Jabat Rajaei bahrau hu harak pathau khan panuac tacei pato di Thu tuong Rajaei Phạm Minh Chính di bruk padeih Tet saka aia bilan saong dom harei padeih le dalam thun 2025. Tui nan, Thu tuong Rajaei brei ka Mentri Lao dong – Thuong binh saong Xa hoi pathau khan, Tet Nguyen dan thun ni, urang jakar, cong chuc, vien chuc hu padeih 9 harei, lac 5 harei padei Tet saong 4 harei padeih yaok adit. Padeih meng harei 25/1 tal 2/2/2025 (lac harei 26/12 tal abih harei 5/1 tui saka aia bilan). Jalan ngak ini daong ka manuac ngak bruk hu ralo tukvak jumpataom gaok baoh sang, gauk gar, dui pachreih bruk rivang ma-in, pablei salih pandap kaya.

Page ini, Ban Raya Ho Chi Minh hu brei ka radaih nudac tapa tatua Rạch Đĩa pambuak Quan 7 saong huyen Nhà Bè hu abih tih jien buh tame 512 ty dong. Tatua Rạch Đĩa bahrau atah 318m, praong meng 9m tal 10,5m salih ka tatua klak dak khut, oh daok khang kajap, ngak siam bruk nao mai saong ba prein khang piah cak rok patagok kinh te – xa hoi ka labik gah Meraong Ban raya. Hadei di harei brei nduac radaih, rahra huyen Nhà Bè saong Quan 7 hu brei peih nduac radaih nao mai angaok tatua, dui katut panak saong ngak trun manieng bruk gar jalan di labik jalan Nguyễn Văn Linh – Nguyễn Hữu Thọ.

UB Bhap bini tinh Dong Thap bahrau pok ngak harei patrip pahadar ong Phaok mbang Nguyễn Sinh Sắc, ame Chu tich Ho Chi Minh. Oh lac harei piah pahadar thau dhar phol manuac “pala pajaih cach mang” ngaok bhum palei Dong Thap, bo daok lac sa harei piah maong gilac saong patagok dom yaom glaong sajarah, ilamo di bangsa. Dalam harei patrip pahadar, Mban Jak ba kadung Jien Pathreih bac Nguyễn Sinh Sắc pathau khan bruk jakba rik jien hu 9,6 ty dong, alin hadiah ka 570 paok jien pachreih bac ka anek saih, sinh vien gaok kan kathaot saong ngak ralo bruk pachreih bac di dalam bhum palei.

Gilang pariak Sarak kanja huyen Tu Mơ Rông, tinh Kon Tum hu brei ka labaih 1.230 baoh sang mikva bangsa takik mesraiy jien piah pasiam veik saong padang ngak sang danaok khang kadang. Tu Mơ Rông hu labaih 95% rahra lac mikva bangsa Xơ Đăng, raidiuk di mikva daok gaok rilo kan kandah saong sang taik tahak jeng daok rilo. Kayua yau nan ye, huyen Tu Mơ Rông brei thau, peih tabiak bruk ngak hu siam lagaih Sarak ka 28/NĐ-CP di Rajaei ka sarak brei mesraiy laba lap, peih ngak danak dak bruk ngak negar 1719 daong ka dom baoh sang mikva bangsa takik sang kathaot, jaik kathaot hu sang daok tani tanat.

Trung ta Hoàng Lê Trung, Akaok Kaong an xa tapen nagar Lộc Hòa, huyen Lộc Ninh, tinh Binh Phuoc khan lac, xa hu labaih 45% mikva bangsa takik, raidiuk di mikva pak ni, abih di nyu nan lac mikva bangsa takik daok gaok kan kathaot. Kaong an xa saong karja bhum palei pathau khan ka mikva ngak tui hukum, cakrok patagok bruk ngak mbang tani tanat rai diuk. Gam tui di nan jeng bhian pambuak haong dom urang taha dalam palei, urang hu angan je, dom halau janeng piah mayai khan ka mikva ngak bruk siam gheih, khik ramik bhum palei, khik siam makre ka rahra.

Trung Quoc saong Nga bahrau ini hu peih mbang nyaom biai akaok meti di Tieu mban pambuak jalan tasik Bac Cuc, sanya jhul khang bruk pambuak saong patagok dom jalan tasik di dua taneh ia dalam bhum ini. Tieu mban pambuak jalan tasik Bac Cuc lac sa jalan ngak bruk bahrau hu padang dalam labik Uy mban nyaom biai yaok mbang di Thu tuong Trung Quoc saong Nga. Ini lac bruk hu makna piah dua negar jhul tagok bruk pambuak patagok jalan tasik Bac Cuc saong lac sa kênh hu makna piah rabha ilamo saong duah thau bruk patagok haong gauk di dua negar.

Pusak Trun manieng dom kanjak jhak di bala di taneh riya saong ceik apui Indonesi bahrau kakei ka janih ahaok apar tuk ceik apui Dukono pak tỉnh Birak Maluku nagar pruh tabiak. Mbang apui pruh tabiak ngak abau patih pruh tagok glaong 4.600m saong nduac tapa gah Pai Barak negar. Jabat pasang iek Ceik apui pathau panuac kakei sambo mau kanjik katam. Pakauk ahaok apar di bhum hu ban kinh 5km vil ceik apui, manuac ndih ceik saong rahra daok jaik vil taphia 3km oh tame ngak bruk ma-in, gam tui di nan jeng kakei rahra njauk cuk pataik pacang mbaok tuk abau papar.

Bruk nao mai di rahra di ban ine Seoul, Han Quoc daok gaok kan kandah biak trak damak kayua rabuk ia patau akaok bilan dalam labaih meteh abap tapa. Harei kabroi mboh tuyet laik kapal labaih 16cm lac tanut glaong abih dalam bilan 11. Rabuk ia patau laik trun jaik abih negar Han Quoc, ngan haong dom labik gaok kan kandah mboh tuyet laik meng 10-23cm. Ini lac lac rabuk ia patau praong abih bo Seoul gaok dalam 52 thun tapa.