Njauk pagol pahadar 42 thun harei Gru pato Viet Nam, page ini 20/11 dom dom urang Quoc hoi ginum biai ka danak dak Hukum Gru pato. Dalam nan, Quoc hoi hu ginum biai tui kapol nyaom, dom urang lambaok vakil caong khin sarak caga  brei hu dom sarak ka dom cei gru nai gru njauk lagaih haong bruk ngak halan hatain di cei gru nai gru; tui nan hu sarak pachreih gru pato di bhum urang bangsa takik saong bhum ceik, bhum kinh te - xa hoi biak kan kandah…Urang sangka tal bruk ramik veik dom sarak ngan haong gru pato langiu karja; gru pato hu bac mek hu chuc danh, tanut chuan bruk ngak njauk haong ilamo bruk ngak min khik hu bruk asar kadha karei di gauk.

Peih ngak tui jalan khik brei tani tanat yaom pandap pandar thun 2025, abih di nyu lac tuk Tet Nguyen dan nasak Lanaih, tỉnh Bình Dương brei labiah 13.700 tỷ đồng piah khik tani tanat yaom kaom, pataom tame dom pandap pandar yaok harei yau brah, rilo, baoh manuk ada, menyek mbang, saradang… 17 doanh nghiep hu tame danak danak  pablei khik yaom hu sanya  pabak pandap siam, yaom tani tanat, biar jang meng 5 tal 10% dut saong langiu darak. Dom sở, gah, karja palei brei pasang iek, yaom darak pasar langyah dom bruk ngak suan.  Pachreih bhap bini hu mbaok tame tui iek.

Kapol urang kumei huyen Giồng Riềng, tỉnh Kiên Giang birau peih nyaom darak zero jien dong uan raok Chol Chnam Thmay thun 2025. Yaok urang mai darak hu blei dom pandap pandar yaok harei  yaom zero jien. Xã Bàn Thạch hu 87 baoh sang kathaot, baoh sang urang Khmer meblah 60%, raidiuk  di bhap bini dalam xã daok rilo kan kandah, yau nan ye “ Nyaom darak zero jien” piah klak rabha kan kandah haong mikva dalam xã, tapa nan pambuak saong pambak praong dom hatai halan hatain hu tal rahra bhum atah bayah.

So Kong thuong Binh Thuan ba tabiak jalan peih ngak  Nyaom darak  pandap Viet ka bhum ceik, bhum atah bayah, bhum urang bangsa takik di huyen Tánh Linh ngan haong kadha “ Urang Viet Nam brei pandar pandap Viet Nam”. Tui kuhria Nyaom darak peih ngak di bilan 11 di xã Gia An, huyện Tánh Linh. Hu labaih 10 – 15 doanh nghiep hu mbaok tame Nyaom darak meng 25 tal 30 labik pablei pandap. Tapa nyaom darak ini hu daong ka mikva urang bangsa takik lagaih hu pandar pandap Viet Nam siam, yaom lap.

Dom harei tapa, ia tasik ndik tagok glong veik ngak dauk dom sang bac di tỉnh tỉnh Cà Mau dalam ia, kan kandah ka bruk nao mai, bac megru di anek saih, gru pato. Di huyen Năm Căn, ia ndik ngak dauk 3 sang bac, ia dauk langiu mblang saong tame dalam duk bilik bac. Ia ndik tagok glong ngak kan kandah tal raidiuk, bruk ngak mbang di bhap bini, abih di nyu nan lac dom labik daok tapen tasik. Tui Rayo kuhria iek langik tasik  tỉnh Cà Mau, mbang ia ndik ia bulan porumi meda dui atah tal 21/11 saka ia harei.

Rajaei Thái Lan brei 10.000 baht (labaih 289 USD) jien tapak ka yaok urang labaih 4 trieu urang umo taha di taneh ia ini tuk Tet Nguyen ndan di kaok bilan 2 thun 2025. Tui Mentri Jien padai Thái Lan, paok jien nan lac vaktu ka 2 di danak dak brei jien di Rajaei saong abih labaih 40 tỷ baht  sumu 1,16 tỷ USD. Vaktu ka dua, dom urang umo taha saong khin hu jien, dalam tuk daong jien ye dom nyaom urang karei meda hu daong hadei di ini, meng bilan 4 tal bilan 6 thun hadei.

Ia ribuk tagok glong 4m ngak dauk dalam ia yaok ribau baoh sang daok di gah Barak Philippines daok gaok ribuk Manyi ngak khut tayak. Manyi lac ribuk mbang ka 6 tuh tame Philippines dalam bilan blaoh, ngak labaih 1 trieu urang njauk panduan ba nao daok labik karei dahlau di nan, ngak tayak dom baoh sang tayak, ngak lahik ndien saong metai takik abih lac 8 urang. 6 mbang ribuk tuk tame patui gauk ngak metai takik abih lac 171 urang Philippines, yaok ribau urang lahik sang danaok, kua nao abih phun pala saong athur raong. Bruk langik salih karei daok ngak rilo ribuk, hajan praong, ia sua saong ribuk hangin catang. 

Hadei rilo harei hajan, ban New York di Mỹ hu ba tabiak bruk brei thau dahlau tua riya akaok meti kuhria dalam 22 thun tapa, tui nan brei thau ka bruk mbuan apui khuah glai. Ban New York  brei padeih danak dak ramik pasiam  jalan ba ia yaom 2 ty USD, ngak kurang ia pabak ka dom binek. Meyah bruk pandiak bhang veik, karja patagok pakat kakei dahlau jeng drah samar chip, iew brei pandar ia patak pataom./.