250 urang lambaok angan je, lambaok ka labaih 27 ribau mikva urang bangsa takik hu mbaok tame Mbang nyaom roya lambaok dom urang bangsa takik tinh Vinh Long mbang ka IV hu peih tabiak di harei kabroi. Mai hu mbaok saong khan brei thau, pato tacei jalan di mbang nyaom roya hu ong Hầu A Lềnh, Uy vien Trung uong Ndang, akaok Uy ban Bangsa. 5 thun tapa, kinh te - xa hoi bhum mikva urang bangsa takik tinh Vinh Long patui veik cak rok patagok biak rilo gah; raidiuk di mikva hu paglaong tagok; ilamo meng kan di dom bangsa jeng hu khik ramik saong cak rok patagok. Jak jeng di Mbang nyaom roya lac asal kadha piah pabak veik prein khang, jak ba, pachreih ba mikva urang bangsa takik khang takai yam tagok peih ngak jayah dom jalan bo Mbang nyaom ba tabiak.

Mbang nyaom roya lambaok dom urang bangsa takik tinh An Giang mbang ka IV hu peih tabiak ngan haong asal kadha “Dom bangsa jumpataom gauk. Salih bahrau, duah jalan ngak bahrau, patagok dom prein khang, mbeik drei yam tame saong cak rok patagok khang kajap” dui pachreih hu 250 urang hu mbaok tame lambaok ka labaih 97.000 mikva urang bangsa takik. Mbang nyaom hu ba tabiak jalan ngak tal thun 2029, jien mek tame di mikva urang bangsa takik tui kuhria mek hu 1/2 jien kuhria dalam tinh, dom baoh sang kathaot trun mala 2% saong pasiam veik dom co so ha tang.

Lien doan Lao dong tinh Binh Duong bahrau ba tabiak jalan ngak cambaih laih dom bruk sangka ka Tet Nguyen dan thun sak ula 2025 ka urang doan vien, urang ngak dalam ban. Tui nan, danak dak “mbang radaih apui kong doan” meda patui veik hu peih ngak, ngan haong 1.000 harak ve radaih apui hu mek meng kadung jien kong doan piah daong ka urang ngak gaok kan kandah di dom tinh gah kreih negar, gah barak hu mai palei mbang Tet. Taong Lien doan Lao dong Viet Nam jeng daong veik 450 harak ve radaih apui saong 80 haraik ve kapar haok ka urang ngak di Binh Duong. Tinh meda peih bruk nao rivang, alin pandap, tadhau ayuh Tết ka urang ngak daok gaok kan kandah.

Melam blaoh, tinh Long An peih pakah Adit Ilamo padhih sukan saong rivang ma-in ngan haong asal kadha “Hatai caong kraong Vàm”. Khan brei thau di harei peih pakah, Bi thu Tinh uy Long An ong Nguyễn Văn Được khan lac, ini lac bruk hu makna praong dalam jalan salih bahrau, mbeik drei yam tagok cak rok, ba drei yam tame dunya piah pambak tabiak dom yaom glaong ilamo di taneh riya saong anek manuac Long An. Ngan haong biak rilo bruk ngak gam haong rilo asal kadha “Yulit Long An salamat, lagaih, dui pachreih”, bruk ini hu peih tabiak kein lagaih piah pambuak gauk gam cak rok patagok, mayaih khan angan je, pambuak haong dom gah ngak mbang blei salih saong bhum palei.

Mintri Y te harei kabroi brei thau lac, meng akaok thun tal urak ini, Viet Nam hu mboh labaih 20.000 urang medil lac ruak ndaih baoh, dalam nan hu jaik 5.000 urang mboh njauk ruak. Dut saong tukvak ini di thun blaoh, dom urang ruak ndaih baoh glaong jang 111 mbang. Dalam 5.000 urang ruak ndaih baoh meng akaok thun tal urak ini hu 5 urang metai. Dalam nan hu 3 urang ruak daok di Ban raya Ho Chi Minh, daok gilac 2 urang ruak pak Ben Tre saong Binh Duong. Mintri Y te hu tabiak jalan ngak peih praong bruk klauk jru vaccine pacang caga ruak ndaih baoh soi - rubela di rilo tinh, ban.

Thu tuong Tay Ban Nha Pedro Sanchez bahrau pathau khan paok daong pabak hu yaom 2,3 ty Euro piah ngak bahrau saong cak rok bhum Valencia hadei di mbang hajan ia sua biak trak damak ka oh bhian mboh rahtabiak di Tay Ban Nha. Dahlau di nan, dom mbang hajan biak khang ba tal hajan ia sua di bhum Valencia, gah timun negar Tay Ban Nha ngak ka labaih 220 urang metai saong 5 urang jeng daok labik. Tui dom urang roh duah ilamo, bruk bien doi khi hau ngak ngak langik tasik biak kan kandah, kanjak jhak bhian rahtabiak. Bruk pandiak tagok di Dia Trung Hai ngak patagok bruk ia par tagok ngak ka hajan khang.

Thu tuong Japon Ishiba Shigeru hu payua tagok Quoc hoi jalan cak rok patagok bruk ngak kong ban dan piah pabak tame kadung jien kanja thun 2024. Tui jalan ngak ini, dalam tukvak camriep, sa paok jien buh tame tagok tal labaih 1.514 ty Yen (samu 10 ty USD) meda hu buh tabiak piah pabak ngak pasiam saong cak rok patagok gah ngak kong ban dan saong dom gah hu pambuak tal. Dalam tuk Nhật Bản daok gaok bruk kurang manuac ngak saong kaya langik tasik biak trak damak, negar ini oh peih ngak hu jalan ba tabiak nan, bo meda njauk pambuak haong gah negar langiu.

          Jaik 200 gru jru Cuba mai tal Mexico piah daong ngak pasiam veik bruk sangka ieik glang prein yava tuk camriep tui sanya pambuak gauk gah y te di dua taneh ia. Dom gru jru, urang roh duah ilamo di gah noi khoa, khoa uranaih saong gah cap cuu, meda hu parabha di 24 bang di Mexico, brei ngak dahlau abih di bhum atah biyah. Yaom lac Mexico tui kuhria hu labaih 2 bác sĩ dalam 1.000 rahra, bier jang dut saong 3,5 gru jru dalam 1.000 rahra di dom taneh ia OECD bo negar ini lac sa taneh ia dalam kapul. Tal urak ini, Cuba hu payua labaih 400.000 urang ngak gah y te nao tal labaih 160 taneh ia.