1# Dom drei rối ia di Việt Nam hu tabiak negar lingiu mbang camereip abih di thun 2019 tapa Ấn Độ tui panuac da-a di mBan padang Harei pataom dunya dom sang daoh mbang ka 11 – Kerala 2019  saong bruk ilamu kayua Cục Inem krung ilamu Đài Loan peih tabiak meng harei 5 – 11/2. Sang daoh tamia rối VN hu mbaok tame danak dak rối ia meng kan di Ấn Độ saong Đài Loan. Dom nghệ sĩ hu caga dom kadha biak gheih yau ye: Tamia inegirai, tam, darak, thaik ia, vah kieuk, tamia bát tiên, Taong cap ikan, Nhi đồng hý thủy… gam saong dom danak dak piah parang me-in. Dalam dom bruk di danak dak daok hu parang iek, taom gaok ndom biai nao mai saong parang me-in inem krung ilamu phi vật thể Việt Nam, dalam nan hu tamia rối ia meng kan. Menuac sia di dunya daok hu thau ka bruk ngak gheih, mekre di dom nghệ sĩ Việt ngak brei dom drei rối jeng chreih chrai, hu suan yava dalam dom vở kịch biak gheih saong biak pachreih hatai urang maong iek.

     2# Mbang camereip di abih phun sâm Ngọc Linh hu tabiak mbaok bhap bini ban ine Hà Nội dalam parang iek hu angan lac "Inem krung ilamu saong Sâm Ngọc Linh Kon Tum- Drap ar di ceik glai” di Miuyim sajarahNegar. Meng labaih 200 harak gar, pandap panda, parang iek yaih khan ka inem krung ilamu di tỉnh Kon Tum tapa dom pandap panda, harak gar, thaot binguk, phim tư liệu, clip… saong njauk caik hatai di abih nan lac parang iek ka sâm Ngọc Linh. mBan peih bruk hu padang mô hình glai sâm piah yaih khan ka môi trường, langik tasik, bruk đa dạng sinh học di bhum glai ceik Ngọc Linh – labik daok di janih sâm quý ini. Parang iek daok brei mboh bruk khép kín meng pabam pajaih tal pala, iek glang saong buac mek janih sâm quý ini. Bruk pandar công nghệ bahrau thực tế ảo 3D, 4D caong lac ba mai chreih chrai ka tuai damuai. Parang iek hu dui atah tal abih thun 2019.

3# Bahrau ini, Hội Liên hiệp urang kumei tỉnh Bình Phước pambuak bruk haong Bộ đội Biên phòng tỉnh bahrau peih danak dak “Xuân jum pataom – Tết anit ranam” di tuk Tết thun sak pabui 2019 di xã Lộc Hoà, huyện Lộc Ninh. Di danak dak, mBan peih bruk hu alin 2 baoh sang anit ranam yaom 50 triệu đồng yaok baoh ka 1 urang lin đồn Tà Péch saong 1 urang kumei bhum tapen negar oh ka hu sang daok. Lingiu di nan, 320 paok pandap yaom 1 triệu đồng sa paok hu alin brei dom adei sa-ai dalam kapul urang kumei sang kan kandah daok di 7 xã biên giới huyện Lộc Ninh. mBan peih bruk jeng hu alin 30 sruh radaih juak, 500 katap saong 1.000 baoh siphau ka anek saih kan kathaot bac da-a naih joi. Abih tih dom pandap dalam danak dak thun ini yaom labaih 600 triệu đồng, kayua Kapul Doanh nhân kumei tỉnh Bình Dương saong Bình Phước daong brei.

4#  Ban tasik Đà Nẵng bahrau hu tạp chí The New York Times (Mỹ) ba tame top 52 labik pachreih nao tal di abih dalam thun 2019. Tui nan, Đà Nẵng hu rilo khách sạn saong labik padeih padei praong, siam. Bhum glai angaok bán đảo ini, daok lac clabik daok di voọc chà vá chân nâu. Tuai damuai nao tal Đà Nẵng oh klaah vaih tame Cầu Vàng daok di labik glaong 1.400m, atah jaik 150m gar angaok taginum. Tui The New York Times, tuai damuai meda peih tabiak sa harei bahrau di Đà Nẵng meng bruk caluai di bãi tắm Non Nước. Hadei di nan, jhui varv nao blei pandap di darak Hàn dane angan, daok jaik tatua kraong Hàn. Biar harei, tuai meda ndik ceik Thủy Sơn, ravang baha Tham Thai, baha Linh Ứng saong dom hang động yau Linh Nham, Huyền Không…

5# Anak tal, kênh VTV7 (rayo papar binguk pato pakai pakat negar) hu papar binguk phim hoạt hình Một đồng tiền vàng  hu asal meng dalikan hu angan ieu yau nan, saong hatai caong pato pakai uraniah ka yaom glaong di bruk ngak meng pren yava,, ia hauk, ia hang di drei. Đạo diễn - NSƯT Lê Bình khan lac: Bruk padang rup thaot meng ilamu cakak ba-ar, pambuak haong tamia rối saong ngak jengblah rup cih hu sambo màu dreih yau rup cih Đông Hồ meda daong ka kol dahlak brei thau hu rilo yaom glaong meng kan tal uraniah. Amaik ame njauk daok la iek phim haong anek bhik dalam dom harei Tết piah klah rabha, langyah saong patao pakai ka nyu hu siam lagaih jang”. Phim hoạt hình Một đồng tiền vàng atah 12 minit, hu papar binguk angaok VTV7 dalam 3 harei 4, 5 saong 7/2/2019 (lac harei 30 bilan mat, harei 1 bingun saong harei 3 bingun Tết).

      6# Harei pataom jalan tapuk TP Hồ Chí Minh Tết thun sak pabui 2019 ngan saong kadha “Ginup sambo màu di tapuk” hu peih tabiak meng harei 2/2/2019 tal harei 8/2/2019 (lac harei 28 bilan mat tal harei 4 bingun bilan 1). Labik peih harei pataom jalan tapuk thun ini lac di 3 jalan praong ngan saong dom kadha karei di gauk. Abih di nyu nan lac di jalan Nguyễn Huệ ngan saong kadha “Khang takai yam atah” hu peih parang iek dom janih tapuk saong rup binguk panorama ka pahadar 320 thun padang Sài Gòn - Chợ Lớn - Gia Định - TP Hồ Chí Minh; parang iek Báo Xuân thun 2019; parang iek tapuk saong rup binguk dom jak jeng gah đối ngoại di ban raya; yaih khan dom thaot binguk, dom baoh tapuk ka dom urang lin, urang taong ikan kak kajap haong tasik khik kajap quyền ngak pô angaok biển Đông...

7# Kuhria tal harei ini, Nhiệm vụ bất khả thi 6 mek hu yaom jien pablei vé  lac labaih 791 triệu USD di ngaok dunya. Bruk njauk biai nan lac, urang maong iek oh njauk cang lavik dom thun yau dahlau daih tuk Nhiệm vụ bất khả thi 7 tui kuhria hu tabiak mbaok di thun 2021, daok Nhiệm vụ bất khả thi 8 meda tabiak mbaok di thun 2022. Tapa nan nyu ngak ka urang takre sahneng mboh lac 2 tập patui di nan di phim Nhiệm vụ bất khả thi meda hu dalikan pambuak gauk kajap jang./.