Tui Mintri Pato magru, dom sarak ka jien bilan, sarak daong gru pato hu tacei tabiak dalam du thao Hukum gru pato ye jien bilan di gru pato hu brei dak glaong abih dut saong tanut jien bilan ngak bruk urak ini. Jien bilan saong dom sarak tui jien bilan di gru pato daok ngak bruk di dom labik pato magru tu chu oh takik jang jien bilan saong dom sarak tui jien bilan di gru pato hu gam ilamo pato, gam tukvak ngak bruk, gam chuc danh dalam dom labik pato magru ka oh hu tu chu saong oh bier jang yaom jien bilan toi thieu bhum tui adat di Rajaei.

UBND tỉnh Bà Rịa - Vũng Tàu harei kabroi ginum biai haong dom nhà thầu padang ngak danak dak binah ka 3 jalan nduac samar Biên Hoà - Vũng Tàu. Dom gah sanya jhul samar bruk padang ngak, tal harei 30/4/2025 meda brei radaih nduac iek. Tui Mban khik ramik danak dak, kuhria tal harei 14/5 hu patabiak yaom jien bayar labaih 2.739 tỉ đồng brei ka 1.029 sang, kapul nyaom. mBan khik ramik danak dak ieu padang ngak veik jalan ngak saong tukvak padang ngak tantu cambaih laih piah pasang iek yaok adit, samar hu jalan ngak patagok bruk pabak tukvak meyah mboh suai damuai. Tal abih bilan 6 tal, meyah nhà thầu halei suai jang tukvak ba tabiak, ye bruk ngak nan hu ba tapa brei gah karei ngak. 

Tukvak tapa, Bưu điện tỉnh Đắk Nông hu pato tacei, daong ka labaih 11 ribau mbang urang daok di bhum atah biyah, bhum bangsa takik peih ngak harak gar online angaok blah web negar, dalam nan hu jaik 11 ribau harak gar hu pasang iek mbaoh tangin brei tapa, mek hu jaik 100%. Tapa bruk ngak mboh lac jit vu daong ka rahra ngak harak gar online biak siam lagaih, daong ka mikva patak pataom hu tukvak, phun jien, abih di nyu nan lac rahra daok di bhum jalan mbak nao mai kan kandah, bhum atah biyah, bhum mikva bangsa takik hu ilamo kong nghe khau tin daok takik, thau ka adat hukum ka oh ginup abih.

Harei kabroi, di UBND xã Nam Thái A, huyện An Biên, UBMT negar VN tỉnh, Hội Chữ thập đỏ tỉnh Kiên Giang haong Tập đoàn Tân Á Đại Thành pambuak bruk haong karja palei alin hadiah 30 bồn ia, 5 mac halang ia brei ka urang nong sang daok tapen tasik dua xã Nam Thái, Nam Thái A hu raidiuk kan kandah, yaom abih tih 94 triệu đồng. Nam Thái saong Nam Thái A lac dom xã tapen tasik di huyện An Biên. Dalam bilan thu, di dom palei daok atah sang mac ia, mikva bhian kurang ia taba, pandar ia njar njom lakhun, oh siam oh hacih.

Huyện Nam Trà My, tỉnh Quảng Nam hu peih ngak haong gauk dom labik tai dinh cu pataom gauk saong tai dinh cu daok pablak gauk di dom xã: Trà Tập, Trà Cang, Trà Linh saong Trà Vân. Tui nan hu 250 baoh sang bhap bini hu rami ramik labik daok bahrau di dom labik tai dinh cu pataom gauk, labaih 70 baoh sang hu ramik daok di labik tai dinh cu daok pablak gauk pak di labik. Gam haong bruk rami ramik labik daok tai dinh cu, huyện Nam Trà My kham marat duah taneh piah rami ramik taneh ngak mbang, pala drak, pablak tame rilo phun jien karei piah daong jalan ngak mbang duah jien khang kajap ka mikva.

Tổng thống Mỹ urak ini, lac ong Joe Biden haong Tổng thống Mỹ dahlau daih, lac ong Donald Trump harei kabroi njauk gauk ka bruk tranh luận - kamlah gauk 2 mbang dahlau di harei tổng tuyển cử. Ong Joe Biden haong ong Donald Trump tantu jeng ứng cử viên di đảng Dân chủ saong Cộng hòa dalam bruk pilih ruah urang ngak Tổng thống Mỹ thun ini. Dua ứng cử viên njauk gauk hu mbaok tame bruk tranh luận kayua CNN dang tabiak ngak di harei 27/6 saong bruk kamlah gauk kayua hãng tin tức ABC dang tabiak ngak harei 10/9. Dua gah njauk gauk ka bruk nan dom mon hadei di tuk Tổng thống Joe Biden thách thức ong Donald Trump tabiak kamlah gauk.

Sruh gilai camriep dalam danak dak ngak gilai pajeng khí đốt (LNG) praong abih di Trung Quốc saong jeng lac gilai LNG praong rai ka 5 camriep di dunya hu jao di ban Thượng Hải harei kabroi, brei mboh yaom praong glaong di gah ngak gilai Trung Quốc. Sruh gilai hu angan Greenergy Ocean, atah 299 mét, praong labaih 46 mét saong dalam labaih 26 mét. Gilai hu mbaok boong praong samu haong 3 mblang caoh dat blaong saong hu prein taduan 174.000 mét khối LNG, pabak bruk pandar khí đốt di 7 trieu baoh sang dalam 1 bilan.

Zimbabwe harei kabroi tabiak panuac brei thau dahlau lac, labaih meteh dom menuac sia taneh ia ini caong hu daong pandap mbang dalam thun ini, hadei di mbang pandiak bhang khang ngak brei phun pala matai thu biak rilo. Dom kapul nyaom ngak pahla daok duah labik piah daong pandap mbang ka 6 triệu menuac di bhum palei pala saong 1 triệu 700 rabau menuac labik thành thị di taneh ia ini. Ini lac mbang pandiak bhang jhak di abih kuhria dalam 40 thun tapa di taneh ia ini. Rajaei Zimbabwe jeng hu rilo mbang ieu dom kapul nyaom ngak pahla di dunya daong padai brah pandap mbang yaom 2 tỷ USD./.