Thu tuong Phạm Minh Chính birau hu harak iew brei jhul khang veik bruk ngak brei oh daok baoh sang taik tahak dalam negar. Dalam nan dom bhum palei brei tacei pato padang ngak bahu Mban tacei ba peih ngak brei oh daok baoh sang taik tahak. Tui nan, pataom tame peih brei phun jien chip ngan haong phun jien daong, jak ba hu piah ngak sang ka urang kathaot kan kandah ka sang daok. Karja dom palei brei caga bruk pambuak blaoh, ngak bruk haong dom gah hu sanya daong peih ngak; brei ngak sumu tukvak, siam lagaih, njauk bruk, juai ngak palai pajua jien ndo, pambak tame mbang jien padai juai.

Meng akaok thun tal ini, meng Kadung jien “Daong urang kathaot” saong jak ba manuac sia rik jien tame, Uy mban Mat tran Negar Viet Nam dom pakat ban Can Tho hu padang saong pasiam veik labaih 400 baoh sang Jum pataom. Tukvak anak tal, langiu bruk jhul khang jum pataom, jak ba rahra ye bruk ngak brei trun kathaot, sangka ka urang kathaot saong dom urang mbang tui sarak jeng hu Uy mban Mat tran Negar Viet Nam dom pakat ban Can Tho padang rilo danak dak lagaih yau: jak ba rik daong jien piah padang tatua palei pala, jalan palei pala, padang dom jalan palei hu hadah - hijao - hacih sa-at - gheih ghang; oh daok baoh sang taik tahak, padang ngak sang jum pataom ka dom baoh sang kathaot.

Piah sangka kuhria ka dom baoh sang urang bangsa takik raidiuk kan kandah, Kapol urang jakar tỉnh Bình Dương hu mai rivang, alin pandap ka 2 baoh sang kathaot di huyen Dầu Tiếng nan lac: sang sa-ai Lâm Thị Trang (bangsa Chơ Ro) di xã Minh Hòa saong sang sa-ai Lư Sư Phanh (bangsa Lo) di xã Minh Tân. Kapol rajakar hu rivang saong alin dom pandap hu daong ka raidiuk, jak ba dua baoh sang nan yam tapa kan kandah, kuhria ka dom anek bik mbang bac, kham ngak mbang yam tagok tani tanat raidiuk.

Tinh Dong Nai bahrau hu veik 15 pandap mek hu angan OCOP 4 patuk; 9 pandap jaik mek hu 5 patuk saong 2 pandap hu lagaih tagok 4 patuk. Dalam thun ini, dalam tinh hu 53 pandap OCOP di 36 gah po ngak tabiak hu mbang akaok meti hu mbaok tame ngak danak dak OCOP. Dom pandap panda nan hu ngak meng asar pa-aok blait, cacao, jru cavao, dom baoh kayau that saong kaya nong karei…Rilo pandap panda hu pagam patuk OCOP hu siam bingi, gheih ghang, njauk haong hatai caong piah ngak pandap alin hadiah. Danak dak dui pachreih hu urang kamei hu mbaok tame saong patagok siam bruk di urang kamei di bhum palei, dom hop tac xa ngak nong, dom gah ngak mbang pablei salih di bhum palei.  

Parang iek thaot binguk ngan haong kadha“ Sambo mau dom bangsa takik Viet Nam” birau peih ngak di Ha Noi. Parang iek 200 blah thaot di 87 urang cih, brei mboh  dom siam gheih karei di 54 bangsa Viet Nam, meng khan ao ngui cuh, adat cambat, tanarakun, bruk daok dang dalam raidiuk, akayat nghe thuat, rija roya meng kan, brei ka urang maong iek hu mboh blah rup cih hu ginup ralo janih saong hadah hadai ilamo siam gheih di 54 bangsa Viet Nam.

Ấn Độ dalam harei hadei lac jeng sa negar hu kinh te cakrok patagok samar drah abih dalam Kapul dom Negar kinh te patagok saong bahrau danei angan dalam dunya (G20), haong GDP cakrok patagok samar hu kuhria mboh lac 7% dalam thun ini. Hadei nan lac Indonesia, ka 3 lac Trung Quoc. Tanut cakrok patagok njauk caik hatai sangka brei mboh dom sarak kinh te di Ấn Độ saong prein langyah dom kan kandah dalam dunya biak siam lagaih. Dalam bruk khan brei thau dom kein lagaih dalam dunya bahrau abih, Moody's taong yaom lac kinh te di Ấn Độ daok dalam “Jaman ameh”.

 Urang jakar ngak praong di Thái Lan brei thau, dalam thun ini dom tai khoan pachot pagat di MXH Facebook ngak khat lahik 718 trieu baht sumu 20 trieu USD. Meng akok thun mbiah tal ini, hu labaih 1,1 trieu mbang urang meriak pathau iew phone drah samar. Labaih 348.000 tài khoản Facebook dreih pachot pagat njauk brei padeih. Facebook lac labik hu rilo urang pambak tame ralo abih, hu jaik 27.000 mbang. Langiu di nan, iew phone, padang blah web ja, ma-in TikTok saong rilo jalan online karei di gauk kol nyu hu pandar piah pagat.

Tong thong Mỹ Donald Trump bahrau ini brei thau ka  jalan ngak bruk samar chip di negar, pandar bol lin piah patrauk dom urang langiu tame daok oh njauk hukum. Dalam tukvak maraik ngak Tong thong, ong Trump pagun sanya brei pandar Bol lin pasang iek negar daong bruk tiaok dom urang nan. Dom urang ilamo ndom lac bruk ngak yau nan brei mboh sa bruk salih karei ngan haong bol lin, bhian oh hu mbaok tame dom asal kadha ngak tui hukum di taneh ia./.