Tui Gilang pariak Ngak nong saong Patagok palei pala (Agribank), tal pauac bilan 10 thun 2024, kuhria abih tih jien mesre di ĐBSCL sumu 262 birau tỷ đồng, meblah labiah 21% jien mesre gah ngak nong di Agribank. Tuk Gilang pariak Karja tacei pato peih ngak danak jien mesre ka gah ngak glai, kaya dalam ia, Agribank hu tut angan peih ngak danak dak brei mesre laba lap ngan haong bruk ngak ini kuhria tui jien 3.000 tỷ đồng, laba biar. Jhul pakhang bruk brei mesre ka gak kaya nong oh lac jalan langyah  jien padai, bo daok sanya suai lavik, rik tame peih ngak brei cakrok patagok khang kajap, khik tani tanat raidiuk bhap bini saong paglong kaya nong di bhum ĐBSCL.

Tatua Nhơn Trạch daok dalam danak dak 1A jalan Vành đai 3 ban raya Ho Chi Minh kuhria brei pambuak 2 akok tatua dahlau Tet Nguyen dan 2025. Danak dak tuk salah blaoh daong ngak katut tukvak jeng yau lagaih ka bruk nao mai meng huyen Nhơn Trạch (Dong Nai) tal Ban raya Ho Chi Minh saong Binh Duong, patagok bruk pambuak dom đô thị vệ tinh, peih praong taneh, yitvu, pablei salih, kong nghiep, logistics... ka dom tinh, ban dalam bhum. Abih di nyu nan lac, danak dak daong neh rabha jalan meng atah saong brei takik gak gar jalan dalam Ban raya Ho Chi Minh, dak harei dak daong salah blaoh jalan Vành đai 3 Ban raya Ho Chi Minh.

Dalam tuk po bein durien di palei Hiệp Ninh, xã Hiệp Đức, huyện Cai Lậy, tỉnh Tiền Giang brei takik baoh ye bein phun durien di ong Trần Văn Nhựt tamuh hijao, brei rilo baoh, pablei hu yaom glong. Ngan haong 4 kong taneh pajaih durien Trần Văn Nhựt birau paik hu labaih 6 tấn baoh. Ngan haong yaom pablei 155 ribau đồng sa kilo, ong duah hu jien jiak 1 tỷ đồng, laba labaih 800 trieu dong. Dahlau di nan ong Trần Văn Nhựt thau pandar njauk ilamo ky thuat  tame pala drak, brei pandar khak drak hữu cơ vi sinh. Abih di  nyu, bilan durien ini urang jakar Vien phun mbang baoh Gah Merong saong Kong ti co phan Nam Long Xanh daong khak, ilamo pala drak ka mikva.

Dom tinh Bhum taneran kraong Cuu Long bahrau padang nyaom biai “Ba tame bruk ngak, yaih khan yulit di Quang Ninh. Bhum taneran kraong Cuu Long lac sa bhum taneh riya siam hu ginup rilo labik rivang me-in dui pachreih tuai damuai. Abih di nyu nan lac, bhum taneran kraong Cuu Long lac 1 dalam 6 bhum hu quy hoạch patagok bruk yulit dalam taneh ia haong kein lagaih bruk patagok dom pandap panda “yulit sinh thái, patagok dom yaom kaom ilamo kraong ia, menuac, bein baoh kayau, padeih padei”…lac dom bruk karei piah daong pabak, patagok bruk pambuak siam lagaih di yulit bhum taneran kraong Cuu Long saong dom tinh gah Barak.

So Ilamo, Padhih saong Yulit tỉnh Đắk Lắk pambuak haong Mentri Ilamo, Padhih saong Yulit peih tal pasram, pabak ilamo pato ilamo phi vat the saong peih ngak Bruk pambuak drap ar ilamo phi vat the “Labik ilamo kong chieng Tay Nguyen” dalam bruk yulit drap ar Buôn Ma Thuột - Đắk Lắk. Hu pasram, ilamo urang pasram hu klak rabha ilamo hadah krah, bruk patagok ilamo meng kan di bhap bini labik drei daok. Tamat tal pasram, dom urang nan  thau ba tame pandar Bruk nan tame bruk ngak yulit drap ar Buôn Ma Thuột - Đắk Lắk di bhum taneh ini.

Langik njom nerak daok dalam tanut njauk sangka iek praong di ben ine Ulan Bator di Mông Cổ. Urak ini taka so yava langik glaong tapa tanut salamat hu Kapul Y te Dunya pachreih. Njom nerak yava langik lac asal kadha cuang kandah dui suai atah di Ulan Bator hu labaih meteh dom urang daok dalam ban ine daok dalam dom baoh sang kadai oh hu ia hacih, pandap kaya paghang pandiak saong tathuak ia nerak. Bilan la-an, rahra pambak tame menyek hu tapa langyah saong dom kaya nbuan khuah apui karei, asal kadha ini rilo meng lac ngak njom nerak.

Indonesia rik tame kareik labaih 7.500 tai khoan gilang pariak lac hu pambuak tal dom urang ngak po ma-in cờ bạc mbang jien. Indonesia daok jhul pakhang dom jalan pacang bruk ma-in mbia online kayua bruk buh jien tame saong mek tabiak dreih yau ma-in mbia daok tagok ralo di grauk labik dalam negar. Di  Indonesia, ma-in mbia, yaom lac online atau langiu, lac suan hukum. Dom urang hu mbaok tame  saong  peih bruk ma-in mbia lac njauk dius glong abih 10 thun guk saong taong bhat 25 trieu rupial Indonesia.

Jabat Kuhria mboh dahlau Langik tasik Phần Lan brei thau, mbang rabuk tuyết meng camereip dalam bilan rabuk thun ini pagam tui angin khang ngak ka 80.000 baoh sang di negar Phần Lan ini laik tame bruk lahik ndien saong klaih klaoh bruk peih nduac radaih angaok jalan. Ini lac sa dalam dom mbang rabuk tuyết khang abih dalam dom thun tapa di Phần Lan. Langik jhak jeng ngak kan kandah praong tal jalan mbak karei, dalam nan hu jalan radaih apui saong jalan kapal haok. Rilo mbang ahaok par dalam dunya brei padeih kayua langik jhak./.