1 # Mentri ngak nong saong patagok palei pala bahrau tabiak Quyết định patabiak angan dom harak gar hành chính dalam gah ngak nong saong patagok palei pala ngan haong abih tih 386 harak gar hành chính. Dalam nan, 248 harak gar hành chính pakat trung ương, 106 harak gar hành chính pakat tỉnh, 18 harak gar hành chính pakat huyện, 8 harak gar hành chính pakat xã saong 6 harak gar hành chính jabat karei. Yau nan, dom harak gar hành chính hu cakak trun dut haong dahlau nan lac 122 harak gar. Tukvak anak tal, Mnetri ngak nong saong patagok palei pala meda patui veik pasang veik, pambuan palagaih harak gar hành chính dalam bruk hu jao, palagaih ka doanh nghiệp buh jien tame ngak mbang pablei salih dalam gah ngak nong, palei pala.

2 # UBND TP HCM bahrau jao ka Sở padang ngak samar dang tabiak, pambuak bruk hong Sở Tài nguyên song Môi trường, Công an ban raya, UBND quận 9, UBND huyện Nhà Bè song dom jabat pambuak pagam tal pasang iek song langyah bruk ngak suan di po  đầu tư meyah hu di 2  dự án lac The Park Residence (xã Phước Kiển, huyện Nhà Bè) song dự án Valencia, phường Phú Hữu, Quận 9. Hadei di tuk pasang iek brei pathau khan bruk langyah tal  Văn phòng akaok negar song  Tổng cục khik ramik taneh rija dahlau di harei  30/3. Tui nan, dom brku ngak suan bo tuai damuai brei thau ngan saong Tập đoàn Anpha Holdings song tập đoàn MIK Group lac dom dự án nan hu pagam tal bruk padang ngak, pacang caga patuh khuah, meblah phun jien, meblah jien laba, mek jien di urang min oh jao sang .

3 # Tỉnh Ninh Thuận hu 14 bhum angin khang, rah tapa labaih 8.000 ha, hu angin yuk gam gam luac dalam 10 bilan ngan haong tốc độ meng 6,4-9,6 m/s, khik grap tanat ka tua-bin angin phát điện. Ndom ka dom panuac lac daok huac ka bruk cakrok patagok điện angin angaok sa mblang taneh prong meda ngak kanjah jhak tal taneh pala drak di mikva, abih di nyu lac dom baoh sang urang bangsa takik daok kurang taneh pala drak, ong Phạm Văn Hậu – Phaok akaok UB bhap bani tỉnh ndom lac: dom dự án năng lượng tái tạo meda khai thác taong abih giá trị taneh, ba mai bruk ngak, paglaong rai diuk di bhap bani labik ngak dự án. Ala dom công trình điện angin, bhap bani jeng meda pandar hu taneh piah pala drak atau ngak dom dịch vụ du lịch duh ka tuai damuai mai rivang iek.

4 #Di  tỉnh Lâm Đồng dok tamuh jit sakuak cambuai tapaok kakau. Bruk njauk nyai nan lac, pabui metai hu urang rong klaak trun danao Cam Ly, labik nduac tapa  xã Gia Lâm (huyện Lâm Hà, tỉnh Lâm Đồng) ngak nerak môi trường, mbau bruk song mbuan ngak brei jit ruak pambak tapa dom labik jiak tapen. Tui ong  Hoàng Huy Liệu – Phó Chi Cục rong glang song kaya ikan  tỉnh Lâm Đồng, Jabat  thú dom pakat hu pathau khan tal dom boh sang rong glang hu jit ruak min bruk klaak anek athur, menuk da tabiak  gah langiu brei mboh akaok sahaneng di bhap bini biak beir  . Ong Liệu jeng brei thau, dom boh sang oh khan brtei thau jit ruak oh taduan hu sarak dong  di karja. Urak ni yaom jien dong lac  38.000 đồng/kg.

5 # Urak ini, aia mbak daok njaom tame rilo tỉnh tapen tasik bhum taneren kraong Cửu Long. Rilo tỉnh yau Bến Tre, Kiên Giang hu yaok ribau baoh sang kurang aia taba piah pandar. Di Hậu Giang, aia mbak njaom tame dalam huyện Long Mỹ ngan haong độ mbak nan lac 1,4‰. Tui kuhria mboh dahlau, gah Meraong daok tame bilan pandiak bhang, tabung glaong meng bilan 3 tal bilan 5, aia njaom mbak meda rah tabiak dak harei dak khang saong trak jang.

Patui di ni dom khau tin dunya:

6  # Sa urang ruak  HIV di  Anh meda jeng urang ka 2 dalam sajarah  y học dunya hu abih ruak  AIDS hadei di tuk hu  ghép tủy talang meng sa  urang alin  brei kháng HIV. Tui dom chuyen gia y tế, oh hu  mboh HIV hagait dalam rup pabhap di sa urang ruak 3 thun dahlau deih hu  cấy ghép tế bào mầm di sa urang  miễn dịch hong virus ngak  suy giảm miễn dịch. Meyah dalam rup pabhap di urang ruak oh dok mboh  HIV dalam dom roh duah hadei di nan, ye ni bruk peih tabiak jalan pasiam ruak aids. tui kuhria mboh, meng dom thun 1980, hu labaih  37 triệu urang di dunya urak ni njom HIV, song AIDS nyu ngak ka labaih  35 triệu urang di dunya metai.

7 # Singapore nan lac negar hu manuac urang taha samar abih dang ka dua dunya hu njauk gauk haong dom công đoàn lao động lac meda patagok umo padeih hưu. Urak ini, umo padeih hưu lac 62, yau nan min, taong abih công ty jeng hu sa paka nan lac brei adat ka urang ngak hu palih ruah daok veik ngak bruk tal umo 67 thun. Taong abih dua mốc padeih hưu ndom angaok nan jeng hu brei tagok di anak tal, tui Bộ trưởng Bộ Nhân lực Singapore. Kayua bruk urang taha dak harei dak rilo, nan ye Singapore urak ini daok pambak tame dom urang ngak prong thun.

8 #Mintri pato megru  Trung Quốc brei thau lac meda peih bruk pasang iek  hacih saat pandap mbang  di tong abih sang bac dalam negar. Mintri pato megru  Trung quốc hu tacei dom sang bac peih dom bruk  pasang iek ngan song bruk khik hacih saat pandap mbang, dom labik ngak pandap mbang song labik pabak pandap mbang. Langiu di nan, pren yava song bruk ngak di dom urang pagam tal bruk ngak pandap mbang jeng hu pasang iek. Taphia di nan, mintri pato megru Trung Quốc jeng hu panuac kakei dom sang bac brei adat ka amaik ame song gah ka 3 hu mbaok tame dom mbang pasang iek ni, saong brei thau ka labik pabak pandap mbang, bruk blei pandap mbang  ./.