Mintri Ilamo, the thao saong Du lich meda peih bruk padang ngak Kalup kapul ma-in ilamo, van nghe meng kan di bangsa S'tiêng huyện Phú Riềng, tỉnh Bình Phước; bangsa Tày huyện Đồng Phú, tỉnh Bình Phước; bangsa Mường di huyện Lạc Sơn, tỉnh Hòa Bình; bangsa Giẻ Triêng di huyện Nam Giang, tỉnh Quảng Nam. Ini lac bruk ngak piah peih ngak siam lagaih Danak dak bruk ngak negar cak rok patagok kinh tế - xã hội bhum mikva bangsa takik saong bhum ceik tukvak 2021 - 2030 saong dom jalan ngak, sarak di Ndang, sarak, hukum di Kanja ka bruk khik ramik, cak rok patagok dom yaom glaong ilamo meng kan siam gheih di dom bangsa takik pambuak haong bruk cak rok du lich di bhum palei.

UBND tỉnh Đắk Lắk bahrau tabiak Sarak ka bruk jao brei khik iek saong patagok yaom inem krung ilamu phi vật thể dalam harak angan Inem krung ilamu phi vật thể pakat negar Mo Mường. Tui yaok pataom di Cục Inem krung ilamu, urak ini 7 tỉnh, ban dalam taneh ia daok inem krung Mo Mường, dalam nan hu Đắk Lắk. Urang Mường dalam tỉnh Đắk Lắk daok di dom huyện Ea Kar, Krông Bông, Krông Năng, Ea H’leo saong ban Buôn Ma Thuột. Tỉnh Đắk Lắk jao ka dom puk palei hu inem krung Mo Mường pambuak bruk haong dom jabat, dom gah pambuak tal peih bruk khik iek saong patagok yaom inem krung njauk adat hukum.

Sang bac Pho thong bangsa gam bac gam daok - THCS Sơn Điền, huyện Di Linh, Lỉnh Lâm Đồng brei thau, meng di tuk pandar bruk ngak gam bac gam daok, dom anek saih kham marat bac naih joi tuk halei jeng mek hu 100%. Labik gam bac gam daok di sang bac urak ini hu bilik daok, ghieng tahanek, labik ve sinh, labik ma-in, pahat rup, bein pala njam patam, labik raong glang. Gam haong dom jalan ngak langyah yau paglaong chat luong pato bac, pathau khan, jak ba paglaong hatai sahaneng ka amaik ame, anek saih, dom var mbang di labik gam bac gam daok di sang bac tuk halei jeng caik tabiak jalan ngak lac khik tani tanat, hacih saat pandap mbang, chat luong dinh duong ka anek saih lac bruk ngak dang akaok, rik tame khik tani tanat anek saih nao mai, ba kein lagaih ka anek saih sahanang hatai nao bac.

Mintri Y tế bahrau brei adat, brei dui atah tukvak tuk angan pandar ka 40 janih vaccine, sinh phẩm, dalam nan hu dom vaccine bahrau daok hu cang maong lac vaccine caga ruak pandiak tabiak darah, vaccine pacang ruak zona thần kinh, vaccine caga 23 tuýp phế cầu rai bahrau. Daok ngan saong ruak pandiak tabiak darah, yaok thun Việt Nam hu yaok ratuh rabau urang njom ruak saong yaok pluh menuac matai kayua njauk ruak pandiak tabiak darah di uranaih saong urang praong, min rilo thun tapa, oh ka hu vaccine pacang caga, dom jalan pasang iek bruk njaom mbak yau ye pametai jamaok ba ruak daok gaok rilo kan kandah.

Hadei di mbang njauk jru mek pandap mbang rahtabiak di dalam ban Phan Thiết, Akaok UBND tỉnh Bình Thuận bahrau hu harak samar drah piah ieu kakei dom so, dom mban, dom gah, UBND dom huyen, ban sit, ban paglaong bruk khik tani tanat salamat pandap mbang, pacang caga njauk jru mek pandap mbang. Tui nan, Akaok UBND tỉnh kakei Sở Y tế, Sở Ngak nong saong patagok palei pala, So Công thương paglaong bruk pasang iek dom labik ngak tabiak, pablei salih pandap mbang tui njauk adat. Gam tui di nan, kham marat pambuak dom gah piah bruk ngak hu tani tanat, siam lagaih dalam bruk khik ramik di kanja ka bruk salamat pandap mbang. Khang hatai langyah dom labik oh ngak njauk, oh khik salamat pandap mbang.

Japon hu taduan raok labaih 3 triệu tuai dalam bilan ka 2 gam gam di bilan 4 meng blaoh, ngak brei patagok hatai chreih chrai bui sambai ka 1 thun tagok khang gah du lịch. Dalam nan tuai mai meng Prang, Italia saong Trung Đông tagok rilo di abih. Jien yên laik tal yaom biar di abih kuhria dalam 34 thun tapa, ngak ka Japon jeng labik mai tal chreih chrai ka tuai negar langiu. Min bruk tuai du lịch tagok rilo jeng ba tal bruk tapa prein di dom labik ravang me-in danei angan di negar Japon.

Yaok rabau urang bahrau pataom mbaok di Pasak pulao Trường Châu di labik hanh chinh Hồng Kong (Trung Quốc) piah hu mbaok tame saong maong iek mbang pakacah ndik tháp kreim mek ahar banh bao, sa dalam dom bruk gheih makre di Harei pataom ahar banh bao meng kan daok hu peih tabiak di pak ini. Di tuk kreih melam, 12 dam dara likei  kumei ba gauk ndik tagok sa tháp kriem glaong 14m piah meblah mek dom ahar banh bao hu akhar salamat, siam makre. Mbang pakacah meblah mek ahar banh bao lac sa dalam dom bruk ghieh makre di Harei pataom ahar banh bao meng kan di rahra daok pak pulao Trường Châu di  Hong Kong.

Mbaik capi Ghita bo urang likei nghệ sĩ huyền thoại lac urang negar Anh angan Eric Clapton pandar piah paneh tabiak kadha balat dane angan Wonderful Tonight hu ba tabiak pablei to yaom di bilan anak tal haong yaom tui kuhria tagok tal labaih 500 rabau đôla Mỹ. Tui amuk Claire, urang dang akaok gah Ilamu bhap bini di gah to yaom Bonhams harei kabroi brei thau: mbaik capi biak karei saong hu pambuak pagam tal sa kadha hu angan karei di ngôi sao đồng quê Don Williams. Bruk ini jeng meda ngak brei hu yaom ka mbaik capi./.