Brei panuac di Nyaom roya dom bangsa takik tỉnh Bạc Liêu mbang IV harei 23/11, Akok mentri Chu nhiem UB Bangsa  Hầu A Lềnh tadhau ayuh dom bruk ngak hu jak jeng siam mekre di Đảng bộ, karja saong bhap bini dom bangsa tỉnh Bạc Liêu dalam tukvak tapa, abih di nyu lac meyaom bruk kham merat  di urang bangsa takik thau daong prein, sa hatung hatian haong gauk ngak brei bhum urang bangsa takik saong bhum ceik dak harei dak salih patagok siam mekre, daong prein haong rahra dalam negar dalam bruk salih birau, patagok saong khik caga taneh ia. Mbiah tal ini, taong abih xã di bhum urang bangsa takik  di tỉnh Bạc Liêu hu jalan radaih oto peih tal pusak; labaih 99% baoh sang hu pandar talei dien negar…Bruk khik ramik, patagok ilamo meng kan di dom bangsa hu caik hatai sangka.

Ban Pleiku, tinh Gia Lai hu peih ngak samu dom jalan langyah bruk brei trun kathaot khang kajap, brei caik hatai sangka tal mikva bangsa takik, yau ye: brei Bao hiem y te ka abih tih baoh sang kathaot saong jaik lathaot; oh mek jien bac atau trun jien bac ka anek kamuan urang bangsa takik dalam baoh sang kandah; daong dom urang mbang tui sarak hu mesraiy phun jien laba lap…Dom sarak nan daong pasiam veik raidiuk di urang kathaot dalam bhum. Ban Pleiku hu peih ngak sa danak dak karei piah jhul tagok bruk brei trun kathaot khang kajap, paglaong raidiuk di rahra, abih di nyu nan lac di dom palei mikva bangsa takik.

Tui Yam ndoc So Tai nguyen saong Moi truong tỉnh Long An, bruk peih taneh piah ngak dom danak dak patagok kinh te - xa hoi di bhum palei hu peih ngak siam mekre, mbiah tal ini, hu ngak salah bruk ba tabiak di thun 2024. Yau nan min, daok kan kandah ka phun jien mek veik taneh jalan ĐT.826D, ĐT.830E…saong dom danak dak daok tavak, dui atah min oh ka salah bruk peih mbaok taneh. Tỉnh Long An tacei pato dom đơn vị  brei hu jalan peih ngak cambaic laic ka  bruk peih taneh, tui nan jhul pasamar  bruk peih ngak dom danak dak dalam nan hu danak dak karja gam danak dak langiu kadung jien karja.

Page ini, di sang bac Tieu hoc Giồng Ông Tố, Ban Thủ Đức, TP.HCM, Uy mban Salamat jalan mbak negar pambuak haong Mentri Pato megru, Kongti Honda Viet Nam peih bruk alin hadiah 1,7 trieu mot pacang khik akaok ka anek saih tal 1 dalam taneh ia. Langiu di taduan hu mot pacang khik akaok, dom adei anek saih daok hu pato pakai ka bruk salamat jalan mbak, meng nan pajeng hu ilamo saong bruk randap tuk halei jeng me-om mot siam kajap pacang khik akaok tuk daok angaok radaih nduac di jalan mbak. Tapa dom bruk pathau khan, bruk cuk mot pacang khik akaok di uranaih (meng umo 6 tal 15 thun) dalam labik TP.HCM meng 40% dalam thun 2017 ye tal ini hu tagok jaik 75%. (VOV)

Page ini, phien toa langyah Bí thư Tỉnh uỷ Bến Tre dahlau diah lac Lê Đức Thọ, Yam ndoc Công ty Xuyên Việt Oil dahlau diah Mai Thị Hồng Hạnh gam haong 13 urang pambuak  tal bruk ngak suan rah tabiak di Công ty Xuyên Việt Oil. Ong Lê Đức Thọ - Bí thư Tỉnh uỷ Bến Tre dahlau diah njauk Vien Pasang iek ba tabiak 28-29 thun guk kayua mbang jien 600.000 USD di muk Mai Thị Hồng Hạnh Yam ndoc Công ty Xuyên Việt Oil saong dius “ pambak tame bruk ngak di drei piah mbang jien urang karei” labaih 22 tỷ 100 trieu đồng. Muk Mai Thị Hồng Hạnh njauk taong bhat 30 thun guk saong bayar veik taong abih bruk khat lahik labaih 1.463 tỷ đồng.

Lao raok hu labaih 3,3 trieu mbang tuai damuai dunya dalam thun ini, tagok 23% dut haong tuk ini thun dahlau, brei mboh bruk dui pachreih tuai damuai dak harei dak ralo yulit negar Lao ngan haong dunya. Dalam nan, Thai Lan patui veik lac darak pasar praong abih di Lao, patui veik lac Viet Nam, patui veik lac Trung Quoc. 3 darak pasar ini rik daong hu jaik 70% kuhria abih tih tuai damuai dunya mai tal Lao. Yulit lac bruk hadah krah di kinh te Lao tuk dui pachreih labaih 5 trieu mbang tuai damuai dalam negar saong dunya, ba mai jien mek tame labaih 1 ty USD. (VOV)

Tui Jabat Khik iek Thiên văn, Địa vật lý saong Khí quyển Philippines daok iew lac PAGASA, Philippines kuhria mboh ribuk tuh tame taneh ia ini takik jang dom thun dahlau, min dom mbang ribuk nan khang jang, ngak bala trak jang. PAGASA kakei dom mbang ribuk tuh tame Philippines dak harei dak  khang jang, bala trak jang dalam dom thun anak tal kayua langik tasik salih karei daka harei dak jhak. Yau nan ye, bruk pacang caga siam abih di Philippines brei sap pagap saong dak padang jalan piah pacang caga dom ribuk khang suai lavik.

 Bahrau ini, Akaok mentri Ngak bruk gah jao adat hukum ka bhap bini di Indonesia ndom lac bruk me-in mbia online di negar ini jeng sa bruk cuang kandah tuk hu jaik 9 trieu urang Indonesia hu mbaok tame bruk me-in mbia online. Bruk ini ngak kurang urang ngak bruk, alah metah oh siam lagaih saong ngak jeng bruk taong paoh mesao gauk dalam baoh sang, mbuan tagok jeng bruk rao jien saong daong ka dom bruk ngak suan hukum karei. Rajaei Indonesia daok kham merat langyah asal kadha ini, hu dom bruk pacang cakak dom blah web saong mek kareik dom urang dalam dom talei ngak suan hukum./.