tui amuk, bruk ini oh daong hu hagait ka bruk langyah tavak tavaiy urak ini di Anh pambuak tal bruk tabiak truh Liên minh châu Âu, daok ieu lac Brexit. Panuac di amuk hu ba tabiak dalam tuk di negar Anh dak harei dak hu rilo panuac caong dui atah tukvak puac ka negar Anh tabiak truh Liên minh châu Âu.

8 #Ủy ban châu Âu brei thau  hu  phạt Công ty Mastercard Worldwide jaik 571 triệu EUR, samu  650 triệu USD kayua pacang cakak kein laba bo urang pandar meda hu mbang tui meng dom gilang pariak karei karei  di  Liên minh châu Âu. Tui  Ủy viên châu Âu iek bruk meriak gauk  Margrethe Vestager, hukum di  Mastercard ngak tagok jien bayar meng thẻ, ngak khat lihik ka urang pandar song dom labik pablei rai./.