Thun ini, tui kuhria, Miuyim tinh Binh Thuan meda raok labaih 200.000 mbang tuai, mek hu abih tih jalan ba tabiak, taeng di Bimon Cam Po Sah Ine pak ban Phan Thiet dui pachreih hu jaik 180.000 mbang tuai. Piah patagok bruk ba drei tame ka tuai damuai, Miuyim tinh Binh Thuan so hoa pandap panda, pandar ma QR saong pathau khan tu dong di dom labik inem krung, gam tui di nan jeng peih dom mbang nao rivang ieik saong peih 6 tal pato ragu ragam bangsa pak ini. Miuyim tinh Binh Thuan jeng brei tabiak mbaok Paok pataom inem krung ilamo Patao Cam di Bac Binh, pambuak haong jalan nao rivang ma-in inem krung ilamo.

Rahra bangsa Khmer pak tinh Soc Trang urak ini jeng daok khik ramik saong patagok dom yaom glaong ilamo, sap ndem panuac puac di bangsa. Kapul Jumpataom Sư sãi anit ranam taneh ia tinh Soc Trang jak ba hu 92 paha peih tal pato akhar Khmer saong daong ka su sai bac ilamo Pali. Dom harei rija roya meng kan yau ye ndam lakhah, adat ieu yang ia bulan, harei Oóc Om Boc, pakacah ghe Ngo… hu peih ngak siam. Dom pakat, dom gah daok padang ngak dom Danak dak khik ramik saong patagok dom yaom glaong ilamo di bangsa Khmer, tapa nan ba bruk ngak saong jhul khang bruk cak rok patagok gah rivang ma-in.

UB Bhap bini tinh An Giang bahrau peih Mbang ginum biai mayaih khan dom prein khang piah buh jien tame saong mayaih khan dom pandap panda angan je di tinh, ngan haong bruk hu mbaok tame di jaik 200 urang. Tui nan, tinh An Giang kuhria pamaong tal bruk cak rok patagok bruk ngak nong praong, trun manieng bruk tathuak nerak, pandar kong nghe glaong saong paglaong dom yaom glaong di pandap panda, kham marat jeng pasak pala padai brah saong kaya ikan ia taba di Bhum taneran kraong Cuu Long. Gam tui di nan, tinh An Giang paglaong bruk mayaih khan thaot binguk, dom yaom glaong ilamo, sajarah saong dom pandap panda angan je tapa labik mayaih khan tal ayut saabat dalam negar saong di dunya.

Ban Ben Cat, tinh Binh Duong bahrau peih ngak Bilan ngak bruk saong Danak dak pathau khan kayua bruk urang likei saong kumei yau samu gauk saong pacang caga bruk taong paoh gauk dalam sang. Harei ini hu dui pachreih urang pan akaok ban saong anek saih di dom sang bac THCS hu mbaok tame. Ngan haong asal kadha “Khik tani tanat bruk an sinh xa hoi, paglaong quyen ka urang kumei saong uranaih”, danak dak hu peih tabiak meng urak ini tal harei 15/12, jak ba rahra hu mbaok tame piah paglaong hatai sahaneng saong pacang caga bruk taong paoh gauk. Hadei di harei ini, kapul trun jalan pathau khan di dom labik jalan praong saong labik rahra daok di dalam ban.

Sang ieik ruak Da khoa Dunya S.I.S Cần Thơ bahrau blaic raih jak jeng mek tabiak khoi u glo ka sa urang ruak kumei praong thun. Urang ruak oh mboh hagait karei saong patuah duah mboh u não hadei di mbang gaok bala jalan mbak. Dom bac si hu pandar jalan brei padeih nduac dahrah dahlau di tuk blaic raih piah ngak trun manieng bruk sre darah, daong ka mbang blaic raih hu salamat. Mbang blaic raih dui atah jaik 4 maong, khối u hu neh tabiak abih truh di lalik siam. Urang ruak mboh siam biak samar saong hu brei tabiak truh sang ieik ruak hadei di sa adit daok taong ruak

6Dom urang roh duah ilamo negar Cina daok tagok jalan padang ngak sa baoh sang hu thaot lac baoh manuk di mangaok Ia bulan pamaong tame ilamo pagam mộng gỗ meng kan. Ini lac sa danak dak biak naih, biak kan gaok rilo cuang kandah, kayua di mangaok ia bulan biak kan kandah, yau pandap di pak labik daok takik, oh hu ia, hanjul, nhiet do tui kuhria lac labaih 300 do C di harei saong melam atau yaok thun bhian rahtabiak labaih 1.000 mbang magei baoh taneh meng 2-3 độ. Lac sa thiên thể langiu di baoh taneh bo anek manuac bhian caik takai tal, ia bulan tuk halei jeng lac janih piah ka dom urang roh duah ilamo caik hatai roh duah.

Indonesia caong ngak tabiak 9 trieu kreih camin ky thuat so di thun  2035 piah pacang caga haong dom cuang kandah di ky thuat so saong mek hu Hatai maong ameh di thun 2045. Dom kadha bac yau ye tri tue nhan tao atau ma hoa daok caga hu ba tame sang bac pakat sa di Indonesia piah daong ka anek saih samar drah hu pambuak haong kong nghe so bahrau. Rajaei Indonesia daok pambuak haong rilo gah ky thuat so praong saong dom sang bac dai hoc piah pato tabiak sa rai dom urang naih joi di gah ky thuat so, daong langyah dom bruk kurang dom urang roh duah ilamo gah ky thuat so pak negar Indonesia.     

Mayah hu tukvak mai tal Ban ine Berlin di Duc dom harei ini, tuai damuai drui klak tapa vaih mai rivang ieik labik mayaih khan ilamo danei angan Dark Matter piah maong ieik dom kadha ilamo ia harei bak sambo mai, hadah tanjaik. Dalam labik mayaih khan praong labaih 2.000m2, parang ieik ilamo “Dark Matter - Winterlights 2024” kayua nghe si Christopher Bauder sahaneng tagok jalan peih ngak. Ngan haong dom mbaik phun thông Noel hadah tanjaik, gam haong dom sap  ragu dalam labik ia kakuan, gam haong dom kadha sap ragu techno biak chreih chrai, bingi pang, dui pachreih tuai rilo rairah mai rivang ieik, mek thaot binguk.