Peih ngak Danak dak bruk ngak negar ka bruk cak rok patagok kinh te - xa hoi bhum mikva urang bangsa takik saong bhum ceik, meng thun 2021 tal urak ini,  tinh Gia Lai hu peih jaik 200 tal pato tacei bruk ngak ka urang ngak di bhum mikva urang bangsa takik. Taeng dalam thun ini, dom urang bac lac urang bangsa takik hu pato bruk ngak hu tagok tal jaik 5.000 urang. Dom danak dak pato bruk ngak ka urang ngak di palei hu maong lac jalan langyah biak lagaih rik tame ba bruk ngak tani tanat saong paglaong jien mek tame ka rahra, abih di nyu nan lac bhum mikva urang bangsa takik. Bruk paglaong ilamo ka urang ngak rik tame bruk patrun kan kathaot khang kajap, padang ngak palei pala bahrau di tinh Gia Lai.

Thun ini, bruk pablei pablei pandap panda tabiak negar langiu di tinh Tien Giang patui veik mek hu tanut patagok glaong; dalam nan njauk ndem di abih lac bruk pablei tabiak negar langiu janih njam patam, baoh karaoh. Taeng di baoh durain hu pablei tabiak darak pasa Cina meblah 47% ka yaom kaom dalam abih tih kim ngach pablei tabiak negar langiu janih njam patam baoh karaoh dalam tinh. Tukvak anak tal, li-u xiêm di tinh Tien Giang meda pablei tabiak biak rilo tapa darak pasa Cina peih tabiak jalan nao bahrau ka gah kaya nong ini. Tien Giang kham marat mek hu kim ngach pablei tabiak hu 6 ty USD, samu 120% jalan ba tabiak di thun saong patagok 10% dut saong tukvak ini di thun blaoh.

Dah page ini, lac harei 27/10 saka ia bilan, tinh Dak Lak peih ngak Harei pahadar dom urang lin nao mesuh metak di gah maraong negar palang lahik saong rahra palei Lạc Giao metai dalam mbang mesuh metak pacang kol khaman Prang. Thun 1945, Kapul tame gah maraong lac kapul hu pasram biak samar piah paglaong, pabak ka kapul gah maraong ngan haong bruk hu mbaok tame khik dom jak jeng di cach mang hadei di Harei negar. Tuk bahrau mai tal ban sit Buon Ma Thuot ye kapul njauk Kol France cap mek, ngak ka 100 urang lin metai saong rilo rahra di palei Lạc Giao metai. Rahra pak ini hu mek harei  27/10 saka ia bilan yaok thun ngak harei pachit di dom bol lin saong rahra metai.

Thun ini, kayua pataom prein tame sangka ieik glang siam saong langik tasik lagaih nan ye dom puh pala baoh manaih di urang ngak nong pak tinh Hau Giang jeng pala mek hu baoh rilo. Dalam tinh Hau Giang urak ini hu jaik 3.350ha taneh pala manaih, tagok jaik 120ha dut saong thun blaoh, ngan haong pajaih pala rilo abih lac janih manaih Cầu Đúc. 3 thun jaik di ini, yaom baoh manaih tuk halei jeng hu urang kak kaiy mai pataom blei di tanut glaong, nan ye urang pala pak Hau Giang biak chreih chrai. Urak ini yaom baoh manaih janih 1 (baoh trak meng 1kg tagok) hu urang kak kaiy mai pataom blei di puh hu yaom meng 13.000-13.500 dong sa baoh. Ngan haong yaom urak ini, ye hadei di tuk kaoh abih phun jien buh tame, ye urang pala daok laba meng 40-50%.

Dah page ini, urang pan akaok UBND huyen Phú Riềng, tinh Binh Phuoc brei thau, hu pato tacei jalan ka UBND xa Phú Trung paglaong bruk pasang ieik hadei di tuk mboh bruk kuac mek ameh suan hukum di bein pala pa-aok blaic di ong Vũ Văn Lập. Dahlau di nan, rahra daok pak xa Phú Trung pathau khan ka bruk kuac mek ameh suan hukum di melam saong hu rilo urang oh thau krein mai pak ini. Kanja xa Phú Trung hu pasang ieik saong duah mboh rilo bruk medil lac kuac mek ameh suan hukum, yau ye: kuac haluk dalam, kuac danao ia, dom pandap panda piah kuac mek… Kapul kanja hu daa 5 urang oh thau daok pak halei mai piah ngak bruk saong taong phat jien lac 750.000 đồng sa urang.

Uy ban Thuong vien Australia harei kabroi hu pachreih tui hukum pakauk uranaih umo mala 16 thun pandar mang xa hoi, min jeng brei thau lac, dom gah mang xa hoi oh njauk pandar manuac ma-in pabak dom khau tin di drei yau ye ho chieu saong dom harak gar pagam rup pabhap karei piah brei thau umo thun di drei. Hukum bahrau jeng pandar dom gah mang xa hoi njauk peih ngak dom bruk lagaih piah khik tani tanat dom jalan khik caga ka umo thun hu brei pandar. Dom cty truyen thong meda njauk taong phat tal 49,5 trieu do la Australia (samu 32 trieu do la Mỹ) mayah ngak suan.

Jabat pasang iek gah kapar haok Vũ trụ Japon (JAXA) bahrau pathau lac brei padeih ngak ieik jamraik di ten lua Epsilon S hadei di tuk rahtabiak bala apui khuah di Pasak Vu tru Tanegashima, gah Tây Nam negar japon. Mbang bala apui khuah tamuh tabiak hadei di tuk ngak ieik bruk cuh jamraik di mangaok mbaok taneh, gam haong sap patuh danei tagok dalam bhum. Urak ini oh ka hu khau tin tantu cambaih laih ka dom khat lahik kayua bala apui khuah ngak tabiak. Ten laa Epsilon S lac danak dak hu makna di JAXA, tui kuhria meda salih ka rai tên lửa Epsilon bahrau.

Tapuk Ky luc Guinness harei kabroi hu khan lac, ong John Tinniswood, urang hu pok brei angan lac urang likei praong thun abih di dunya, dak lahik di umo 112 thun di sa sang duh ka urang taha pak negar Anh. Ong ndih tapui di bilan 8/1912 pak Liverpool, ong John Tinniswood hu mboh dom bruk hu makna di abap 20, meng bruk karam gilai Titanic, dua mbang mesuh metak dunya, tal dua mbang jit ruak praong di dunya. Meng thun 100 tal 110 thun, ong taduan hu harak tadhau ayuh uan harei manek yaok thun meng aruah Patao kumei Elizabeth, urang palang lahik di thun 2022.