Taong Thư ký Quốc hội, Chu nhiem Jabat Quốc hội ong Bùi Văn Cường brei thau: Mbang nyaom ka 7, Quốc hội mbang XV hu peih tabiak di harei 20/5 anak tal saong tamat di harei 28/6, tui kuhria abih tih tukvak ngak bruk lac 27 harei, Quốc hội hu ginum biai pataom gauk di Sang Quốc hội. Mbang nyaom meda hu peih ngak tui 2 mbang, meda pasang iek 40 asal kadha, dalam nan hu 24 asal kadha di bruk dak padang hukum, 16 asal kadha ka gah kinh te xa hoi, kadung jien kanja, pasang iek saong dom bruk hu makna praong karei. Tukvak caik ka bruk sua tangi, javap jaloi lac 2 harei mateh yau dahlau mai saong peih bruk sua tangi di Mbang ka 1 piah hu tukvak caga ka du thao sarak ka bruk sua tangi tani tanat ka chat luong di mbang nyaom.

Salam uan 134 thun harei menek Chủ tịch Hồ Chí Minh, harei kabroi, Tỉnh ủy Vĩnh Long pataom iek veik 3 thun jhul khang bruk bac megru saong ngak tui jalan hadah krah siam mekre di Wa Hồ; saong pok meyaom dom tổ chức đảng saong urang đảng ngak biak siam bruk di drei dalam 5 thun gam. Di nyaom biai, Sư Thạch Um Thi Rít, Phaok trụ trì paha Mời, xã Trà Côn, huyện Trà Ôn, lac sa dalam dom urang taduan hu harak meyaom kayua ngak siam bruk bac megru saong ngak tui Wa. Meng rilo thun tapa, sư kham merat jak ba  urang Khmer dalam palei ngak siam sarak, hukum di Đảng saong Karja. Meng nan, bo talei jum pataom dom bangsa dalam palei tuk halei jeng hu tani tanat.

TP.HCM peih mbaok parang iek dunya gah pandap mbang ngan haong asal kadha “pataom dom yaom glaong gam cak rok patagok” di harei kabroi. Parang iek dui pachreih hu jaik 400 doanh nghiep, dom gah, kapul nyaom dalam taneh ia saong dunya parang iek labaih 500 gian pandap saong rilo bruk pambuak gauk pablei salih. Dom pandap hu mayaih khan di nyaom gah pandap mbang ngak blaoh; pandap manyum; pandap panda; jamraik pandap ngak tabiak, papaok, khik piah saong dom pandap tamo – hijao – khang kajap. Harei parang iek hu makna biak praong dalam bruk mayaih khan pandap panda tal urang blei pandar dalam saong langiu negar.

Harei kabroi, BHXH Việt Nam brei thau lac tukvak jaik ini, rilo urang mek angan lac urang jakar BHXH Việt Nam ieu phone, nhắn tin brei urang hu BHXH, BHYT, BH thất nghiệp ieu đồng bộ dữ liệu CCCD, cập nhật thông tin angaok ứng dụng VssID - BHXH số. Di dom tỉnh Đồng Nai, Bình Dương kol bleik pachot nan daok ieu phone ieu rahra cập nhật CCCD tame ứng dụng meng bruk tame jalan link camlaik hu iku lac ".govvvn.com" angaok phone tangin saong ngak tui tacei pato, tapa nan, rilo menuac lahik abih jien dalam tài khoản gilang pariak di drei. Bruk mek angan yau nan daok hu mboh di rilo labik karei yau ye Hà Nội, Sóc Trăng, TP HCM… BHXH Việt Nam hu panuac kakei rahra, tuk ngak dom harak gar thủ tục hành chính, njauk pagloang hatai sangka piah oh njauk lah pachot.

Melam kabroi, Pasak Y tế huyện Trảng Bom, tỉnh Đồng Nai taduan taong ruak cap cuu ka jaik 100 urang ngak hadei di tuk mbang huak di kong ty. Tui khau tin camriep, di Cty TNHH Dechang Việt Nam (Labik ngak kong Giang Điền), labaih 100 urang ngak mboh taglaoh ta-aok, pandik tung hadei di tuk mbang bier harei di công ty. Jabat chuc nang huyện Trảng Bom daok peih bruk taong ruak ka dom urang ruak. Makna di bala ini daok hu pasang iek, ngak cambaih laih. Công ty TNHH Dechang Việt Nam urak ini hu labaih 1200 urang ngak. Dahlau di nan, di dalam tỉnh Đồng Nai jeng rahtabiak bala njauk jru mek pandap mbang di ban Long Khánh ngak ka labaih 500 urang njauk tame sang iek ruak piah taong ruak.

Tổng thống Mỹ Joe Biden bahrau brei thau dom yaom kak je bahrau ngan saong 18 tỷ đô la pandap blei tame meng Trung Quốc dalam dom gah hu maong lac praong ngan saong bruk an ninh taneh ia, dalam nan hu thép saong nhôm, chíp bán dẫn, radaih điện, dom binah di ắc quy, pin ia harei, cần cẩu, saong dom pandap y tế. Tổng thống Joe Biden ndom lac Mỹ duah bruk meriak gauk samu gauk, oh lac mesruh gauk haong Trung Quốc. Dom yaom je bahrau di Mỹ hu peih tabiak ngak tui dalam 2 thun tal. Dahlau di nan, karja di Tổng thống Donald Trump hu kak je ngan saong 300 tỷ đô la pandap di Trung Quốc saong jaik abih jeng daok hu khik ramik ngak tui.

Piah khik  siam makre ka Harei pataom phim Cannes hu peih tabiak di harei kabroi, France hu ba labaih 400 urang an ninh, 200 sỹ quan canh sat saong jaik 70 urang khik iek. Langiu di nan, rilo urang ngak an ninh di dom gah an ninh tu nhan meda hu mbaok piah khik iek dom bruk langiu di Harei pataom phim dalam nan hu dom var pataom mbang ma-in di mblang tasik, nao gilai, khach san. Labaih 40 ribau tuai damuai hu taa saong dom urang hu danei angan meda mai hu mbaok di sa dalam  lime harei pataom phim praong abih di dunya.

Karja Canada tabiak panuac brei samar panduan ba menuac tabiak truh  ban sit dầu mỏ Fort McMurray, tuk sa bruk khuah glai praong oh pasang iek hu daok atah di Alberta jaik 16 km. Pui khuah labik nna dak harei dak khang, kan pasang iek hu kayua langik thu lagu saong ngin khang. Jaik 70.000 menuac di Fort McMurray daok hu panuac kakei lac caga nao dalam tukvak katut panak di abih. Fort McMurray lac pasak ngak menyek praong di Canada saong bruk khuah glai praong thun 2016 ngak brei 90.000 menuac pak ini panduan nao labik karei, saong khat lahik drap ar lac labaih 1 triệu thung menyek yaok harei./.