# Page ini (6/3), Kapul urang kamei Việt Nam peih bruk pathau khan “Thun siam mekre ka urang kamei saong uranaih kamei” rah tabiak di dua labik akaok lac di rup patau Lý Thái Tổ (Hà Nội) saong jalan nao kabak Nguyễn Huệ (TP.HCM). Ini hu mong yau bruk ngak gam gam, oh njauk lac dalam thun 2019 bo daok dalam dom thun anak tal, piah peih ngak dom jalan ngak patagok khang kajap, jalan ngak di negar ka bruk likei kumei samu gauk tukvak 2011- 2020. Tapa peih bruk nan, piah pachreih dom pakat kapul nyaom, urang jakar, hội viên urang kamei dalam negar pachreih tui meng dom bruk ngak hu mboh di anak meta, jak ba taong abih rahra sa tangin haong gauk brei ka bruk siam mekre salamat ka urang kamei saong uranaih. Abih di nyu nan lac, đại sứ di “Thun siam mekre ka urang kamei saong uranaih kamei” nan lac Hoa hậu Hoàn vũ Việt Nam 2017 H’Hen Niê saong MC Quyền Linh.

#Meng harei ni (6/3), dom gah chức năng di TP.HCM brei padang balai  pasang iek , langyah catang dom urang peih radeih , dok angaok radeih ô tô oh kak talei  an toàn. Tui jalan ngak lac, piah pahadar, piah pasiam bruk bhap bini ngak tui dom quy định ka bruk kak talei  an toàn tuk dok angaok ô tô,  meng harei ni tal harei  17/3, dom gah  hu pataom tame pathau khan , langyah; hadei di nan meng kaoh catang tui hukum dom urang ngak suan.  Ban An toàn giao thông ban raya jeng brei thau, meng bilan 1 thun bloh, cảnh sát giao thông hu xử phạt dom bruk ni, min bhap bini jeng oh ka paglong akaok sahaneng piah ngak njauk tui adat hukum.

# Luật sư di Đoàn Thị Hương brei thau, Đoàn Thị Hương hu pren yava siam, tự tin saong meda hu mbaok dalam phiên tòa dalam harei 11/3 anak tal. Đoàn Thị Hương njauk cáo buộc pametai urang Triều Tiên hu brei thau lac Kim Jong-nam, sa-ai likei sa ame karei amaik haong Chủ tịch Triều Tiên Kim Jong-un. Luật sư biện hộ ka Đoàn Thị Hương hu panuac lac, Hương oh hu ý định pametai manuac. Đoàn Thị Hương saong bị cáo urang Indonesia Siti Aisyah jeng oh taduan  tội pametai menuac bo tok taduan lac drei njauk lah pachot hu mbaok tame sa bruk ma-in bleik sambai di harei 13/2/2017 di mblang kapal haok Kuala Lumpur di Malaysia saong oh thau chất bo dom đặc vụ Triều Tiên pandar kaol nyu luk tagok mbaok nạn nhân nan lac chất độc thần kinh VX. 

# Jala pandiak harei 5/2, gah chức năng phường Tân Phong, ban Biên Hòa, tỉnh Đồng Nai hu dong sa  uranaih  8 bilan njauk bạo hành, preo hia song angaok rup hu rilo  labik jum jhuk dok dalam sang trọ. Tapa pasang iek, urang pah phòng  trọ lac muk  Nguyễn Thị Tuyến Loan, umo 34 thun, palei daok di xã Hóa An, ban  Biên Hòa, tỉnh Đồng Nai. Di jabat công an, muk  Loan khan lac drei rong uranaih nan hadei di tuk nyu njauk amaik ame klaak, ba nyu mai pah phòng trọ labaih  10 harei song bhian tong paoh meng gaiy havei . Urak ni urang jakar  iek gah ilamu  xã hội phường Tân Phong dok ngak harak gar piah payua tame Cô nhi viện Biên Hòa. Jabat chức năng dok ngak brei cambaih laih bruk ngak di muk  Loan  piah langyah tui adat hukum

5 # Urak ini manuac urang njauk ruak pandiak tabiak darah, tangin takai cambuai di tỉnh Bình Dương daok hu rilo. Cambaih laih, dalam bilan 2-2019, dalam tỉnh hu 572 urang njauk ruak pandiak tabiak darah, patagok taong abih urang njauk ruak daok pasang iek ruak nan lac 1.418 urang saong hu 168 urang njauk ruak tangin takai cambuai, patagok abih tih urang ruak daok pasang iek ruak nan lac 651 urang. Yaom lac oh hu urang ruak halei trak jang min manuac urang ruak dak harei dak rilo, gah y tế tỉnh daok pok sap iew bhap bani peih ngak dom jalan ngak pacang caga yau: bhian rao tangin meng japon, ndih dalam kamo (yaom lac harei), pametai anek ruak saong lăng quăng, oh eng drei iek ruak di sang tuk oh ka hu panuac tacei pato di bác sĩ.

Patui di ni dom khau tin dunya:

# Urang jakar  y tế Nhật Bản brei thau, kuhria meng akaok thun tal ni , hu abih tih 650 urang ruak rubella, rilo jang 4 mbang dut song tuk vak ni thun dahlau . Urang jakar  y tế khan lac jit  rubella meda tamuh tabiak grauk labik dalam negar. Urang kamei metian njom  rubella mbuan si ndik tapui anek njauk dị tật tanye, meta atau boh hatai. Piah pacang  jit ruak pambak khang, Karja brei peih bruk klauk vác-xin brei saoh ka urang likei hu umo meng  39 tal  56. Ni lac nyaom umo hu rilo di abih dalam dom urang njom ruak song oh hu klauk vác-xin pacang caga rubella tuk dok sit.

# Hadei di tuk Trung Quốc brei padeih bruk blei tame hareik hareim ro rah nhựa dalam thun 2017, Malaysia hu jeng sa dalam dom mblang pataom caik hareik harom ro rah nhựa prong abih dunya. Tok dalam 6 bilan akaok thun 2018, jaik 800.000 tấn hareik hareim ro rah nhựa hu ba tame Malaysia. Daok taphia pabah lamnge Klang prong abih di Malaysia, bal sit Jenjarom hu jeng labik padeih takai di nhựa. Hu tal 33 sang mac pasiam veik ngak tabiak nhựa oh njauk adat hukum tamuh tagok di bal sit ini njauk Raja-ei Malaysia brei kareik pabah mbang kayua  ô nhiễm. Yau nan min, di bal sit ini urak ini jeng daok mboh  yaok pluh ribau hareik hareim ro rah nhựa kayua dom sang mac caik veik kayua oh hu labik pataom caik.

         # Ngoại trưởng Mỹ Mike Pompeo hu panuac lac, mbang ginum biai di  Mỹ song Triều Tiên meda hu pambuak veik dalam dom adit tal.Ngoại trưởng Mỹ Mike Pompeo brei thau, yaom lac  Tổng thống Mỹ Donald Trump song  Chủ tịch Triều Tiên Kim Jong-un oh mek hu  thỏa thuận hadei di tuk tamat nyaom biai pakat glong Mỹ - Triều Tiên mbang ka 2 di  Hà Nội min dua gah dok kham merat khik  bruk ginum biai. Mỹ cong khin hu payua sa kapul tal  Triều Tiên dalam dom adit tal piah pambuak veik ginum biai  ka bruk phi hạt nhân hóa palao kaoh  Triều Tiên./.