# Page mesup harei 25-1, di Phú Thọ, Phó Thủ tướng Trịnh Đình Dũng mai ravang saong hu mbaok dalam bruk "Tết jum pataom, alin hadiah pandap ka urang ngak saong bol bhap rahra" kayua Liên đoàn Lao động pambuak bruk haong Hội Chữ thập đỏ tỉnh Phú Thọ peih tabiak. Tapa nan, lambaok Rajaei, Phó Thủ tướng payua panuac tadhau ayuh tal dom urang ngak saong bhap bini dom bangsa dalam tỉnh Phú Thọ di tuk tame thun bharau sak pabui 2019. Phó Thủ tướng jeng hu jao 150 pok pandap, yaok pok yaom 1 triệu 300 ribau đồng ka urang ngak saong ka bhap bini.

# Bí thư Tỉnh ủy An Giang, Võ Thị Ánh Xuân pal akaok kapul ngak bruk mai rivang 2 boh sang sarak karja,  30 boh sang kan di  xã Tân Phú, huyện Châu Thành song kapul ngak tatua halan hatain di xã Vĩnh Trạch, huyện Thoại Sơn dok  ngak tatua di  xã Tân Phú. Tapa nan, Amuk Võ Thị Ánh Xuân  dok hu mai rivang  song brei pandap ka 2 boh sang sarak karja di  xã Tân Phú song  xã Vĩnh Nhuận, huyện Châu Thành. Di dom labik mai, amuk Bí thư Tỉnh ủy sangka tangi sua pren yava, caik hatai tui pang cong khin di dom boh sang dalam sarak karja piah hu bruk daong abih gauk yam tapa kan kandah hu mbang Tết meng kan di bangsa. 

Urak ini, dom gah, dom pakat, dom kapul ngak pahla di tỉnh Tiền Giang daok pataom tame bruk alin hadiah pandap Tết ka dom sang kan kathaot, sang kan kandah. Lingiu 16.000 sang kathaot taduan hu pandap meng kadung jien tỉnh, UBMT negar Việt Nam tỉnh Tiền Giang daok hu alin hadiah 2.000 pok pandap ka dom sang jaik si kathaot daok di huyện Châu Thành, Tân Phước, Cai Lậy , ban sit Cai Lậy saong huyện Cái Bè. Yaok pok yaom 300 ribau đồng kayua mBan Trị sự Giáo hội Phật giáo Việt Nam tỉnh Tiền Giang daong brei. Di 11 huyện, ban sit dalam tỉnh jeng jak ba hu yaok pluh tỉ đồng piah daong ka sang kan kandah. Tuk Têt ini, tỉnh Tiền Giang kham merat alin hadiah ka sang kathaot, sang jaik kathaot hu takik abih sa pok pandap. Ban sit Mỹ Tho lac labik ba akaok dalam bruk ngak ini, jak ba hu jien piah blei pandap brei 8.000 sang kan kandah.

# Meng bloh lac panuac khan ka dom bruk iek glang  tết ka urang ngak,  boh sang sarak karja, sang kathaot di dom tỉnh, dom gah. Khol hulin likau tapa dom khau tin karei karei  njauk caik hatai:

Di mblang bein  Thống Nhất, Sở Công thương Hà Nội bahrau peih nyaom drak pasa pandap panda, kaya nông, pandap mbang menyum Tết Kỷ Hợi thun 2019. Nyaom drak pasa ba mai rilo kaya nong , pandap chế biến, pandap meng kan di  Hà Nội song dom bhum palei karei karei, rilo meng lac pandap Tết. Nyaom drak pasa hu  150 gian hàng di  115 doanh nghiệp, hợp tác xã, boh sang  ngak pandap saong pablei salih di ban Hà Nội song  20 tỉnh, ban . Nyaom drak pasa piah dong ka dom  đơn vị yaih khan, pablei kaya non, pandap mbang menyum, pabak ka bruk blei di bhap bini ban ine  dalam tuk Tết Nguyên đán.

# Kapul urang jakar ngak praong tỉnh Kampong Speu - Negar Campuchia kayua ong Sor SoPutra- Phó Tỉnh trưởng dang akaok kapul bahrau mai tadhau ayuh  tết dom urang pan akaok tỉnh Vĩnh Long. Tapa nan, ong Sor SoPutra brei mboh hatai bui sambai saong thau dhar phor bruk daong  di Việt Nam jeng ye di tỉnh Vĩnh Long brei ka Campuchia dalam tukvak tapa. Ong Sor SoPutra jia lac, talei jum pataom di dua bnagsa, dua taneh ia dak harei dak khang kajap, oh padeih patagok, saong caong lac dom rai hadei daok patui jalan siam mekre ini.

Patui di ni dom khau tin dunya:

# Harei 24/1, takik di abih 3 urang metai dalam mbang jaleih sang di  mbang Ha-ya-na (Haryana), gah brak Ấn Độ. Tui kajar pak ni , bala rah tabiak di sa labik daok padang ngak dalam ban Gu-ru-gram (Gurugram). Gah cứu hộ duah mboh 3 urang metai dalam sang jaleih Bhap bini pak ni brei thau,  rilo urang hu dong ba tabiak truh labik jaleih. Urak ni bruk dong duah dok hu peih ngak. Bruk jaleih sang bhian rah tabiak di  Ấn Độ kayua bruk khik ramik padang ngak biak cadu, pandap ngak sang oh siam, bruk pasang iek padang ngak oh catang, oh ginup

# Tui Roi-tơ, bruk chính trị xã hội Vê-nê-xu-ê-la daok srau kadau hadei di tuk yaok rabau urang pahreih tui rajaei saong gah đối lập ba gauk peih bruk trun jalan di dom jalan praong dalam ban ine Ca-ra-cát di harei 23/1. Dalam sa mbang trun jalan kayua gah đối lập peih tabiak, Chủ tịch Quốc hội lac menuac di gah đối lập H.Gu-ai-đô  hu tabiak panuac lac “Tổng thống lâm thời” mbiah tal tuk padang hu sa rajaei bahrau dalam mbang bầu cử tự do.

 # Ngoại trưởng Hàn Quốc Kang Kiêng Hoa (Kang Kyung-wha) bahrau brei thau, negar ni daok duah dom panuac sinya di  Triều Tiên di nyaom biai pakat glong Mỹ- Triều anak tal. Tui nan Triều Tiên njauk ba tabiak dom panuac sinya yau klaak dom  labik ngak hạt nhân song brei dom  thanh sát viên dunya tui iek. Pok panuac di  Diễn đàn kinh tế dunya di  Davos, Ngoại trưởng Hàn Quốc ndom lac  Triều Tiên njauk hatai pamong tal bruk yah klaak  danka dak vũ khí hạt nhân song  tên lửa đạn đạo./