Akok mentri Kong thuong Nguyễn Hồng Diên birau hu sarak tacei ba bruk ngak tabiak sumu bruk blei tame, tani tanat darak pasar puac thun 2024 saong tuk Tet Nguyen dan thun nasak Lanaih 2025. Tui nan, caong khin So Kong thuong dom tinh, ban, dom Kong ty, dom Hiep hoi gah pandap panda njauk brei tui iek darak pasar, bruk ngak tabiak saong bruk blei pandar dom pandap njuak brei hu, abaih di nyu lac dom pandap hu rilo urang caong blei atau tagok yaom glong piah caga dahlau jalan ngak tabiak, khik bruk ngak tabiak saong bruk blei pandar sumu gauk, tani tanat  darak pasar, oh caik kurang pandap, klaik klaoh  ba tal tagok yaom dalam tuk puac thun  saong Tet Nguyen dan.

Urak ini, mikva pala bingu di dom bhum palei di tinh Dong Thap, Ben Tre, Tien Giang…daok jal val sangka phun bingu ngak mekre pablei tuk Tet Nguyen dan nasak Lanaih 2025. Mbang bingu Tet 2025, dom po bein roh duah pala dom pajaih bingu bahrau pabak njauk hatai caong dak harei dak glaong di tuai damuai. Min, thun ini langik oh lagaih kayua hajan ribuk kan si thau dahlau. Kayua nan, urang pala bingu ngak mekre brei duah thau dahlau ka langik tasik meng khau tin di gah chuc nang ka  langik tasik piah hu jalan pala siam lagaih.

 Piah urang kathaot hu tani tanat  raidiuk, tỉnh Ninh Thuận kham merat tal puac thun ini padang ngak hu 500 baoh sang; tui nan ngak oh daok baoh sang taik tahak, jaleih ka-iar, ka urang kathaot, jaik kathaot di thun 2025. Piah klak rabha dom kan kandah ka urang kathaot ka sang daok, Bilan tabung glong “Daong ka urang kathaot”, Akok UBND tỉnh caong khin taduan hu bruk daong tame di bhap bini piah ngak sang daok ka urang kathaot, jaik kathaot samar tani tanat raidiuk.

Kapul Pachreih bac tinh Kon Tum bahrau alin hadiah ka anek saih di 7 sang bac dalam ban Kon Tum hu 150 paok jien saong 15 sruh radaih juak kuhria abih tih yaom jien labaih 25 trieu dong ka dom anek saih baoh sang kathaot. Dom paok jien bac alin hadiah hu kapul Pachreih bac tinh Kon Tum jak ba meng Kapul langiu Rajaei Xuân – Cong hoa Prang.

Parang iek thaot binguk ngan haong kadha “ Bhap bini dom bangsa sumu gauk, jum pataom, sami samar hadah karah, dak padang saong patagok TPHCM ilamo, salih birau, anit ranam” daok peih ngak di Quan 1, TPHCM saong dui atah tak harei  06/12/2024. Parang iek 83 thaot binguk  tui 3 kadha “ Bhap bini dom bangsa takik daong taneh ia Viet Nam salamat, ngak po eng drei, yasa ”, “ 53 bangsa takik jum pataom, gam haong TPHCM patagok, prang iek piah pok meyaom bruk rik daong saong jum pataom di bhap bini dom bangsa daok diukrai di Ban raya HCM. Tapa nan brei  mboh bruk anit taneh ia, bangsa anit ranam gauk saong dom bruk ngak hu jak jeng hadah mbaok meta dalam bruk dak padang Ban raya ilamo, anit ranam.

 Urang pan akaok negar Trieu Tien ong Kim Jong Un hu ndom meyai tal bruk Mỹ patagok bruk cuang kandah saong pacuh, kakei dahlau bruk kaoh pulao Trieu Tien oh ka hu halei daok dalam bruk mbuan mesruh metak hat nhan yau urak ini. Dalam kadha hu ndom dalam mbang parang iek quan su di Bình Nhưỡng, urang pan akaok Trieu Tien brei thau meng ilamo bac hu dalam mbang ndom bai haong Mỹ brei mboh negar ini tuk halei jeng pandar dom sarak “dom negar cagar” ngan haong Bình Nhưỡng saong kadha ini oh hu salih karei.

Rajaei Australia daok pok tagok sarak dự thảo Hukum Nhap cu ramik pasiam veik, tui nan, taneh ia ini meda patrauk 80 ribau urang negar langiu mai taneh ia ka klau. Dalam hukum Nhap cu ramik pasiam veik daok hu pok tagok Quoc hoi, Rajaei Australia iew brei bayar jien ka taneh ka klau njauk hatai taduan dom urang negar langiu patrauk tabiak truh Australia. Hukum nan hu jao brei adat oh lac dom urang jakar rajaei saong dom urang negar ka klau pambuak tal bruk panduan ba nao jeng yau ngak bleih salih dom panuac ba tabiak tui urang tị nạn.

  Takik abih 38 urang metai saong 29 urang njauk rambuac hadei tuk rilo urang cuh phao tame dom radaih pajeng tuai damuai di bhum Pai Barak Pakistan. Bruk cuang kandah ini hu rah tabiak dalam rilo thun di urang tui Islam Shia saong bol bhap tui Islam Sunni hu pan phao kraong pambuak tal bruk meblah taneh riya. Dalam bilan 8 meng blaoh, 23 urang metai hadei tuk kateik geik tabiak truh di radaih saong njauk phao cuh meng dom urang daok di bhum Pai Meraong Pakistan. (VTV)