Pahadar 70 thun jayak Điện Biên Phủ (7/5/1954-7/5/2024), di Ban raya HCM daok peih bruk parang iek thaok binguk “Jayak Điện Biên Phủ - Prein khang Viet Nam, labik dang di samar birau”. Ngan haong 97 thaok binguk hu parang iek veik bruk sajarah dakrai, dom jalan tacei ba, bruk ngak suai lavik, jalan gheih ngak hadah hadai, naih joi di Đảng, di Chu tich Ho Chi Minh, di Đại tướng Võ Nguyên Giáp saong Bộ Chỉ huy Chiến dịch Điện Biên Phủ…Abih di nyu nan lac jalan sahaneng jum pataom taong abih bhap bini meng urang jakar, urang lin tal urang dam dara xung phong, dân công hỏa tuyến “Taong abih daong Điện Biên Phủ jayak”. Langiu di nan, tapa bruk parang iek daok brei mboh bruk pambuak dom gah kinh tế, ilamu, xa hoi di TPHCM saong tỉnh Điện Biên.

Dalam tỉnh Hậu Giang hu 266 pandap mek hu angan OCOP pakat tỉnh. Jaik abih dom pandap OCOP jeng hu harak brei angan lac mek hu chất lượng lagaih yau ye: ISO, VietGap, GlobalGap, GMP, HACCP… Pandap OCOP di tỉnh Hậu Giang hu mbaok di jaik abih dom tỉnh, ban dalam taneh ia. Langiu di nan, dom janih baoh kayau daok hu pablei tapa dom taneh ia di dunya yau ye EU, Hồng Kông (Trung Quốc) saong kaya pandap meng ikan salat jeng hu pablei tapa dom taneh ia yau ye Hàn Quốc, Đài Loan (Trung quốc)...

Sở Thông tin saong Truyền thông tỉnh Bình Thuận pambuak haong dhar kapul Dam dara TTXVN dom Jabat ngak bruk di bhum Đông Nam bộ, peih danak dak alin 2.000 baoh tapuk ka dom đơn vị di huyen kaoh pulao Phú Quý, tỉnh Bình Thuận. Dom baoh tapuk ndung bak asar kadha ka tasik kaoh pulao palei negar, bruk bac megru saong ngak tui Ho Chi Minh ngan haong dom bruk meng jalan diukrai siam gheih tal bruk daong manuac si dunya…meda rik tame pambak praong ilamo, pambuak bruk anit ranam, pabak parilo siam gheih ka raidiuk ilamo, jalan sahaneng di urang jakar, urang lin, pamedeih veik bruk takre tapuk saong patagok bruk jak ba gauk bac tapuk di dom đơn vị, sang bac.

Dua bilan tapa, rilo sang mikva urang ngak nong di huyện Bù Đăng, tỉnh Bình Phước daok duh hatai tuk bein durian daok hijao siam ye jruh hala, thu dhar saong metai rilo oh thau lac kayua halei. Anak bruk ini, karja pak ini daok jak ba mikva kaoh klaak phun durian metai piah plaih pambak tabiak praong. Di xã Đường 10, huyện Bù Đăng, karja hu nao pasang iek tapak saong daok pambuak bruk haong gah chuyên môn daong ka rahra duah iek kayua halei, piah hu jalan ngak ka pasiam phun pala. 

Tal biar harei kabroi, Sở Y tế tỉnh Đồng Nai brei thau hu 487 urang ruak pambak tal bruk jru mek kayua mbang bánh mỳ di tiem Băng, Ban Long Khánh. Bruk nan rah tabiak meng mon 11 tuk meteh harei 1/5, Sang iek ruak Đa khoa khu vực Long Khánh taduan yaok pluh urang ruak jru mek pandap mbang. Bác sỹ Chuyên khoa II Phan Văn Huyên, Yam ndoc Sang iek ruak Đa khoa khu vực Long Khánh brei thau: Đơn vị brei ba taong abih dom bac si daok bac di TPHCM piah mai daong, taong ruak ka urang.

Kanja quân sự Myanmar tabiak harak khan brei padeih bruk brei adat ka urang likei nao ngak bruk di negar langiu, kuhria meng bilan 5 ini. Harak nan daok khan brei thau lac, jalan ngak ini piah “hu rilo tukvak jang ngak brei cambaih dom jalan ngak”, min oh brei thau cambaih laih lac hagait. Gah urang ngak dunya brei thau, hu labaih 4 triệu rahra Myanmar ngak bruk di negar langiu thun 2020. Gah tui iek bruk di Myanmar mboh lac Karja quân sự Myanmar tabiak sarak bahrau ini piah daong peih ngak hukum Nghĩa vụ quân sự, hu patabiak di bilan 2 meng blaoh. 

Hajan praong di bang gah Meraong Brazil ngak brei takik di nyu 37 urang metai. Labaih 70 urang urak ini daok lahik saong labaih 23 ribau urang jaik bhum tapen negar Uruguay saong Argentina oh daok sang danaok. Tui urang jakar di bhum palei, bruk ia ribuk dauk rah di rilo labik, hu rilo tatua saong jalan khut. Hajan praong ngak glut jaleih taneh saong ba tal binek ia di sa sang mac thủy điện sit gaok kan kandah.

Bruk eik lipa daok pamak praong di grauk labik dalam taneh ia Sudan dalam tuk bruk mesruh gauk di bol bala Sudan haong gah cagar veik dalam labaih 1 thun tapa oh ka mboh trun. Bruk eik lipa ngak brei menuac sia klaak sang danaok. Dom pasak daong praong njauk blah mek saong pandap daong di dunya tal Sudan daok njauk bol bala pacang oh brei ba tal urang daok dalam dom labik eik lipa. Tui yaok pataom, jaik 18 triệu urang di Sudan daok dang anak bruk oh daok hagait piah mbang.