Tinh uy Soc Trang bahrau peih ngak bruk tayah sang taik tahak ngaok bhum palei tui tacei pato di Thu tuong Rajaei ka bruk jhul samar piah tayah sang taik tahak ngaok bhum dalam nagar. Taeng Mban Bangsa tỉnh dang akaok, pambuak haong UB Bhap bini pakat huyen samar hu jalan piah lang yah kan kandah, tavak tavaiy di bruk piah daong sang daok tui Danak dak jalan ngak Nagar cak rok kinh te - xa hoi bhum mikva bangsa takik saong bhum ceik thun 2021 – 2030; ba tabiak jalan haong Mban Tacei pato jak ba, rami ramik veik meng phun jien daong di rahra piah samar tayah dom sang taik tahak.

Salam uan Harei Nyaom roya dom urang lambaok dom Bangsa takik Ban Raya HCM mbang ka IV, Mban Bangsa Ban raya HCM pambuak haong Uy mban Mat tran Negar – Mban jak ba “Ngak ka urang kathaot” Quan 8 gam haong dom gah daong bahrau peih ngak Harei jao Sang anit ranam ka sang ong Lữ Triều Hưng, bangsa Laow daok di 435/26 Dã Tượng, phuong 10, Quan 8. Baoh Sang anit ranam hu abih tih yaom jien 60 trieu dong daong sang ong Lữ Triều Hưng hu sahanang hatai ka sang daok, pataom prein tame patagok bruk ngak mbang, tabiak truh kathaot.

Thun 2021 – 2024, Ban Pleiku, tinh Giai Lai hu parabha jaik 14 ty dong piah ngak Danak dak bruk ngak nagar patrun kan kathaot khang kajap piah lang yah ka dom kurang ralo janih dalam rai diuk di sang kathaot, jaik kathaot. Phun jien hu Ban Plei Ku pandar biak lagaih, ngan saong dom danak dak angan je, lagaih haong jalan ngak mbeng, bhap bini di bhum palei saong dom hatai caong di dom baoh sang kathaot, sang jaik kathaot. Hadei 4 thun peih ngak Danak dak bruk ngak nagar patrun kathaot, Ban Pleiku hu patrun taka baoh sang kathaok trun meng 346 daok 149 baoh sang, mablah 0,24%.

Ngan haong Kadha “Ikan tra Dong Thap: Bruk ngak hijao – Yaom kaom hijao”, Harei roya ikan tra thun ini rah tabiak jak jeng, siam makre. Harei pakacah pandap mbang dom kaya meng ikan tra haong kadha “Gheih siam haong dom kaya pandap mbang ikan tra Dong Thap”, hu 29 kapul ngan haong rilo pandap mbang hu ngak tabiak piah yaih khan tal tuai damuai mai rivang ieik. Bruk ngak dom pandap mbang meng ikan tra jeng lac sa jalan ngak piah ka pandap mbang ini hu pablei dalam taneh ia siam jang dalam harei hadei. Tui Kuhria dalam thun ini, gah pandap ini hu ba mai ka tinh Dong Thap 650 trieu USD.

Urang raong ikan mbaiy ngaok kraong tinh Tien Giang buai sambai kayua jalan pablei tabiak hu siam lagaih, yaom pablei glaong, jien mek tame hu ralo. Ikan Ndieu hong raong dalam mbaiy urakni hu yaom meng 50 – 52 rabau ndong/kg, tagok jaik 20 rabau ndong/kg dut haong tukvak ini di thun dahlau. Tui yaom pablei ni, sa kg ikan mikva mek jien laba labaih 8.000 ndong. Ni lac yaom biak glaong dalam 3 thun tapa, nan abih tih mikva raong ikan Ndieu hong meik jien laba hu mbiah. Dom janih pajaih ikan raong dalam mbaiy karei yau: ikan trắm, mba sa, ikan caip…yaom jang tagok glaong.

Xin chuyển sang phần tin thế giới:     

Rilo danak dak hu rah tabiak di grauk labik dalam negar Mỹ Lating piah pachreih tui Harei Dunya yah klak bruk taong paoh ngan haong urang kumei, dui pachreih hu mbaok tame di rilo rahra Mexico, Argentina, tal Costa Rica saong bhum tapen Santa Teresa… Lien Hop Quoc brei thau lac, yaok harei di My Latinh saong Caribe jeng daok takik nyu 11 urang kumei daok gaok bruk taong paoh. Harei Dunya yah klak bruk taong paoh ngan haong urang kumei oh lac piah pahadar dom urang gaok taong paoh bo daok jak ba ngak bruk samar di dom rajaei saong bol bhap dunya piah padang bhap bini hu salamat saong samu gauk.

Ba Lan hu khan jalan buh jien tame 240 triệu đô la piah ngak bruk patagok bruk glaow akaok kayua manuac ngak tabiak (AI) piah patagok prein maraik gauk saong pabak bruk khik kajap thuk siam nagar. Bruk ngak ni hu ba tame di rai diuk bhap bini saong bol lin piah daong Ba Lan jieng sa ia nao dahlau abih chau Au di bruk salih bahrau AI. Phun jien glaow krah hadah kayua manuac ngak tabiak nan sa janih dalam dom marat prein piah caga ka Ba Lan dang anak dom cuang kandah di kaong nghe.

Urang dang akaok negar Trieu Tien ong Kim Jong Un bahrau ini hu pasang iek bruk padang labik raong kaya tasik di ban lamnge Sinpho, tinh Nam Hamgyong. Di pak ini, ong Kim Jong Un ndom ka bruk brei salah blaoh danak dak dahlau di mbang nyaom biai Ndang dalam bilan anak tal saong ieu dom bhum palei peih ngak siam lagaih kaya langik tasik piah eng drei cak rok patagok. Dahlau di nan, ong Kim Jong Un jeng hu ba tabiak jalan ngak padang sang mac bahrau di 20 ban piah paglaong raidiuk di rahra./.