1# Di ban sit Vũng Tàu, Liên doanh Việt - Nga Vietsovpetro  hu peih bruk taduan mek menyek akaok meti meng mỏ Cá Tầm. Dự án mỏ Cá Tầm kayua nhà thầu Liên doanh Việt - Nga Vietsovpetro, Tổng công ty duah iek saong khai thác dầu khí haong Tập đoàn Bitexco ngak po đầu tư.  Dự án hu peih ngak meng thun 2012 saong tal bilan 1-2019 hu brei menyek mbang camereip labaih 1.200 tấn menyek (samu 9.000 thùng yaok harei). Tui kuhria, dalam thun 2019 dom đơn vị meda kuac raok saong ba tame khai thác 6 bingun dalam mỏ saong sản lượng tui kuhria lac 766.000 tấn menyek (samu 5,5 triệu thùng menyek) piah rik daong biak rilo ka kadung jien karja.

 2# Dom urang dang akaok Sở Y tế TPHCM brei thau, di TPHCM abih tih uraniah oh hu klauk jru dalam mbang klauk pabak vaccine sởi - rubella ka uraniah 1 - 5 thun dalam ban raya lac labaih 139.000 uraniah (samu 47%). Makna ba tal bruk uraniah klauk vaccine takik, lac kayua bhap bini oh khin saong oh brei thau cambaih bruk klauk vaccine dahlau di nan. BS Trương Hữu Khanh, Trưởng khoa Nhiễm - Thần kinh Sang iek ruak Nhi đồng 1, ndom lac, bruk uraniah njauk ruak sởi lac kayua jalan ngak oh ka lagaih dalam bruk klauk jru vaccine.

  3# Mintri pato megru bahrau hu harak tacei Nhà xuất bản Giáo dục Việt Nam anak meta oh ka brei tagok yaom pablei tapuk giáo khoa klak dalam thun bac  2019-2020. Urak ini, jalan ngak ba tabiak ka danak dak, tapuk giáo khoa giáo dục phổ thông bahrau hu peih tabiak ngak meng thun bac 2020-2021.

4# Dalam tukvak 2016-2018, tỉnh Ninh Thuận hu ieu pataom 1.500tỷ đồng buh brei ka bruk patrun kathaot bhum ceik. Lingiu di nan, dom sarak daong tapak ka urang kathaot, bhum biak kan kandah, sang urang bangsa takik, sarak brei mesraiy daong ka sang kathaot, sang jaik kathaot mesraiy jien ngak mbang, hu peih ngak njauk tukvak, njauk menuac, njauk urang. Hu bloh jaik 167.000 mbang urang kathaot dalam xã gaok kan kandah hu daong tapak, saong yaom jien labaih 15 tỷ 400 triệu đồng meng jien saong meng pajiah phun pala, athur raong

5# Công an quận Tân Phú, TPHCM daok duah thau, ngak brei cambaih laih bruk 1 urang likei njauk 1 kapul  urang ieu phone hù dọa, pachot mek 4 tỷ 500 triệu đồng. Cambaih laih nan lac, harei 8/3 ong T.X.L (ndih tapui thun 1971, daok di quận Tân Phú) taduan hu phone di dom urang mek angan lac drei menuac di bưu điện ieu nao mek bưu phẩm. Urang ini brei thau bưu phẩm lac lệnh bắt tạm giam di Công an Hà Nội ngan saong ong L., kayua gaok tal bruk pablei salih ma túy saong rao jien. Kayua rilo mbang njauk hăm dọa, mboh huac, ong L. hu 2 mbang buh jien tame tài khoản abih tih 4 tỷ 500 triệu đồng brei ka kol pachot. Hadei di tuk buh jien bloh, ieu phone veik ye kol nyu padam phone saong suak mek abih yaom jien nan. Yaom lac bruk pachot tapa phone ini oh bahrau saong hu khan brei thau rilo mbang, min tukvak tapa jeng daok hu dom urang menuac lah pachot. Công an hu panuac kakei bhap bini paglaong hatai sangka anak bruk buh jien tame tài khoản di dom urang oh krein, oh bhian randap.

Nhạc cắt

  Patui di ni dom khau tin dunya

  6 # Piah khik caga kraong Dương Tử atah abih di Trung Quốc, karja tỉnh Giang Tô brei kreik pabah mbang jaik 3.000 sang mac ngak nerak trak dalam bhum piah patrun bruk nerak hóa chất dalam bhum, labik hu rilo sang mac hóa chất saong dom khu ngak kong. Lingiu di nan, tỉnh Giang Tô hu brei thau jalan ngak di thun 2020 lac kreik pabah mbang taong abih dom khu ngak kong oh pabak hu bruk khik caga alam môi trường. Urang jakar palei jeng sanya patrun sản lượng thép thô saong patrun labaih 2 triệu kW sản lượng điện di dom sang mac nhiệt điện klak oh daok lagaih.

7 # Tui panuac khan bahrau abih meng dom jabat duah thau ka bruk kapal haoh di hãng Ethiopian Airlines laik harei 10-3 ngak brei taong abih 157 urang metai, lac urang peih kapal haoh mboh trục trặc dahlau di tuk sruh Boeing 737 par trun haluk saong likau par mai veik ban ine Ethiopia. Kapal haoh lahik liên lạc haong đài kiểm soát không lưu 6 minit hadei di tuk par tagok. Urak ini, angan di dom urang njauk bala daok hu brei thau, tui nan, dom urang nan mai meng 35 taneh ia, hu tuai du lịch, urang ngak mbang praong saong menuac di Liên hợp quốc.

8# Cố vấn an ninh negar Mỹ Giôn Bôn-tơn (John Bolton) brei thau, Tổng thống Đô-nan Trăm jeng daok peih pabah mbang ka 1 nyom biai pakat glaong mbang ka 3 haong Chủ tịch Triều Tiên Kim Châng Ưn (Kim Jong-un). Siam lagaih ka Triều Tiên biak praong meyah negar ini taduan bruk phi hạt nhân hóa. Dahlau di nan, harei 8/3, Tổng thống Đô-nan Trăm jeng sa mbang tra brei mboh hatai jia tame talei pambuak bruk siam mekre haong Chủ tịch Triều Tiên Kim Châng Ưn./.