Dah page ini, di nyaom biai pataom iek veik 3 thun peih ngak Kết luận 01-KL/TW harei 18/5/2021 di Mintri Chính trị, Tỉnh uỷ Gia Lai hu pok mayaom 50 urang, kapul nyaom hu angan je dalam bruk bac megru saong ngak tui jalan hadah krah siam mekre di Hồ Chí Minh hu jeng bruk ngak yaok harei, dalam bruk ngak di dom pakat, dom gah, jabat, kapul nyaom dalam tinh ngan haong yaok rabau bruk ngak gheih, siam lagaih, duah jalan ngak bahrau. Di nyaom biai, tỉnh Gia Lai hu alin harak mayaom ka 21 kapul nyaom saong 29 urang angan je dalam bruk bac megru saong ngak tui jalan hadah krah siam mekre di Hồ Chí Minh.

Pahadar 134 thun Harei menek CT Hồ Chí Minh, harei kabroi, Sở Ilamu - Thể thao saong Du lịch Đắk Lắk peih parang iek thaot binguk ngan saong kadha “Hồ Chí Minh mekre abih angan Wa”. Parang iek parang tabiak 80 blah thaot ka raidiuk saong bruk ngak di CT Hồ Chí Minh. Dalam nan, hu dom blah thaot meng di tuk Wa tabiak nao duah jalan daong taneh ia di thun 1911, tame bruk mesruh peih paha dom bangsa mbiah tal tuk Wa tagok pan akaok bruk dak padang saong khik caga karja dân chủ bhap bini bahrau padang tabiak, peih bruk mesruh suai lavik.

Melam blaoh, di ban Cao Lãnh hu peih Harei pataom caraih Đồng Tháp mbang ka II ngan haong asal kadha “hadah hadai sambo caraih”. Harei Pataom caraih piah ka Dong Thap mayaih khan ka ilamo, du lich, mayaih khan dom siam lagaih, prein khang, saong jhul khang dom bruk ngak mbang kinh te meng caraih, pambuak gauk cak rok patagok du lich pambuak haong kinh te ngak nong. Caraih lac sa dalam 5 gah pandap hu pilih ruah peih ngak dalam Danak dak rami ramik veik bruk ngak nong, urak ini, mblang taneh pala caraih di Dong Thap lac labaih 1.800ha, rilo pandap panda meng caraih hu pablei tabiak negar langiu saong ba mai dom yaom kinh te biak glaong.

Sở Ngak nong saong Patagok palei pala TP.HCM brei thau: Tal thun 2030, taong baih taneh pala njam hacih dalam dom quận pasak brei panduan ba tabiak langiu ban atau salih tapa bruk ngak karei lagaih haong quy hoạch di TP. Tui nan, 16 quận dalam ban hu: quan 1, 3, 4, 5, 6, 7, 8, 10, 11,12, Phú Nhuận, Tân Phú, Bình Tân, Tân Bình, Gò Vấp saong Bình Thạnh, tal thun 2025 tok daok 1.950 ha taneh ngak nong daok parai rai, pablak haong dom danak dak saong dom labik daok đô thị; tal thun 2030 TP. HCM oh daok taneh ngak nong dalam dom quận pasak.

Dah page ini, Mban giam hieu Sang bac THPT Nguyễn Thị Diệu, Quận 3, TP.HCM brei thau lac brei padeih pato piah taong yaom, ngak brei cambaih  laih bruk ngak di gru pato brei ka 6 anek saih taong sa anek saih karei kayua nao bac suai jang. Sang bac  brei gru pato salih ka gru pato nan meng harei som (20/5) anak tal. Dahlau di nan, sa amaik ame anek saih tal bac 12A1 di sang bac, brei thau bruk gru chu nhiem ieu 6 anek saih mek nding katak taong tame taok sa anek saih karei anak tal bac kayua nao mac suai. Anek saih njauk taong jeng bhian nao bac suai saong hu dom bruk ngak suan. Gru chu nhiem ini hu taduan bruk ngak suan di drei saong taduan yaok bruk phat ka drei. Anek saih njauk ayut saabat taong jeng nao bac yau yaok harei.

Thủ tướng Đức Olaf Scholz bahrau ini brei thau, kinh tế Đức lac sa dalam dom nền kinh tế chreih chrai abih di dunya. Ong brei thau, piah langyah bruk kurang urang ngak hu tangin gheih ngak, dom Cty saong Jabat pablei salih haong ngak kong Đức brei kham merat duah urang ngak negar langiu hu tangin gheih bruk. Yaom lac kuhria mboh dahlau lac tagok takik, Thủ tướng Đức jeng brei thau taneh ia Đức daok pamaong tal sa nền kinh tế hadah hadai. Thủ tướng Olaf Scholz brei thau lac lạm phát nyu mai veik tanut 2%, bruk pablei salih saong ngak pandap hu tagok dalam 3 bilan akaok thun ini.

Gilang paraik kanja Argentina hu ba tabiak harak brei thau lac cakak yaom jien laba tham chiếu trun 40%, meng tanut 50% dahlau di nan.  Bruk ngak nan hu ba tabiak dalam tuk dom urang padang ngak sarak mboh lac dom trak damak gah yaom kaom di taneh ia Nam Mỹ ini daok trun pandiak yaom lac bruk lam phat jeng daok di tanut jaik 300%. Ini lac mbang cakak trun yaom jien laba praong ka 5 di Gilang paraik kanja Argentina, meng di bilan 12 thun blaoh. Jien pê-sô di Argentina par abih 95% yaom di nyu dalam 5 thun tapa tuk bruk sau kadau kinh te pak negar ini dak harei dak khang jang.

Thủ tướng Thái Lan Srettha Thavisin khan lac brei ramik ngak mblang kapal haoh Hua Hin, daok di gah pai Thái Lan jeng mblang kapal haoh pakat dunya. Hua Hin lac sa ban sit padeih padei tapen tasik di tỉnh Prachuap Khiri Khan, hu ginup dom janih pabak ka du lịch pakat dunya. Langiu di nan, tỉnh Petchaburi jaik nan jeng hu tuai biak takre haong angan lac ban hadah krah di UNESCO. Thái Lan daok patagok bruk pambuak gauk haong bhum taneh saong dunya piah jeng labik du lịch dang akaok dunya./.